Azər Həsrət: "Erməni təbliğatçıları bolqar deputatı..."
Martın 19-da Avropa Parlamentində "Azərbaycandakı erməni əsirlər" adlı konfransın keçirilməsi planlaşdırılır. Bu barədə Azadlıq Radiosunun Erməni xidməti – "Azatutyun" Ermənistandakı Belçika səfirliyinə istinadən yazıb.
Xəbər verilir ki, konfransı Avropa Parlamentində Avropa Xalq Partiyası (EPP) fraksiyasının üzvü, bolqarıstanlı Andrey Kovaçov təşkil edir.
Göründüyü kimi, erməni lobbisi növbəti erməni yalanını işə keçirmək üçün muzdlu deputatlardan istifadə edir, bu dəfə də əllərinə bolqar deputat Andrey Kovaçov keçib.
Qeyd edək erməni lobbisi zaman-zaman bu cür pula işləyən deputatlar vasitəsilə beynəlxalq qurumlarda Azərbaycana qarşı əsassız və bədnam qətnamələrin qəbul edilməsinə nail olub.
"Bolqar deputatın təşkilatçılığı ilə Avropa Parlamentində antiazərbaycan konfransın keçirilməsinin planlaşdırılılması bizə qarşı növbəti qərəzli təşəbbüsdür"
Məsələyə şərh verən siyasi şərhçi Azər Həsrət "Bakı-Xəbər"ə bildirdi ki, Azərbaycan deputatları xarici ölkələrin parlament üzvləri ilə yaxından işləməlidir. "Erməni təbliğatçıları bolqar deputatı öz tərəflərinə çəkə bilirsə, bu bizim zəifliyimizdəndir. Məsələ ondadır ki, Bolqarıstan Azərbaycanla çox yaxın münasibətlərə malikdir. Azərbaycan dövləti ilə Bolqarıstan dövləti, xüsuilə də son zamanlar daha da yaxınlaşıb. Belə bir şəraitdə, əlbəttə ki, Azərbaycan parlamentinin üzvləri ilə Bolqarıstan parlamentinin üzvləri arasında çox yaxşı münasibətlər formalaşmış olmalı idi. Amma bu münasibət formalaşıbmı? Görünür ki, yox. Yəni ermənilər o gedişi edirsə bizim də alternativ gedişlərimiz olmalıdır"-deyə bildirdi.
Elə hey ermənilərin təbliğatının arxasınca getdiyimizi deyən A.Həsrət vurğuladı ki, düşmən qarşımızda durub və bizə qarşı təbliğatını dayandıran deyil. "Biz də əks-tədbirlər görməliyik, fəaliyyət göstərməliyik, dayanmamalıyıq" - deyə qeyd edən A.Həsrət bildirdi ki, biz xarici deputatlarla işləməliyik və onların ermənilər tərəfindən aldadılmasına, bizim əleyhimizə işləmələrinə imkan verməməliyik. A.Həsrət vurğuladı ki, biz artıq başqalarını günahlandırmaqdan çəkinməli və özümüzə diqqətlə baxmalıyıq. "Bizim Parlamentimiz, deputatlarımız işləməlidir. Mən illərdir bunu deyirəm, amma məni vecinə alan yoxdur. Nəticədə Avropa Parlamenti, AŞPA, ATƏT-dən ayrı-ayrı strukturlar bizə qarşı çıxır. Yəni hətta BMT səviyyəsində bizə qarşı çıxanlar var. Bütün bunlar ona görə baş verir ki, biz işləmirik. Özümüz yaxşı işləsək, səsimizi çatdıra bilsək bu problemlər olan deyil. Hər şeyi Prezident İlham Əliyev etməli deyil ki. Prezident dövlət rəhbərləri səviyyəsində şəxsən gecə-gündüz bu işlərlə məşğuldur, kifayət qədər də uğurlu nəticələri var. Amma bu təkcə prezidentlər səviyyəsində olmur. Özəlliklə də Avropada bu məsələlərdə parlamentlərin əvəzsiz rolu var. Yəni ona görə də, Azərbaycan Parlamentinin üzvləri bu boşluqları doldurmağı bacarmalıdır. Onlarda bu qabiliyyət, bu bacarıq olmalıdır. Hamını ucdantutma demirəm, amma Parlamentin böyük əksəriyyəti "ölülərdən" ibarətdir. Heç bir yerdən səsləri gəlmir. Yəni bəziləri deyirlər ki, ölkə içində ictimai rəyə təsir edirlər. Halbuki, nə ölkə içində, nə ölkə dışından bunların səsi gəlmir. Düşünürəm ki, prezident seçkisini keçirmişik, növbəti mərhələ üçün parlament seçkisində də bu məsələyə ciddi yanaşmaq lazımdır. Çünki artıq ermənilərin qarşısına çıxa biləcək adamlar Milli Məclisdə otursun və onlardan iş də tələb edə bilək" - deyə A.Həsrət qeyd etdi.
Müstəqil.az saytının baş redaktoru Faiq Balabəyli isə "Bakı-Xəbər"ə şərhində bildirdi ki, erməni təbliğatçıları Azərbaycana qarşı bu cür çirkin kampaniyalardan əl çəkmək niyyətində deyil, bu səbəbdən də müxtəlif ölkələrin parlament üzvlərini müxtəlif vasitələrlə antiazərbaycan kampaniyasına cəlb edirlər. "Ermənistan və xaricdəki erməni lobbisi bütün vasitələrdən istifadə edərək Azərbaycanın əleyhinə kampaniya aparır. 2020-ci ilin 27 sentyabrından sonra baş verən hadisələr onları daha da quduzlaşdırıb. Bu baxımdan, əlləri çatan, torlarına düşən hər kəsdən, hər dövlətdən istifadə edərək beynəlxalq qurumlarda əleyhimizə işlər görürlər. Bolqar deputatın erməni toruna düşüb bu cür çirkin kampaniyaya vasitəçilik etməsi qətiyyən təəccüb doğurmur. Çünki bolqarların özlərində də antitürk əhvalı var, onlar uzun illər türklərə, Osmanlı impersiyasına, Azərbaycana qarşı müsbət tərəf kimi seçilməyiblər. İkinci tərəfdən, burada bir xristian təəssübkeşliyi də var ki, onlar din qardaşları kimi bir-birinə dəstək olurlar. Bolqar deputatın təşkilatçılığı ilə Avropa Parlamentində antiazərbaycan konfransının keçirilməsinin planlaşdırılılması bizə qarşı növbəti qərəzli təşəbbüsdür. Hesab edirəm ki, Azərbaycanla yanaşı Türkiyə və bizə başqa dost olan dövlətlər bu bədnam konfransın qarşısını almaq üçün addımlar atmalıdır".
F.Balabəyli qeyd etdi ki, Azərbaycana düşmən olan dövlətlər onsuz da daim bizim əleyhimizə bu cür tədbirlər keçirmək təşəbbüsündə olurlar, biz də buna qarşı tədbirlər görməli, həmin ölkələrdə özümüzə dostlar axtarmalıyıq. Ermənistan tərəfi bütün hallarda Azərbaycana təzyiq göstərə biləcək böyük güclərdən istifadə edir. "Avropa Parlamenti də, Avropa İttifaqı da türkü, türkə yaxın olanları hədəfə götürür, bu istiqamətdə işlər aparırlar" - deyə F.Balabəyli qeyd etdi.
İradə SARIYEVA
