Məlum olduğu kimi, ölkəmizdə fəaliyyət göstərən "Abzas Media" və "Toplum TV" adlı media nümunəsinin qanunazidd fəaliyyəti və əməkdaşlarının müxtəlif xarici təşkilatlardan maliyyə vəsaiti almalarına dair əsaslı faktlar aşkarlandığı üçün cinayət işi qaldırılıb və adı qanunsuz əməldə keçən şəxslər həbs edilib.
Hüquq-mühafizə orqanları Toplum internet TV-nin ofisində apardıqları axtarış-əməliyyat tədbirləri zamanı onların cinayət əməlini sübut edən bir sıra sənədlər aşkarlayaraq götürüblər. Qanunvericiliyə uyğun olaraq da həbs edilənlər var. Yayılan rəsmi bəyanatlarda bildirilir ki, Azərbaycan xalqının milli maraqlarına, Azərbaycan dövlətinin əleyhinə qarşı işləyən, hətta qeyri-qanuni üsullarla fəaliyyət göstərməkdən belə çəkinməyən şəbəkələrin müəyyən edilməsi və neytrallaşdırılması vacibdir. Baxmayaraq ki, məkrli qüvvələr ifşa olunduqca hay-küy qaldıranlar da çoxalır. Gözlənildiyi kimi, ənənəvi ampluasından çıxış etməyə və hay-küy qaldırmağa adətkar olan Qərb institutları Toplum TV-nin ofisində aparılan axtarış tədbirlərini media azadlığının pozulması kimi qiymətləndirməyə cəhdlər göstərir. Halbuki, axtarış tədbirləri Azərbaycan qanunlarına zidd şəkildə medianın, jurnalistlərin və ayrı-ayrı şəxslərin maliyyələşdirilməsinə dair ciddi dəlilərin müəyyən edilməsi ilə bağlıdır. Məhz bu faktlara görə qaçaqmalçılıq maddəsi ilə cinayət işi qaldırılır.
Təbii ki, Toplum TV ilə bağlı tədbirlərin görülməsindən sonra xarici media, hüquq müdafiə təşkilatları, sonra isə Qərb rəsmiləri tərəfindən ardıcıl ittihamların səslənəcəyi heç bir sual doğurmur. Lakin bütün bu addımlar Azərbaycanı öz daxili məkanını təxribat və qeyri-qanuni fəaliyyətdən qorumaqdan çəkindirməyəcək.
Bəllidir ki, Azərbaycan dövləti demokratiyanı, insanların hüquq və azadlıqlarını, mətbuat azadlığını Qərbin xoşuna gəlməsi üçün təmin etməyib. Ölkəmizdə bütün hüquqlar vətəndaşlarımızın firavan yaşaması üçün təmin olunub. Amma heç kimə təmin edilmiş hüquqlardan dövlətə qarşı istifadə olunmasına da imkan verilməyəcək.
ABŞ və Qərbin bir çox fondları müstəqil siyasət yürüdən dövlətlərin uğurlarını əlindən almaq üçün iş aparırlar. Onlar gizli yollarla ayırdıqları maliyyə vəsaitləri ilə mətbuat orqanları, QHT-ləri maliyyələşədirir və öz sifarişlərini icra etdirirlər. Qərbin bu çirkin planlarının qarşısını vaxtında ala bilməyən ölkələrdə xalqı dövlətə qarşı qaldıraraq rəngli inqilabların təşkil olunmasına nail olurlar. Ukraynada nail olduqları narıncı inqilabın nəticəsidir ki, bu gün ölkə müharibə burulğanında çətin vəziyyətə düşüb. Gürcüstanda isə torpaqlarının itirilməsi ilə nəticələnib.
Məlum olur ki, "Abzas Media"nı, "Toplum TV"ni, müəyyən QHT-ləri, radikal müxalifəti və s. maliyyələşdirən bəzi Qərb fondları ölkəmizdəki siyasi sabitliyi pozmaqla xalqı dövlətə qarşı çıxarmağa çalışırlar. Təbii ki, Azərbaycan dövlətinin təhlükəsizlik orqanları dövlətə qarşı cinayətkar məqsədlərini həyata keçirmək istəyənləri vaxtında müəyyən edir və neytrallaşdırır. Bu gün ərazilərimizin suverenliyini təmin etməyimizi, Zəfərə imza atmağımızı və müstəqil siyasət yürütməyimizi həzm edə bilməyən dairələr özlərinin təsis etdiyi fondlar hesabına ölkəmizin daxilində sabitliyi pozmağa çalışırlar. Onlar birmənalı şəkildə bilməlidirlər ki, digər ölkələrdə həyata keçirmələrinə nail olunmuş oyunlar Azərbaycanda baş tutmayacaq. Qərb Azərbaycanda demokratiya, insan haqları, söz azadlığının olmadığını və siyasi baxışlarına görə həbslər keçirildiyini bildirməklə saxta ittihamlar səsləndirir. Burda sual olunur ki, ABŞ və Qərbdə insan haqları, söz azadlığı qorunurmu? Qərbin bu məsələlərə aidiyyəti yoxdur. Əgər belə olmasaydı, Edvard Snouden, Culian Assanj və digərlərinə qarşı məxfi məlumatların yayılması bəhanəsi ilə təqib və həbslər həyata keçirməzdilər. Onların da hüquq və azadlıqları təmin olunmalıydı. Fransada öz fikirlərini ifadə etrmək üçün dinc aksiya keçirən insanlar polis dəyənəyi altına salınaraq həbsxanalara atılmazdılar. Yeni Kaledoniyaya ezam olunmuş AZƏRTAC-ın jurnalisti Aygün Həsənovanın Fransa polisi tərəfindən qanunsuz həbs olunaraq işgəncələr verib deportasiya edilməsi söz azadlığı və jurnalisitin informasiya almaq hüququnun tapdalanması deyildimi? Belə misalları çox çəkmək olar. Təbii ki, onlar bu mövzuları milli müstəqilliyinə qovuşmuş ölkələrin müstəqlliklərini əllərindən almaq üçün silah kimi istifadə edirlər.
Məhəmmədəli QƏRİBLİ
