Məhərrəm Zülfüqarlı: "Fransada az qala faşist partiyası hakimiyyətə gəlir"
Acınacaqlı haldır ki, hazırda islamofobiya özünü demokratik hesab edən bir sıra Qərb ölkələrinin dövlət siyasətinin tərkib hissəsini təşkil edir. Bu barədə Prezident İlham Əliyevin Bakıda keçirilən "Müxtəlifliyin qorunması: 2024-cü ildə İslamofobiya ilə mübarizə" mövzusunda beynəlxalq konfransın iştirakçılarına məktubunda bildirilib.
Məktubda qeyd olunub ki, son bir ildə dünyada baş vermiş bütün anti-İslam təzahürlərinin 80 faizi bu ölkələrin payına düşür: "İslamofobiyanın ən yüksək səviyyəyə çatdığı və rəsmi ideologiya kimi tətbiq olunduğu bəzi Avropa ölkələrində müqəddəs kitabımız "Qurani-Kərim"in yandırılması, Məhəmməd Peyğəmbərin (s.ə.s) karikaturalarının nəşr edilməsi və sair təhqiramiz hərəkətlər söz azadlığı kimi qələmə verilir".
"Quranı yandıran avropalı ilə 1933-cü ildə Almaniyada hakimiyyətə gələn faşiszm arasında elə bir fərq yoxdur"
Sözügedən məsələni "Bakı-Xəbər"ə şərh edən AVCİYA-nın vitse-prezidenti, professor Məhərrəm Zülfüqarlının fikrincə, Prezidentin toxunduğu məsələ çox aktualdır: "Çünki biz həmişə sadəlövhcəsinə Qərbi Avropaya baxırıq. Ancaq orada gedən prosesləri çox vaxt dərindən izləmirik. Birincisi, tarixə nəzər salsaq görərik ki, bəşəriyyətə faciə gətirən 2 böyük ideologiya – faşizm və kommunizm ideologiyalarının ikisi də Qərbi Avropada yaranıb. Eyni zamanda dünyaya yayılıb. Bəşəriyyət bu iki ideologiyadan əziyyət çəkib və indi də əziyyət çəkir. Sonradan Qərbi Avropa bu ideologiyalardan özlərinin də əziyyət çəkdiyini görərək, İkinci Dünya müharibəsindən sonra daha sivil demokratik yollara əl atdı. Biz də bunlardan nümunə götürərək Qərb dəyərləri və ora inteqrasiya fikirlərini irəli sürdük. Görəndə ki, Qərb ölkələrində Quranı yandırırlar, Fransada az qala faşist partiyası hakimiyyətə gəlir, gözləntilərimizin əksini gördük. Sağ-radikal ünsürlər artıq bir sıra Avropa ölkələrində çox geniş əl-ayaq açırlar. Belə hallarda insanlar fikirləşməyə məcbur olur ki, bunlar yenidən bəşəriyyəti faciəyə aparan ideologiyaya qayıtmağa başlayıblar. Qərbdə artan islamafobiya meylləri də bundan irəli gəlir. "Müxtəlifliyin qorunması: 2024-cü ildə İslamofobiya ilə mübarizə" mövzusunda beynəlxalq tədbirin Azərbaycanda keçirilməsinin müsbət əhəmiyyəti ondan ibarətdir ki, bu, həm də bizə bir mesajdır. Yəni biz ayıq olmalıyıq. Həm də Qərbi Avropaya bir mesajdır ki, onlar bir daha belə səhvləri etməsinlər. Məsələn, bu gün Quranı yandıran avropalı ilə 1933-cü ildə Almaniyada hakimiyyətə gələn faşiszm arasında elə bir fərq yoxdur. Əgər bunların qarşısı alınmazsa, bəşəriyyət növbəti faciələrlə üzləşə bilər. O üzdən, belə tədbirlər tez-tez keçirilməlidir və bura Avropanın aparıcı dövlətlərinin aparıcı beyin mərkəzlərindən mütəxəssislər dəvət olunmalıdır. Sözügedən problemlər bir yerdə müzakirə edilib qarşısı alınmalıdır".
Vidadi ORDAHALLI
