Azər Həsrət: "Hətta tənqidçi mövqedə olanlar da bununla razılaşmalıdır ki, maliyyələşmə gizli ola bilməz"
2020-ci ilin payızında Vətən müharibəsi nəticəsində Azərbaycanın ərazi bütövlüyünü bərpa etməsi, 2023-cü ilin sentyabrında isə lokal xarakterli antiterror tədbirləri nəticəsində dövlət suverenliyimizin bərqərar olması xaricdəki bədxahlarımızı lap hövsələdən çıxarıb. Onlar yaranmış vəziyyətlə hələ də barışa bilmirlər.
Daxildə güclü həmrəyliyin mövcud olması isə bütün mümkün vasitələrin onların əlindən çıxması anlamına gəlir. Belə olan təqdirdə xaricdəki bədniyyətlilər kiçik, dağınıq qruplara "stavka" etmək məcburiyyətində qalırlar. Bir müddət öncə baş verən "Abzas Media" işi, indi isə "Toplum TV" internet televiziyası ilə bağlı məsələlər, əslində, eyni prosesin tərkib hissəsidir. Bu iki hadisə ilə bağlı aparılan əməliyyat-axtarış tədbirlərinə dair məlumatları tutuşdurduqda, onların arasında yaxın bağlılıq olduğunu görmək mümkündür. Əslində, bu proseslər arasında çox asanlıqla ümumiləşdirmə də aparmaq mümkündür. Bütün bunlar Qərbin dağıdıcılıq siyasətinin, qarayaxma kampaniyasının bir elementidir. Azərbaycanla yanaşı, Gürcüstan, Rusiya və digər ölkələrlə bağlı yürüdülən siyasət və törədilən təxribatlar eyni dəst-xətt üzrə həyata keçirilir.
"Toplum TV"-nin ofisində axtarış-əməliyyat tədbirlərinin həyata keçirilməsi Qərb institutlarının medianı, jurnalistləri və ayrı-ayrı şəxsləri Azərbaycan qanunlarına zidd şəkildə maliyyələşdirməsinə dair ciddi dəllilərin müəyyən edilməsi ilə bağlıdır. Bundan əvvəl "Abzas Media" ilə bağlı oxşar tədbirlər həyata keçirilib.
"Toplum TV" ilə bağlı tədbirlərin görülməsindən sonra xarici medianın, özlərini hüquq müdafiə təşkilatı adlandıranların, sonra isə Qərb rəsmilərinin ardıcıl ittihamlar səsləndirəcəkləri heç bir şübhə doğurmur. Həmin dairələr istintaqın nəticəsini gözləmədən Azərbaycanı medianı sıxışdırmaqda ittiham edirlər. Halbuki, sözügedən media nümunələrinin fəaliyyətinə nəzər saldıqda onların qrant ayırdıqları mövzular istiqamətindən kənara çıxmayıblar. Bunun da əsas istiqaməti vətəndaşların həssas təbəqəsi arasında uçurumu dərinləşdirmək olub.
Beynəlxalq qurumların qacaqmalçılıq ittihamı ilə ətrafında həbslər aparılan media qurumlarının işində ifadə etdiyi ifrat narahatlıq nə ilə bağlıdır?
Media eksperti, Əməkdar jurnalist Azər Həsrət "Bakı-Xəbər"ə açıqlamasında bildirdi ki, bu prosesdə bir qədər təmkinli davranmaq daha yaxşı olardı: "Azərbaycan dövləti neçə illərdir ki, media, siyasi, ictimai sahədəki fəaliyyətdə şəffaflığın vacibliyini xüsusilə vurğulayır: "Heç bir xarici mərkəz və ya qurum Azərbaycandakı bu sahələrin fəaliyyətinin maliyyələşməsinə gizli maliyyə dəstəyi verməməlidir. Demokratiya, insan haqları, media kimi mövzularda ölkəmizdə kimsə nəsə iş görmək istəyirsə, bunu qanunlara söykənərək, şəffaf etməlidir. Təəssüflər olsun ki, bizim bu cür çağrışımıza göz yumdular və belə xoş məramı düzgün anlamadılar. Onlar Azərbaycanda kimisə, nəyisə gizli maliyyələşmək yolunu tutdular. Bu baxımdan da dövlət, məcburiyyət qarşısında qalıb, əlindəki konkret faktlara əsaslanaraq, bu cür məsələlərin üzərinə getməyə başladı. Bilrsiniz ki, "Abzas Media" ilə bağlı da saxlanılanlar olanda hay-küy salırdılar ki, media azadlığı boğulur. Onda dövlət konkret sənədləri ortaya qoydu. Təbii ki, həmin faktlar əldə olunanların hamısı deyil. Sadəcə, onların nəzərinə çatdırıldı ki, dövlətdən gizli maliyyələşmə var. "Toplum TV" ilə bağlı da eyni proses gedib. Biz orada işləyən adamların hamısını qaralaya bilmərik. Müəyyən adamlar harada nə işlə məşğul olmalarının fərqinə də varmayıblar. Əmək müqaviləsini bağlayıb, işlərini görüblər. Bu adamlarla bağlı, yəqin ki, problem də olan deyil. Amma maliyyənin mənbəyi və onun dövlətə bəyan edilməsi kimi məsələ şəffaflıq tələb edir. Təbiidir ki, bunun sənədlərlə sübutu vacibdir. Ona görə də beynəlxalq qurumları təmkinli olmağa dəvət edirik. Şəxsən mən bəzi tanıdığımız adamların da bu işə bulaşdığına görə təəssüflənirəm. Ən əzizimiz olsa belə, onların qanun qarşısında cavab verməsini əngəlləyə bilmərik. Eyni zamanda, bu kimisə narahat etməməlidir. Hətta tənqidçi mövqedə olanlar da bununla razılaşmalıdır ki, maliyyələşmə gizli ola bilməz".
Məhəmmədəli QƏRİBLİ
