Mətin Məmmədli: "Əgər doğrudan da Netanyahu belə bir fikir işlədibsə, hesab edirəm ki, bu fikirlər adekvat deyil"
İsrailin baş naziri Benyamin Netanyahu İsrailin Qəzzada insanlığa qarşı cinayət törətməsi ilə bağlı ittihamlarına cavab olaraq Türkiyə prezidenti Ərdoğana "erməni soyqırımını" inkar etdiyini xatırladıb. Armenpress xəbər verir ki, bu barədə İsrailin baş naziri X mikrobloqunda yazıb.
Erməni mediasına görə, Netanyahu Ərdoğanı bir çox məsələlərdə ittiham edib(?).
Məlumdur ki, Ərdoğan Qəzza zolağında baş verən qırğınlara görə Netanyahu və hökumətini ciddi şəkildə tənqid edib. O, İsrail hakimiyyətinin Qəzza zolağında insanlığa qarşı cinayətlər törətdiyini, vurğulayıb və Netanyahunu Hitlerlə, Mussoloni və Stalinlə eyniləşdirib.
Məsələ burasındadır ki, Türkiyə Prezidenti haqsız danışmayıb. Tarixdə "erməni soyqırımı" deyə bir hadisə baş verməyib, bu, ermənilərin, eləcə də onların havadarlarının uydurduğu mifdir, xəyaldır. Amma dünyanın gözü qarşısında Qəzzada günahsız insanların qanı axır, buna görə beynəlxalq qurumlar səslərini belə çıxarmırlar.
Qəzzada yaşananlar bütün dünyanın gözü qarşısında baş verir, 2 ayda 30 mindən artıq adam ölüb. Halbuki, iki ildir Ukraynada müharibə gedir, amma heç bu qədər adam ölməyib, bu müddətdə həm Ukrayna, həm də Rusiya tərəfdən ümumilikdə 55-60 min adam ölüb. Amma cəmi 2 ayda Qəzzada 30 mindən artıq adam öldürülüb, Qəzza yerlə bir edilib. Əsl genosid, soyqırım budur.
Bu baxımdan, Netanyahunun Ərdoğana verdiyi cavab nə dərəcədə doğru cavabdır? Bu nə dərəcədə məntiqli yanaşmadır?
"Təəssüf ki, son aylar Qəzzada bir insanlıq faciəsi yaşanır"
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli "Bakı-Xəbər"ə şərhində bildirdi ki, erməni mediasnın yaydığı bu xəbər xeyli şübhəli görsənir: "Əvvəla, erməni mətbuatının yazıdıqlarının nə qədər doğru olduğunu demək bir qədər çətindir. İsrail mediasında mənim qarşıma belə bir məlumat çıxmadı. Əgər doğrudan da Netanyahu belə bir fikir işlədibsə, hesab edirəm ki, bu fikirlər adekvat deyil. İlk növbədə o səbəbdən ki, Osmanlı Türkiyəsi ermənilərə qarşı hər hansı bir soyqırım həyata keçirməyib. "Soyqırım"la bağlı məsələlər siyasi məqsədlərlə ayrı-ayrı erməni diaspor qrupları, erməniləri himayə edən güc mərkəzləri, dövlətlər tərəfindən gündəmə gətirilib və bugünə qədər də bu mövzu istismar olunur. Bunun əsası yoxdur, müqayisəlik bir məsələ deyil".
M.Məmmədlinin sözlərinə görə, İsrailin isə Qəzzada etdikləri, burada baş verənlər əslində qeyd edildiyi kimi, bütün dünyanın gözü qarşısında yaşanır. "Təəssüf ki, son aylar Qəzzada bir insanlıq faciəsi yaşanır. İsrail hərbi qüvvələri, İsrail ordusu təəssüf ki, bir sıra hallarda beynəlxalq hüquq normalarına uyğun olmayaraq hərbi əməliyyatlar həyata keçirirlər. İsrailin ən yaxın tərəfdaş dövlətləri belə, İsrail ordusunun Qəzza sektorunda həyata keçirdiyi əməliyyatları tənqid edir və İsraili beynəlxalq humanitar hüququn normalarına riayət etməyə, hətta hərbi əməliyyatları dayandırmağa, Fələstin dövlətinin yaradılmasına mane olmamağa çağırırlar. Yəni İsrailin bu gün sağ radikal hökumətinin fəaliyyəti, xüsusən də Qəzza sektorunda həyata keçirdiyi hərbi əməliyyatlar bir çox dünya dövlətləri, qeyd etdiyim kimi, İsrailə yaxın olan dövlətlər tərəfindən də tənqid olunur. Yaxşı olardı ki, İsrail hökuməti, Benyanim Netanyahu daha çox diqqəti bu tənqidlərə yönəldəydi və öz fəaliyyətinə, Qəzza ilə bağlı İsrail ordusunun həyata keçirdiyi hərbi əməliyyatlara yenidən baxaydı" - deyə M.Məmmədli qeyd etdi.
İradə SARIYEVA
