Abutalıb Səmədov: "Bu dövlətin rəhbərlərinin atacağı imzalara da heç bir etibar yoxdur"
Martın 7-də Azərbaycan və Ermənistan arasındakı sərhəddə Azərbaycan və Ermənistan Baş nazirlərinin müavinləri Şahin Mustafayev və Mher Qriqoryanın sədrliyi altında Azərbaycan və Ermənistan arasında dövlət sərhədinin delimitasiyası üzrə Dövlət Komissiyasının və Ermənistanla Azərbaycan arasında dövlət sərhədinin delimitasiyası və sərhəd təhlükəsizliyi məsələləri üzrə Komissiyanın yeddinci görüşü keçirilib.
Azərbaycan Xarici İşlər Nazirliyinin məlumatında deyilir ki, tərəflər delimitasiya məsələləri üzrə fikir mübadiləsi aparıb, delimitasiya üzrə Dövlət Komissiyalarının birgə fəaliyyəti haqqında Əsasnamə layihəsinin razılaşdırılmasına başlayıb, habelə delimitasiya işlərinin görülməsinin qaydası üzrə müvafiq təlimatların layihələrini müzakirə edib:
"Tərəflər Komissiyaların birgə fəaliyyəti haqqında Əsasnamə layihəsinin razılaşdırmasını ən qısa zamanda başa çatdırmaq barədə sövdələşiblər. Həmçinin komissiyaların növbəti görüşünün keçirilməsinin tarixi və yerini işçi qaydada müəyyən etmək barədə razılığa gəliblər".
Ermənista tərəfi də eyni məzmunlu məlumat yayıb.
Dövlət Komissiyalarının bundan öncə birgə iclası yanvarın 31-də Azərbaycan və Ermənistan arasında sərhəddə baş tutub.
Göründüyü kimi, delimitasiya və sərhəd təhlükəsizliyi komissiyalarının ötən il 30 noyabr, 31 yanvar və bu il mart 7- də görüşü olub. Bir sözlə, indiyədək 7 görüş keçirilib .Ümumi nəticələri necə dəyərləndirmək olar? Bu görüşlərin ümumi prosesə hansısa faydası olubmu?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, delimitasiya və sərhəd təhlükəsizliyinin indiyə qədər keçirilən 7 iclasının ümumi prosesə heç bir faydası olmayıb: "Əksinə, nizamlanma prosesindəki ən böyük problem elə bunlarla bağlıdır. Sülh sazişinin imzalanmasını ləngidən əsas amil sərhədlərin dəqiqləşməməsidir. Komissiyalara hər iki ölkənin baş nazirlərinin müavinləri rəhbərlik edir. İlkin etapda yaxşı işlər görüldü. Bu proses Ermənistanda parlament seçkiləri təyin olunan ana qədər sürətlə getdi. Sonra seçkilər, Ermənistanın ortaya qoyduğu qeyri-konstruktiv mövqe, ardınca Rusiyanın prosesdən kənarda saxlanması vəziyyəti bu həddə çatdırdı. 8 kəndimizi qaytarmaq istəmir, bunun üçün müxtəlif bəhanələr gətirirlər. Delimitasiya məsələsində mütləq 1975-ci il xəritəsini əsas götürməyi tələb edirlər. Bu işdə Avropa ölkələri də onları dəstəkləyir. 1991-ci ildə imzalanmış Almatı bəyannaməsini tez-tez xatırlayırlar. Heç yada salmaq istəmirlər ki, məhz həmin bəyannamənin imzalanmasından dərhal sonra Azərbaycan ərazisinin böyük hissəsi işğal olundu. Onda heç Almatı bəyannaməsi yada düşmürdü. Hesab efirəm ki, komissiyanın işinin bu şəkildə davam etməsi heç bir ciddi nəticəyə gətirib çıxarmayacaq. Nə qədər ki, Ermənistan Zəngəzur dəhlizini ləngitməkdə maraqlıdır, bir o qədər də prosesin uzanması baş verəcək. Ortada 3 tərəfli bəyanat var. Orada tərəflərdən biri də Rusiyadır. Ermənistan Rusiyanı prosesdən tam təcrid edib. Atdıqları imzaya sadiqlik göstərmirlər. Bu dövlətin rəhbərlərinin atacağı imzalara da heç bir etibar yoxdur. Belə ölkə ilə sənəd imzalamaq mənasızdır. Ermənistan öz davranışlarının hansı pis nəticələrə səbəb ola biləcəyini anlamalıdır".
Məhəmmədəli QƏRİBLİ
