Ceyhun Musaoğlu: "Jurnalistlərin güzəştli şərtlərlə pensiyaya çıxmaq hüququ müzakirəyə çıxarılmalıdır"
Azərbaycanda pensiya yaşının yüksək olması zaman-zaman müzakirə olunan məsələlərdəndir. Qeyd edək ki, hazırda pensiya yaşı həddi kişilərdə 65 il, qadınlarda isə 63 il 6 aydır. Bununla yanaşı, müəyyən sahələrdə çalışanların digərlərindən daha tez pensiyaya çıxmaq hüququ var. Söhbət güzəştli şərtlərlə pensiya almaqdan gedir.
Məlumat üçün bildirək ki, Nazirlər Kabineti "Güzəştli şərtlərlə yaşa görə əmək pensiyası hüququ verən istehsalatların, peşələrin, vəzifələrin və göstəricilərin Siyahısı"na dəyişiklik edib. Yeni dəyişikliklərlə güzəştli şərtlərlə pensiyaya çıxma hüququ olan vətəndaşların siyahısı genişləndirilib. Belə ki, neft mədənlərində, neftin saxlanılması və ötürülməsi sahəsində nəzarət-ölçü cihazları və avtomatika qurğularının təmiri və xidməti işləri ilə məşğul olan nəzarət-ölçü cihazları və avtomatika üzrə çilingərlər, əsas istehsalat sahələrində neft-mədən avadanlıqlarının, kompressor qurğularının təmiri ilə bilavasitə məşğul olan təmirçi çilingərlər, əmtəə operatorları, nasos qurğularının maşinistləri, dəniz özüllərində, estakadalarda stasionar kranların kran maşinistləri, qazın yığılması üzrə operatorlar, qazpaylayıcı stansiyanın operatorları daha tez pensiyaya çıxa biləcəklər. Həmçinin, atalara da uşaqlara görə güzəştli şərtlərlə yaşa görə əmək pensiyası almaq hüququ verilir.
Maraqlıdır, güzəştlə pensiyaya çıxmaq hüququ olanların siyahısına jurnalistləri də daxil etmək olarmı? Onu da nəzərə almaq lazımdır ki, Media Reyestrində qeydiyyatdan keçən jurnalistlərin sayı elə də çox deyil. Üstəlik, jurnalistlərin hamısı bir anda təqaüdə çıxmır. Danılmaz faktdır ki, jurnalistlər böyük məbləğdə əmək haqqı alan kateqoriya sayılmır. Belə olan halda onların pensiyaları da o qədər çox deyil. Ancaq gördükləri iş göz qabağındadır. Nəzərə almaq lazımdır ki, media təmsilçiləri çox mühüm funksiyanı yerinə yetirir. Çünki onların işləri gərgindir. Qeyd edək ki, bütün dünya ölkələri jurnalist əməyini çətin əmək kateqoriyasına aid edir.
"Aidiyyəti qurumlar çətin peşədə çalışan jurnalistləri də güzəştli şərtlərlə pensiyaya çıxmaq hüququ olanların siyahısına daxil etməlidir"
Mətbuat Şurasının üzvü, Jurnalist Ekspert Mərkəzinin (JEM) sədri Ceyhun Musaoğlu "Bakı-Xəbər"-ə açıqlamasında qeyd etdi ki, jurnalistlərin güzəştli şərtlərlə pensiyaya çıxmaq hüququ müzakirə olunmalıdır. Media qurumları bu məsələ ilə bağlı bir araya gəlib, məlum mövzunu gündəmə gətirməlidir: "Danılmaz faktdır ki, jurnalistlərin fəaliyyəti daim risqli fəaliyyət sferasına aiddir. Bütün dünyada aparılan araşdırmalar göstərir ki, jurnalistlərin həyatı hər zaman təhlükədə olub. Bugünə kimi pensiyaya çıxan jurnalistlərin həyat şəraitinə nəzər salanda görürük ki, qeyd edilən kateqoriyaya aid olunanlar müəyyən güzəştlərdən yararlanmalıdır. Pensiya məsələsi olduqca ciddidir. Bu gün jurnalistlərin aldığı əmək haqqı heç kimə sirr deyil. Bu məvaciblə qələm əhlinə çox az pensiya kəsiləcək. Onu da deyim ki, jurnalistlərin ömrü elə də uzun olmur. Çünki bu peşənin sahibləri hər daim stress içində olur. Yazmaq, oxumaq, çəkmək və digər işləri görmək əslində ən çətin peşələrdən biri sayılır. Müharibə zamanı həyatını itirən jurnalistlərimiz də var".
Həmsöhbətimiz onu da əlavə etdi ki, Media Reyestrindən keçən jurnalistlərin sayı çox deyil: "Danılmaz faktdır ki, reyestrə qədər əksər media orqanlarında jurnalistlər qonorarla işləyirdi. Medianın İnkişafı Agentliyi yaranandan sonra bu sahədə xeyli dəyişiklik oldu. Redaksiyalar jurnalistləri qonorarla deyil, rəsmi əmək haqqı ilə işə götürdü. Reyestrə daxil olan jurnalistlər güzəştli pensiyaya çıxmaq hüququndan yararlana bilər. Hesab edirəm ki, aidiyyəti qurumlar çətin peşədə çalışan jurnalistləri də güzəştli şərtlərlə pensiyaya çıxmaq hüququ olanların siyahısına daxil etməlidir".
Günel CƏLİLOVA
