Faiq Ələkbərli: "...UNESCO-nun Ermənistana bu məsələ ilə bağlı hələ də missiya göndərməməsi beynəlxalq müstəvidə qınaq obyektinə çevrilməlidir"
"Ermənistan ərazisində yerləşən Azərbaycanın İslam tarixi-mədəni irsinin məhv edilməsi böyük məyusluq doğurur".
Bu barədə Azərbaycan Prezidenti İlham Əliyevin Bakıda keçirilən "Müxtəlifliyin qorunması: 2024-cü ildə İslamofobiya ilə mübarizə" mövzusunda beynəlxalq konfransın iştirakçılarına məktubunda bildirilib.
Prezident Əliyev məktubunda diqqətə çatdırıb ki, Azərbaycan UNESCO-ya müraciət edərək Ermənistanda illər ərzində dağıdılmış mədəni və dini abidələrimizin vəziyyətinin qiymətləndirilməsinin aparılması məqsədilə bu ölkəyə texniki missiyanın göndərilməsinə çağırış edib. Əfsuslar olsun ki, UNESCO indiyə kimi bu çağırışa cavab verməyib.
"UNESCO tərəfsiz və ədalətli olsaydı çoxdan Ermənistana Azərbaycanın tələb etdiyi missiyanı göndərərdi"
AMEA-nın fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli baki-xeber.com-a şərhində bildirdi, Azərbaycanın indiki Ermənistana missiya göndərmək tələbini UNESCO-nun hələ icra etməməsi və bu problemin ölkə başçısının məktubunda bir daha vurğulanması dünya dövlətlərinə ciddi bir mesajdır. F.Ələkbərli vurğuladı ki, Ermənistanda Azərbaycan xalqının əsrlər boyu yaratdığı islam dini abidələrinin məhv edilməsi faktına islam dövlətləri də, dünya ictimaiyyəti də biganə qalmamalıdır. "Bizə bir məsələ dəqiq məlumdur ki, Qərb dövlətləri və onların əsas rol oynadığı beynəlxalq təşkilatlar, o cümlədən də UNESCO Azərbayacana qarşı hər zaman ədalətsiz mövqe tutub. Azərbaycanla yanaşı Türkiyəyə və digər türk-müsəlman dövlətlərinə qarşı tarixi-mədəni abidələrin qorunması ilə bağlı zaman-zaman haqsız ittihamlar səsləndiriblər. Xüsusilə də Azərbaycana qarşı əsassız ittihamlar irəli sürüblər ki, guya Azərbaycanda xristian abidələri yaxşı qorunmur. Halbuki, ölkəmizdə bütün xristian abidələri lazımı şəkildə qorunur.
Azərbaycanı haqsız yerə ittiham edən Qərb təşkilatları, eləcə də UNESCO nədənsə heç vaxt Ermənistanda Azərbaycan türklərinə məxsus islam dini abidələrinin taleyi ilə maraqlanmayıb. Qərbi Azərbaycan ərazisi bizim tarixi torpağımızdır, burada həm islam dininə, həm də ondan əvvəlki dönəmlərə aid abidələrimiz olub. Türk xalqı bu torpaqlarda çox möhtəşəm abiələr yaradıb. Uzun əsrlər böyu indiki Ermənistan ərazisində böyük mədəniyyət formalaşdıran Azərbaycan türklərinin mədəni, tarixi, dini irsi məhv edilməyə başladı. 1918-ci ildə Azərbaycan ərazisində Ararat Respublikası elan olunduqan sonra, eləcə də onun davamı olan Ermənistan SSRİ dövründə və indiki zamanda qədum türk, islam abidələri vəhşiliyə, barbarlığa məruz qaldı. Xüsusilə də Ermənistanın dövlət müstəqilliyini elan etdiyi 1991-ci ildən sonra bu özünü daha çox büruzə verdi. Üstəlik də, nəinki işğal etdiyi ərazilərimizdə, eləcə də mövcud olduğu qədim türk torpaqları olan indiki Ermənistanda da islam və türk abidələrinə qarşı daim vəhşilik, barbarlıq törədilib"-deyə F.Ələkbərli bildirdi.
F.Ələkbərlinin sözlərinə görə, Ermənistan ərazisində yerləşən Azərbaycanın İslam tarixi-mədəni irsinin bu şəkildə vandalizmə məruz qalması bütün dünyanı narahat etməlidir. "Hesab edirəm ki, UNESCO-nun Ermənistana bu məsələ ilə bağlı hələ də missiya göndərməməsi büynəlxalq müstəvidə qınaq obyektinə çevrilməlidir.
Cənab Prezidentin Bakıda keçirilən "Müxtəlifliyin qorunması: 2024-cü ildə İslamofobiya ilə mübarizə" mövzusunda beynəlxalq konfransın iştirakçılarına məktubunda bu məsələni bir daha gündəmə gətirməsi təqdirəlayiq haldır. Bu məsələ zaman-zaman qaldırılıb. Amma Azərbaycan Prezidenti bu məsələni daha israrla, daha məntiqli şəkildə səsləndirib. Bu, UNESCO-ya da, onu idarə edən qurumlara da ünvanlanan bir mesajdır. Eyni zamanda da bu, UNESCO-nun ermənipərəstliyini, antiazərbaycan mövqeyini bir daha ifşa edir. UNESCO tərəfsiz və ədalətli olsaydı çoxdan Ermənistana Azərbaycanın tələb etdiyi missiyanı göndərərdi. Demək ədalətli və obyektiv, tərəfsiz ola bilmir.
Doğrudan da, həmişə haqq-ədalətdən danışan Qərb dövlətləri, beynəlxalq təşkilatlar, o cümlədən də UNESCO belə ədalətlidirsə, nədən Ermənistanda islam və türk abidələrinin dağdılması məsələsinə biganədirlər? Ən azından, burada UNESCO-nun tərkibində bir beynəlxalq komissiya yaradılmalıdır. Bu komissiya orada hansı vandalizmin olduğunu aşkara çıxarmalıdır. İndiyə qədər ermənilər bizə məxsus irsi saxtalaşdıra bildikləri qədər saxtalaşdırıblar, saxtalaşdıra bilmədiklərini də məhv ediblər"-deyə F.Ələkbərli qeyd etdi.
İradə SARIYEVA
