İbrahim Rüstəmli: "Sərhədçilərin aereportdan çıxarılması Ermənistanın Qərb qarşısında üzərinə götürdüyü öhdəliklərdən biridir və İrəvan bunun öhdəsindən gələcək"
Artıq bu məsələ istiqamətində Ermənistan konkret addımlar atmağa başladı. Ermənistan Zvartnots hava limanından rus sərhədçilərin çıxarılması ilə bağlı Rusiyaya rəsmi məktub göndərib.
Bunu Ermənistan Təhlükəsizlik Şurasının katibi Armen Qriqoryan deyib: "Hakimiyyətin mövqeyi ondan ibarətdir ki, hava limanında Ermənistan sərhəd qoşunları xidmət göstərməlidir".
Rusiya bu tələbi yerinə yetirəcəkmi və yetirməsə nə baş verə bilər?
Hərbi-siyasi şərhçi, ehtiyatda olan polkovnik-leytenant İbrahim Rüstəmli "Bakı-Xəbər"ə açıqlamasında bildirdi ki, hazırda bütün Avropa Rusiyaya qarşı bir müharibə mövqeyində dayanıb: "Avropa Rusiyanı bütün dünayadan təcrid edib, onu çıxılmaz vəziyyətə salmaq istəyir. Bu mənada Cənubi Qafqaz da Qərbin xüsusi diqqət mərkəzindədir. Onlar nə yolla olursa-olsun, Rusiya sərhədlərinə yaxınlaşmaq istəyirlər. Bunun üçün onlar bu çoğrafiyada olan ölkələri öz tırəflərinə çəkmək istəyirlər. Gürcüstan və Ermənistan açıq şəkilfə Qərbə meyllənib. Çünki Gürcüstanın ərazi bütövlüyü problemi var. Onu da Rusiyaya görə itirib. Ermənistan da istər iqtisadi, istərsə də siyasi baxımdan Qərbi seçib. Paşinyan 44 günlük müharibənin gedişində hər gün bir neçə dəfə Putinə zəng edirdi. Ondan gedən hərbi əməliyyatlara müdaxiləsi tələb olunurdu. Ancaq Putinin bu məsələdə tutduğu mövqe Ermənistanda böyük xəyal qırıqlığı yaratdı. Birinci Qarabağ müharibısi zamanı bizim ərazilərimizin böyük hissəsi Rusiyanın dəstəyi ilə işğal olundu. Hətta o dövrdə də Azərbaycan ərazisini işğalçılardan təmizləyə bilərdi. Amma Rusiya amili buna imkan vermirdi. Artıq Ermənistan açıq şəkildə Rusiyadan üz döndərib, Qərbə meyllənib. Onların Rusiya ilə bağlı hədəfləri puça çıxıb. Ermənistan hakimiyyətində təmsil olunanların böyük əksəriyyəti Corc Sorosun maliyyəsibilə ortaya çıxan adamlardı. Bunlar Qərb qarşısında öhdəlik götürüblər. Müxtəlif missiyalar adı ilə əslində Ermənistana qoşun yeridirlər. Əslində Ermənistan Rusiyanın şah əsəridir. Onu heçdən yaradan məhz Rus İmperiyası olub. İndi isə Ermənistan öz yaradıcısına qarşı çıxır. Ukrayna hazırda ortada qalıb. Qərb ona lazımi dəstəyi göstərmir. ABŞ ultimatum verdi ki, Qərb Ukraynaya yardım etməsə, özü çox böyük problemlərlə üzləşəcək. Sərhədçilərin aereportdan çıxarılması Ermənistanın Qərb qarşısında üzərinə götürdüyü öhdəliklərdən biridir. Düşünürəm ki, Ermənistan bunun öhdəsindən gələ biləcək. Bu da onların arasındakı ziddiyyəti tam dərinləşdirəcək. Rusiyanın əlini Ermənistanın üstündən çəkməsi bizim üçün xüsusi əhəmiyyət daşıyır. Azərbaycan bu vəziyyətdən maksimum istifadə etməlidir".
Bir neçə gün əvvəl Rusiya Xarici İşlər Nazirliyinin mətbuat katibi Mariya Zaxarova N.Paşinyana və hökumətinə bu mövzu ilə bağlı cavab verib. O bildirib ki, Zvartnots aeroportu ilə bağlı rəsmi İrəvandan heç bir tələb gəlməyib, erməni rəsmilərinin açıqlamaları isə faktların təhrif edilməsidir. Bununla yanaşı, rusiyalı diplomat Paşinyan hökumətinə də mesaj göndərib. XİN rəsmisi açıqlamasında qeyd edib ki, Mehri marşrutuna rusiyalı sərhədçilərin nəzarət etməsi optimal qərar ola bilər. Bu isə o deməkdir ki, Kreml sərhədçilərini Ermənistandan çıxarmaq kimi fikri nəzərdən keçirmir. Əksinə, missiyanı genişləndirərək, daha çox nəzarəti öz üzərinə götürmək fikrindədir. Moskvanın bu cavabı həm erməni hökumətinin baş nazirinə, Fransaya və Aİ müşahidəçilərinə kiçik xəbərdarlıq kimi qiymətləndirilə bilər. Əgər hadisələr başqa məcrada inkişaf etsə, rəsmi İrəvan Rusiya sərhədçilərinə qarşı mənfi münasibət sərgiləsə, çox güman, Kremlin sərt cavabı ilə üzləşəcək.
Məhəmmədəli QƏRİBLİ
