Xarici siyasətində çoxsaylı uğursuzluqlara məruz qalan Fransa prezidenti Emmanuel Makron yenidən diqqət mərkəzində yer almaq üçün absurd fikirlərlə çıxış etməkdədir. Bu isə reallıqda Fransanın dünyada məhv olan nüfuzuna yeni böyük zərbələr vurur.
Bu hal, xüsusən də Makronun Rusiyaya qarşı vuruşmaq üçün Ukraynaya qoşun göndərmək haqqında fikirlər səsləndirməsindən sonra özünü daha qabarıq büruzə verir.
Qeyd edək ki, Qərb ölkələri özləri də Makronu belə cəfəng fikrə görə sərt şəkildə qınayır, onun bu xüsusda yalan danışdığını bildirirlər. Rusiya Xarici Kəşfiyyat Xidmətinin rəhbəri Sergey Narışkin isə bir daha vurğulayır ki, Emmanuel Makronun Ukraynaya NATO hərbçilərinin göndərilməsi ilə bağlı açıqlamaları olduqca təhlükəlidir. O bildirib ki, sözügedən bəyanat Fransa prezidentinin siyasi məsuliyyətsizliyini göstərir. Narışkin əlavə edib ki, Qərbin bu kimi söyləntiləri dünyanı nüvə müharibəsinin astanasına gətirir. Britaniyanın "Financial Times" qəzeti yazır ki, Ukraynaya NATO əsgərlərinin göndərilməsinin mümkünlüyünü etiraf edən Fransa prezidenti Emmanuel Makronun bəyanatı alyans üzvlərini çətin vəziyyətə salıb və aralarındakı strateji ziddiyyətləri üzə çıxarıb. Məqalədə vurğulanır ki, bir çox NATO üzvləri tamamilə haqlı olaraq öz hərbi qüvvələrini Ukraynaya göndərməklə Rusiya ilə birbaşa qarşıdurma yolunu tutacaqlarından ehtiyat edirlər. Fransanın "Le Figaro" portalının oxucuları isə makronun özünə bəraət qazandırmaq cəhdlərini müzakirə ediblər: "Rusiyalılar, qulaq asın, indi o, başqa bir şey deyə bilər, amma heç kim onu ciddi qəbul etməyəcək". Oxucular həmçinin vurğulayıblar ki, Makronun fikirləri iki gündən bir dəyişir və onları Makronun sabah hansı fikirdə olacağı maraqlandırır: "Makronun ən ciddi problemi danışmazdan əvvəl düşünməməsidir". Elə indi də Makron köhnə ampluasındadır. Belə ki, o, Çexiyanın baş naziri Petr Fiala ilə Ukraynanın hərbi səylərini dəstəkləmək üçün Avropa İttifaqına daxil olmayan ölkələrdən yüz minlərlə artilleriya mərmisinin alınmasını müzakirə etmək üçün Praqaya gedib. Maraqlıdır ki, Avropa paytaxtlarını gəzərkən və Fransa hərbçilərini Ukraynaya göndərəcəyini vəd edərkən Makron öz ölkəsi daxilindəki problemləri tamamilə unudub. Keçən ay fermerlər tərəfindən böyük magistral yolları və böyük şəhərləri bağlayan genişmiqyaslı etirazlar baş tutub. Rusiya Elmlər Akademiyasının Avropa İnstitutunun aparıcı elmi işçisi Sergey Fyodorov fransız fermerlərinin öz çıxışları ilə inqilab etmədiklərini, lakin onların Parisdə hökumətə böyük problemlər yaşatdığını vurğulayır: "Yeni baş nazir Qabriel Attal fermerləri Paris və digər böyük şəhərləri blokadaya almağı dayandırmağa inandıra bildi, etiraz hərəkatı səngidi, lakin buna baxmayaraq, problem tam həll olunmayıb. Bəzi fermerlər hakimiyyətdən konkret addımlar tələb edərək, nümayişləri davam etdirəcəklərinə söz verirlər". O hesab edir ki, Fransa hökuməti fermerlərə verdiyi vədləri yerinə yetirmək üçün çoxlu pul xərcləməli olacaq. Ancaq burada ciddi problem var, ölkənin pulu yoxdur. Sergey Fyodorov bildirir: "Fermerlər üçün milyardlar tapmaq çətin olacaq, lakin Ukrayna üçün inanılmaz şəkildə milyardlar tapılır. Paris Rusiyanın Ukraynadan sonra guya Avropanı ələ keçirəcəyi rəvayətindən istifadə edir və bununla da əhalini ölkəni inkişaf etdirmək üçün deyil, Kiyevə kömək etmək üçün pul xərcləmək lazım olduğuna inandırmağa çalışır". Politoloq əlavə edib ki, bu cür ritorika Makron üçün çox vacibdir: "O, özünü Avropa şahininə çevirməyə çalışır. Reytinqlərinizi yüksəltmək və daxili siyasətdəki problemlərdın diqqəti yayındırmaq üçün xarici siyasətdə, lazım olarsa, absurd mövqe sərgiləmək olar. Makron, həqiqətən də, Avropa Parlamentinə qarşıdan gələn seçkilərdə uduzmaq istəmir, ona görə də bir müddət unutqanlıqdan sonra informasiya sahəsində fəal olmağa başladı. Bununla belə, Makronun partiyasının uduzmaq ehtimalı var. Proqnozlara görə, əsas müxalifət partiyası olan "Milli birlik" prezidentin partiyasını 10 faiz qabaqlayır".
Fyodorov vurğulayıb ki, Makronun bütün vədləri onun öz siyasi məqsədlərinə çatmasına yönəlib: "Nə qədər ki, Ukraynanı dəstəkləmək, xarici siyasət meydanında oynamaq ona sərfəlidir, bunu edəcək. Fermerlərdə də belə olacaq: etiraz edənə qədər hər şey olduğu kimi qalacaq, onlar yenidən küçələrə çıxanda yalan vədlər yağacaq". Digər politoloq Andrey Şkolnikov isə bildirir ki, Makronun hakimiyyəti dövründə Fransa Qərbi Afrikanın, demək olar ki, bütün ərazisində təsirini itirib və indi Paris öz səhvlərinin nəticələrini Moskvanın üzərinə atmaq istəyir: "Fakt budur ki, Makron, əslində Fransa iqtisadiyyatının əsasını, özülünü sarsıtdı. Nəticələri indi özünü göstərməyəcək, bir az sonra isə qabarıq hiss olunacaq. Artıq ölkə daxilində bunu başa düşməyə başlayırlar. O səbəbdən indi Makron diqqəti xarici məsələlərə yönəltməyə çalışır". Onun sözlərinə görə, Fransa lideri Afrikada güclənən Rusiyadan ən azı nəyisə geri almağa çalışır: "Makron ümid edir ki, Rusiyaya qarşı Ukraynada təzyiq artsa, Kreml Afrikada zəifləyəcək, Fransa da ora qayıda biləcək. Anma bu, çətin ki, baş versin".
Tahir TAĞIYEV
