Fəzail Ağamalı: "Biz həmin kəndləri hərbi yolla azad etməliyiksə, nədən gözləməliyik?"
Erməni mediasında millət vəkili Fəzail Ağamalıya istinadən məlumat yayılıb. Bildirilir ki, deputat Aərbaycanın anklav 8 kəndini hərbi yolla geri qaytarmağı təklif edib. Biz deputatın özü ilə əlaqə saxladıq və onun belə fikirlər səsləndirib-səsləndirmədiyi ilə maraqlandıq.
Millət vəkili "Bakı-Xəbər"ə açıqlamasında belə çağırış etdiyini təsdiqlədi və erməni mediasında yayılan məlumatın yalan olmadığını qeyd etdi: "İşğal altında olan 8 kəndimizi də torpaqlarımıza birləşdirməliyik. Ermənistan Fransa və Yunanıstanla alyans yaradaraq onlardan silahlanmaq üçün istifadə etməyə çalışır. Ermənistan hakimiyyətdə olanlardan başlayaraq sadə vətəndaşa qədər revanşist düşüncələrlə Azərbaycana qarşı müharibəyə hazırlaşmaqdadırlar. Azərbaycan müstəqilliyi, suverenliyi uğrunda mübarizə aparır. Biz sona qədər gedəcəyik. Heç bir qüvvənin qarşısında təslim olmayacağıq. Nə qədər Ermənistan güclü şəkildə silahlanmayıb, biz hərbi əməliyyat aparıb işğal altında olan 8 kəndimizi də torpaqlarımıza birləşdirməliyik. Düşüncələrimə görə, hadisələrin gedişi heç də xoşagələn deyil. Cənublu soydaşlarımıza müraciət edərək deyirəm ki, Vətən müharibəsində olduğu kimi, müxtəlif ölkələrdən İran vasitəsilə Ermənistana aparılan silahların qarşısını almaq üçün iradələrini ortaya qoysunlar. Azərbaycanın apardığı siyasət sülhpərvər, bəşəri dəyərlərə söykənən siyasətdir".
Deputat qeyd etdi ki, erməni öz xoşu ilə torpağı qaytarmırsa, biz nə etməliyik? Onun sözlərinə görə, Ermənistan sözdə sülhə meylli olduğunu göstərir, ancaq əməldə isə müharibəyə hazırlaşır: " Son 200 ildə Ermənistan bizim torpaqlarımızım zəbt edib, özünə süni dövlət yaradıb. 2020-ci ilin sonuna qədər bir qarış da olsun torpağımızı sülh yolu ilə geri qaytarmayıb. Əminəm ki, bu kəndləri də qaytarmayacaq. Çünki erməni xisləti bunu diqtə edir. Onlar torpaqıarı işğal edib ki, əlində saxlasın. Vətən müharibəsində biz torpaqlarımızın mütləq əksəriyyətini işğaldan azad etdik, separatçı xunta rejiminə son qoyduq, Ermənistana ağır sarsıdıcı zərbələr vurduq. Özünə gələn kimi silahlanmağa başlayıb. 8 kəndi qaytarmaq istəmirsə, biz onu Ermənistana verməliyik? Biz həmin kəndləri hərbi yolla azad etməliyiksə, nədən gözləməliyik? Bu ölkə sürətlə silahlanırsa, sonra bizim həmin əraziləri azad etməyimiz çətin olacaq. Belə olsa biz az itki vermiş olarıq. Mənim söylədiyim fikirlərin fəlsəfəsində həm də bu amil dayanır".
Məhəmmədəli QƏRİBLİ
