Elxan Şıxəliyev : "Bu təzadlı yanaşmalar, baş nazirin bir şey, qərargah rəisinin başqa söz deməsi onu göstərir ki…"
Ermənistan Silahlı Qüvvələrinin Baş Qərargah rəisi, general-leytenant Edvard Asryan "Yerablur" panteonunda jurnalistlərlə söhbətində deyib ki, Ermənistan Silahlı Qüvvələri düşmənin hərəkətini izləyir, hazırda heç bir cəmləşmə yoxdur.
O, Azərbaycanın sərhədə qüvvə toplamadığını bildirib. "Mən əməliyyat şəraitini nisbətən stabil qiymətləndirirəm", - deyə Asryan bildirib. Azərbaycan mövqelərinin Nerkin Hənd kəndinə yaxın yerləşməsinə gəlincə, Baş Qərargah rəisi jurnalistlər arasında maarifləndirici proqram keçirmək qərarına gəlib və təmas xəttinin nə olduğunu izah etməyə başlayıb. General deyib:
"Təmas xətti elə bir quruluşdur ki, orada həm bizim, həm də düşmən tərəfində mövqelər yerləşir və əgər düşmənin 20 mövqeyi varsa, yəqin ki, bizim tərəfdə də o qədərdir, onların sayını açıqlamayacağıq".
Maraqlıdır, Ermənistan bir tərəfdən təbliğat aparır ki, Azərbaycan müharibəyə hazırlaşır, Ermənistana hücum edəcək, indi də qərargah rəisi kimi rəsmi adam deyir ki, sərhəddə Azərbaycan tərəfdən qoşunların toplantısını görmür. Bununla həmin adam faktiki olaraq Ermənistanın apardığı yalan təbliğatı ifşa etmiş olubmu?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, Ermənistanın baş naziri Azərbaycanın müharibəyə hazırlaşdığını deyib: " ABŞ - ın hərbi mərkəzlərinin informasiya cəbhəsində belə bir məlumat var idi. Dünyada mümkün ola biləcək 10 münaqişə ölkəsi varsa, onun biri də Azərbaycanla Ermənistandır. Avropa İttifaqının rəsmilərindən Cozef Borrel də Azərbaycanın müharibəyə hazırlaşdığını səsləndirmişdi. Amma Ermənistanın Silahlı Qüvvələrinin Baş Qərargah rəisi deyir ki, sahədə heç bir müharibə şəraiti yoxdur. Təbii ki, bu bütün siyasətçilərin yalan dediyinin sübutudur. Demək ki, müharibə etmək istəyən tərəf siyasilərdir. Xüsusən də ABŞ Fransanın əli ilə öz strateji, geosiyasi niyyətlərini Avrasiya qitəsində həyata keçirmək üçün planlar qurur. Yəni müharibənin olmasını onlar istəyirlər, bilmirlər nə etsinlər ki, müharibə baş versin. Ona görə də, Ermənistanı hazırlayırlar, silahlandırırlar. Onun səbəbini də elə modelləşdirməlidirlər ki, Ermənistan Azərbaycanı mühariyə təhrik edəcək addım atsın. Belə çıxır ki, müharibə istəyən tərəf Azərbaycan deyil. Ermənistanı elə bir vəziyyətə gətirəcəklər ki, ya Azərbaycana, ya da Rusiyaya qarşı müharibə yaransın. Müharibələr üçün bir səbəb olur. kazusbelli deyilən bir anlayış var. Necə ki, Paşinyanın Şuşada sərxoş halda rəqs etməsi, "Qarabağ Ermənistandır" deməsi müharibə səbəbi, kazusbelli hesab olundu. Halbuki, məsələni biz sülh yolu ilə həll etmək istəyirdik. Sonra Şahramanyan dövlət yaratdığı üçün Paşinyanın da ona təbrik yazması antiterrora səbəb oldu. Eynisini Ermənistan üzərinə edəcəklər, bu səbəbi yaradacaqlar ki, müharibə olsun. Siyasilər buna çalışsa da, təbii ki, hərbiçilər də müharibə istəmirlər. Siyasilərin də istəməsi kimə tabedirlərsə, onların siyasi sifarişlərini həyata keçirməyə görədir. Ermənistan artıq elə bir yolu seçib ki, sülhün olması onun iqtidarında deyil. Ermənistan baş nazirinə sülh sazişini kimsə imzalatmasa, xüsusən də Fransa, bu saziş imzalanmayacaq. Bu təzadlı yanaşmalar, baş nazirin bir şey, qərargah rəisinin başqa söz deməsi onu göstərir ki, sahədə silahlı qüvvələr müharibə tərəfdarı deyillər, siyasilər isə müharibənin olmasını istəyirlər. Biz də siyasilərin nə dediklərinə daha diqqətlə yanaşmalıyıq
Məhəmmədəli QƏRİBLİ
