Məhəmməd Əsədullazadə: "Ermənistanın militarist siyasəti ona baha başa gələcək"
Ermənistan vətəndaşlarının əksəriyyəti yaxın gələcəkdə Azərbaycanla müharibə təhlükəsini real hesab edir. Bunu "Gallup" Beynəlxalq Assosiasiyasının keçirdiyi sorğunun məlumatları təsdiq edir. Sorğunun məlumatlarını bazar ertəsi təşkilatın direktoru Aram Navasardyan təqdim edib.
"Yaxın gələcəkdə Azərbaycanla yeni müharibə təhlükəsi görüb-görmədiklərini soruşduqda respondentlərin 55,1%-i qəti şəkildə bəli, 25,5%-i böyük ehtimalla bəli 9,8%-i yox, 7,2%-i isə qətiyyən yox cavabını verib. Vətəndaşlarımızın demək olar ki, 80 faizi yaxın gələcəkdə müharibənin başlaya biləcəyinə inanır", - deyə Aram Navasardyan bildirib.
Onun sözlərinə görə, Ermənistanla Fransa arasında fəal hərbi əməkdaşlığı respondentlərin 56,2%-i tam dəstəkləyir, 25,9%-i müsbət, 4,7%-i kifayət qədər mənfi, 9,6%-i isə mənfi rəy verib. Respondentlərin daha 3,3%-i suala cavab verməkdə çətinlik çəkib. Respondentlərin 46%-i hesab edir ki, Ermənistan Fransadan hərbi-siyasi yardım ala bilər.
Burada diqqəti çəkən məqam odur ki, sorğu iştirakçılarımım 80 faizi Azərbaycanla tezliklə müharibənin olacağını hesab edir. Eyni zamanda sorğu iştirakçılarının 80 faizi Fransa-Ermənistan münasibətlərinin yaxşı olduğunu hesab edir. Görünən odur ki, əhalinin 80 faizi 2 məsələdə eyni mövqedən çıxış edir. Yəni Fransaya normal münasibət bəsləyən kəsim eyni zamanda Azərbaycanla müharibə istəyir. Deməli, əhalinin 80 faizi Fransanın təsiri altındadır. Demək Ermənistan cəmiyyətini Azərbaycanla müharibəyə təhrik edən Fransadır.
"Fransa müdafiə nazirinin İrəvana səfəri, imzalanan sənədlər ölkədə revanş əhval-ruhiyəsini gücləndirir"
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin fikrincə, Fransa-Ermənistan əlaqələrinin hazırkı vəziyyəti erməni tərəfinin silahlandırılmasına təkan verir: "Çünki Fransa sistemli şəkildə Ermənistanda işləyir. Parisin təbliğat maşını bütün gücü ilə orada fəaliyyətdədir. Bütün bunlarda erməni ictimai rəyinə birbaşa təsir edir. Əvvəl Ermənistan cəmiyyəti çıxış yolunu Rusiyada görürdüsə, indi Fransaya xilaskar kimi yanaşırlar. Revanşist qanad Fransa vasitəsi ilə Qarabağa hərbi hücumu xəyal edir. Bir sözlə, proseslər Cənubi Qafqazda müharibənin yenidən başlayacağı tezisini ortaya atır. Çünki Fransa açıq şəkildə Ermənistanı silahlandırır. Fransa müdafiə nazirinin Ermənistana səfəri, imzalanan sənədlər ölkədə revanş əhval-ruhiyəsini gücləndirir. Çünki bütün bunlar yeni müharibə ehtimalını gündəmə gətirir. Məhz bu səbəbdən Fransanı dəstəkləyən əhali həm də yeni müharibənin başlanması mövqeyindən çıxış edir. Erməni əhalisində müharibə istəyini yenidən gündəmə gətirir. Baxmayaraq ki, İkinci Qarabağ müharibəsində Ermənistan böyük məğlubiyyətə uğrayıb. 4 min erməni əsgəri məhv eilib və 13 min erməni əsgəri fərarilik edib. Baxmayaraq ki, antiterror əmsəliyyatları nəticəsində Qarabağda suverenliyimiz tam bərpa olunub. Belə bir vəziyyətdə sorğu iştirakçılarının 80 faizi müharibə variantını gündəmə gətirirsə, bu, ciddi düşünməyə əsas verir. Ancaq bütün hallarda yeni müharibə Ermənistan üçün fəlakətli olacaq. Fransa Ermənistanı xilas edə bilməyəcək. Ermənistan kimi imkanları məhdud olan dövlət silahlanma yarışında duruş gətirə bilməz. Ermənistanın militarist siyasəti ona baha başa gələcək".
Vidadi ORDAHALLI
