Əli Orucov: "Separatçı liderlərin azad olunması ilə bağlı Paşinyandan gözləntilər sadəcə axmaqlıqdır"
"Gallup" Beynəlxalq Assosiasiyası fevralın 26-28-də Ermənistanda 1100 nəfər arasında sorğu keçirib. Sorguda respondentlərə bir neçə sual ünvanlanıb.
Suallardan biri də bu, olub ki, Ermənistan Respublikası hökuməti "Artsax"ın "hərbi-siyasi rəhbərliyini" Azərbaycan əsirliyindən azad etmək üçün müvafiq addımlar atırmı?
Sorğunun nəticələrinə görə, respondentlərin 13,5 faizi belə cavab verib: çox güman ki, bəli, 12,4 faiz – mütləq bəli, 15 faiz – çox güman ki, yox, 44,4 faiz – qətiyyən yox. Ümumilikdə, üst-üstə rəyi soruşanların 59 faizi hesab edir ki, Paşinyan separatçıların azad edilməsi üçün lazımı qədər fəaliyyət göstərmir.
Maraqlıdır, Paşinyan axı necə onları azad edə bilər? Ümumiyyətlə, bu, indiki şəraitdə Paşinyan üçün mümkündürmü? Bütövlükdə, Paşinyan hansısa formada separatçıları azad edə bilərmi?
"Çünki bu, sırf Azərbaycanın səlahiyyət dairəsində olan məsələdir"
Sözügedən məsələ ilə bağlı "Bakı-Xəbər"ə açıqlama verən AMİP funksioneri Əli Orucov hesab edir ki, separatçı liderlərin azad olunması ilə bağlı Paşinyandan gözləntilər sadəcə axmaqlıqdır: "Buna başqa ad verməkdə çətinlik çəkirəm. Əvvəla, həmin separatçı liderlər Ermənistanda yox, Azərbaycanda həbsdədilər. Belə olan halda Paşinyan necə onları azad edə bilər? Digər tərəfdən separatçılar çox ağır maddələrlə ittiham olunurlar. Onların istintaq prosesi gedir və məhkəmə hökmü hələ elan olunmayıb. Belə olan halda, ümumiyyətlə bu, mümkün olan iş deyil. Paşinyan istəsə belə, bu istiqamətdə səy göstərsə belə, bunun separatçıların buraxılmasına heç bir təsiri olmayacaq. Çünki bu, sırf Azərbaycanın səlahiyyət dairəsində olan məsələdir. Azərbaycan da onları buraxan deyil. Ona görə ki, separatçılar Azərbaycanın ərazi bütövlüyünə qarşı qəsd ediblər, bir sıra cinayətlər törədiblər. Əlləri necə deyərlər, qana batıb. Ona görə də hansı beynəlxalq təşkilatın nə deməsindən, hansı erməninin nə düşünməsindən asılı olmayaraq separatçı liderlər həbsdən azad edilməyəcək. Onlar törətdikləri cinayətlərə görə cavab verəcəklər. Başqa bir tərəfdən, Paşinyan siyasi baxımdan onların azad olunmasında maraqlı deyil. Çünki separatçı liderlər Ermənistanda revanşist qüvvələrlə yaxındılar. Onların həbsdən çıxması Paşinyana qarşı revanşist müxalifətin güclənməsinə səbəb olar. Bu, Nikola lazımdırmı? Təbii ki, yox. Ona görə də məsələyə həm də bu konteksdən yanaşmaq lazımdır".
Vidadi ORDAHALLI
