Sahil Kərimli: "Qərbin və digər dairələrin təsiri altında olan Ermənistan nəyisə əldə etmək üçün çabalar göstərir"
Antalya Diplomatiya Forumunda xarici işlər naziri Ararat Mirzoyan və Türkiyə ilə əlaqələr üzrə xüsusi nümayəndə Ruben Rubinyanla təmsil olunan Ermənistanın məqsədi Ankara ilə üçüncü tərəfin, yəni Bakının maraqları nəzərə alınmadan münasibətlərin qurulmasıdır.
Forum çərçivəsində Mirzoyan və Rubinyan bütün çıxışlarında bu məqamı xüsusilə vurğulayırdı. Türkiyə isə ən yüksək səviyyədə Ermənistana növbəti dəfə izah etdi ki, həm kommunikasiyanın açılması (Zəngəzur dəhlizi layihəsi), həm də sülh sazişi məsələsində Bakının mövqeyi Ankara üçün "yol xəritəsidir". Forumun açılış mərasimində çıxış edən Ərdoğan da bəyan etdi ki, Ermənistanla normallaşma prosesi Azərbaycanla sıx koordinasiya ilə davam etdiriləcək.
Ermənistanın Azərbaycanın başı üstündən Türkiyə ilə əlaqələr qurmaq niyyəti və bunun iflasını necə şərh etmək olar?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, Ermənistanın siyasi rəhbərliyinin artıq başını itirdiyi üzə çıxır. Çünki onlar yaxın qonşuları ilə münasibəti necə quracağını bilmir. Müstəqil siyasət yürüdə bilmədiyi üçün onun xarici siyasət kursu tam iflasa uğrayıb. Qərbin və digər dairələrin təsiri altında olan Ermənistan nəyisə əldə etmək üçün çabalar göstərir. Azərbaycanın başı üzərindən Türkiyə ilə münasibətləri normallaşdırıb, siyasi dividendlər əldə etməyə çalışır. Antalya Diplomatik Forumubda təmsil olunan ermənilər belə cəhdlər edib. Təbiidir ki, Türkiyənin siyasi rəhbərliyi Ermənistana yenə öz yerini göstərib. Məlumdur ki, bizi Türkiyə ilə qardaşlıq münasibətləri bağlayır. Tarixi köklərimiz eynidir. Bir millət, iki dövlətik. Bu, bütün dünyaya nümunə olacaq münasibətlərdi. Ermənistan yenə də öz xislətinə uyğun olan siyasətin köməyi ilə nəyəsə nail olmağa çalışır. Bu məsələdə Türkiyə və Azərbaycanın qətiyyətli və dəyişməz mövqeyi bundan ibarətdir ki, Ermənistan bölgədə sülh və əminəmanlıq istəyirsə, ilk növbədə qonşusu olan bu iki ölkə ilə münasibətlərini nizamlamalıdır. Ermənistanın yeganə çıxış yolu Azərbaycanın irəli sürdüyü şərtləri qəbul etməkdir. Həmin şərtlərin nədən ibarət olduğu məlumdur. Biz uzunmüddətli, dayanıqlı sülh istəyirik. Mehriban qonşuluq və rifah içərisində yaşamaq istəyirik. Belə olduğu təqdirdə Ermənistanın bir dövlət kimi tərəqqisindən söhbət gedə bilər. Bizim bölgədə yaratdığımız yeni reallıqlar dünyanın əsas ölkələri tərəfindən qəbul edilib. Bölgədə atılacaq hər bir addım qalib ölkə kimi bizim iradəmizlə atılmalıdır. Ermənistanın da bunu anlaması lazımdır".
Ermənistan parlamentinin vitse-spikeri, ölkənin Ankara ilə münasibətlərin normallaşdırılması üzrə xüsusi nümayəndəsi Ruben Rubinyan deyib ki,
ölkələr arasında münasibətlərdə dərin tarixi kontekst var: "Ermənistan Türkiyə ilə münasibətlərin tam normallaşmasına və sərhədlərin açılmasına məhz bu anda, bu gün və sabah hazırdır".
2023-cü ilin oktyabrında İrəvan bağlanmış razılaşmalar çərçivəsində Türkiyə ilə sərhədi açmağa qismən hazır olduğunu bəyan edib. Baş nazir Nikol Paşinyan razılaşmaların üçüncü ölkə vətəndaşları və diplomatik pasport sahibləri üçün açılmasına aid olduğunu bildirib.
Göründüyü kimi, Ermənistan sərhədlərin açılmasına can atsa da, Türkiyə buna razılıq vermir.
Məhəmmədəli QƏRİBLİ
