Abutalıb Səmədov: "Əgər o baş tutmasa, Ermənistanın işğalı, Rusiyanın oraya hərbi qüvvələr yeritməsi istisna deyil"
Rusiya ilə Ermənistan arasındakı gərginlik artıq hər iki ölkənin dövlət elitası səviyyəsində müzakirə edilir. Paşinyan deyib ki, KTMT-dəki fəaliyyətlərini dondurublar. Parlament sədri sərhədçilərin fəaliyyətinin məhdudlaşmasının zəruriliyini qeyd edib. Lavrov Antaliyadakı tədbirdə dedi ki, Ermənistandan konkret mövqe gözləyirlər.
Görünən budur ki, bu məsələ artıq iki ölkənin yanaşması kontekstindən çıxıb və dünya jurnalistlərinin gözü qarşısında müzakirə olunur. Belə vəziyyət Rusiya-Ermənistan münasibətlərinin yaxın gələcəyi üçün nə vəd edir?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, Paşinyan 2022-ci ilin sonlarından başlayaraq, açıq şəkildə Rusiyadan uzaqlaşmaq xətti götürdü: "Bu gün artıq o, dönüşü olmayan bir istiqamətdədi. Nə qədər ki Paşinyan Ermənistanda baş nazirdi, onun yenidən Rusiyaya yaxınlaşmaq ehtimalı yoxdur. Ermənistan yalnız Paşinyansız Rusiyaya yaxınlaşa bilər. İlk növbədə Paşinyanın qarşısına qoyduğu məqsəd KTMT- ni tərk etməkdir. İndi ordakı fəaliyyətlərini dondurduqlarını bildirir. Düzdür, belə bəyanat verməzdən qabaq yaxşı olardı anlasınlar ki, bu hərbi birlikdə üzvlüyün dondurulması deyilən bir proses yoxdur. Ya üzv ola bilərsən, ya da çıxmaq barədə müraciət edə bilərsən. Bu gedişlə, yaxın vaxtlarda Paşinyan bu addımı da ata bilər. İlk addım da KTMT-ni tərk etmək olacaq. İqtisadi qurumlardan çıxmaq hələ ki Ermənistanın xeyrinə deyil. Çünki onun xarici ticarət dövriyyəsinin 35,3 faizi Rusiyanın payına düşür. Digər tərəfdən, Rusiya Ermənistana ucuz qaz satır. Rusiyada işləyən ermənilər ötən il öz ölkələrinə 4 milyard dollar vəsait göndərdilər. Bu göstəriciyə görə birinci yeri tutublar. Hətta çinliləri, digər dövlətləri də qabaqlayıblar. Bu baxımdan iqtisadi qurumları tərk etmək Ermənistanın maraqlarına cavab vermir. Ancaq Rusiya da gec - tez Ermənistanın bu qeyri-dost addımlarına reaksiya verməlidir. Belə görünür ki, Ukrayna da vəziyyətin sabitləşməsinu gözləyir. Bu da bu ilin sonuna, gələn ilin əvvəllərinə baş verə bilər. Qərbin, ABŞ-ın Ukraynaya yardımı kəskin şəkildə azaltması onun vəziyyətini çox ağırlaşdıracaq və Rusiyanın qarşısında dayanmasını mümkünsüz edəcək. Bundan sonra Rusiya Ermənistana qarşı kəskin addımlar atmağa başlayacaq. İlk növbədə iqtisadi xarakterli addımlar, sonra isə Ermənistanın uşğalı məsələsi nəzərdə tutulacaq. Ukrayna hadisələri göstərdi ki, dünyada bir dövlətin digər dövlətin ərazisini işğal etməsinin qarşısını ala biləcək mexanizm yoxdur. Rusiya rahat və açıq şəkildə Ukraynaya hücum etdi. Bu gün onun ərazisinin 20 faizini öz nəzarətinə götürüb. İndi də işğal altında olan əraziləri bir az da artırmaq istəyir. Rəsmi şəkildə Ukraynanın 4 vilayətini öz ərazisi elan edib. Dünya birliyi buna heç bir şey edə bilmədi. Əgər Ukraynanı belə asanlıqla işğal etmək mümkündürsə, Ermənistanı niyə olmasın? Ermənistanı Qərb müdafiə edəcəkmi? Bu da müəmmalıdır. Bu reallığın qarşısını ala biləcək beynəlxalq təşkilat, güc yoxdur. Bu baxımdan Ermənistan öz siyasətindən imtina etməlidir ki, bu da Paşinyanla mümkün deyil. Ona görə də Paşinyanı hakimiyyətdən uzaqlaşdırmaq üçün daha ciddi addımlar atılacaq. Əgər o baş tutmasa, Ermənistanın işğalı, Rusiyanın oraya hərbi qüvvələr yeritməsi istisna deyil".
Məhəmmədəli QƏRİBLİ
