2020-ci ildən bəridir ki, Almaniya, Fransa kimi bəzi Avropa ölkələrinin təşkilatları, dövlət qurumları Qarabağda olmayan "erməni mədəni irsinin" "qayğısına qalmaqla" məşğuldur. Bu "qayğıkeşlik" tendensiyası keçən ilin sentyabrından daha da şiddətlənib.
Azərbaycanla Ermənistan arasında sülh danışıqlarında vasitəçi olmaqda maraqlı olan Almaniya hökuməti obyektivliyi unudaraq erməni yalanlarına dəstək verir.
Almaniyanın bəzi dövlət qurumlarının ifrat ermənipərəstliyi diqqətdən yayınmır. Elə bu səbəbdən də Azərbaycan QHT-ləri Xarici Əlaqələr üzrə Alman Şurası və Konrad Adenauer Fondunun rəhbərlərinə açıq məktub ünvanlayıb.
Azərbaycanın vətəndaş cəmiyyətinin üzvləri Xarici Əlaqələr üzrə Alman Şurasının direktoru Quntram Volfa və Konrad Adenauer Fondunun sədri Norbert Lammertə müraciət edərək, onları rəhbərlik etdikləri qurumların bu il martın 6-da Berlində "Arsaxın mədəni irsi" adlı qərəzli və ermənipərəst təbliğat tədbirini ləğv etməyə çağırıblar: "Siz diplomatiya ilə sıx bağlı olan şəxslər kimi yaxşı bilirsiniz ki, Ermənistan və onun 30 ilə yaxın müddətdə mövcud olmuş oyuncaq separatçı rejimi Azərbaycan Respublikası ərazisini uzun müddət işğal altında saxlayaraq, Azərbaycan xalqının maddi və mədəni irsini məhv edib, şəhər və kəndləri Yer üzündən silib, qəbiristanlıqlara qədər hər şeyi dağıdıb. Ermənistan tərəfindən onlarla məscid uçurulub, bir çoxları mal-qara saxlanılması üçün istifadə olunaraq təhqir edilib".
Məktubda qeyd edilib ki, Xarici Əlaqələr üzrə Alman Şurası və Konrad Adenauer Fondu bir dəfə də olsun bu işğala, etnik təmizləməyə qarşı ekspert müzakirələri təşkil etməyib, Azərbaycan xalqının maddi və mədəni irisinin məhvi barədə hesabatlar yaymayıb. Qarabağda məscidlərin dağıdılması və içərisində donuz saxlanılması faktlarına münasibətdə bu susqunluq islamofobiya nümunəsidir: "2020-ci ilin 44 günlük müharibəsi və 2023-cü ilin sentyabrında baş verən antiterror tədbirləri nəticəsində Azərbaycan Respublikasının ərazi bütövlüyü və suverenliyi tam təmin olunub. Bu gün Azərbaycan dövləti öz gücünə Qarabağ və Şərqi Zəngəzurda Ermənistandan miras qalan 1.5 milyondan çox mina və partlamamış hərbi sursatdan ərazinin təmizlənməsi, genişmiqyaslı quruculuq və bərpa işləri ilə məşğuldur. Rəhbərlik etdiyiniz təşkilatlar buna da əhəmiyyət verməyib.
İndi sual edirik: yalan, saxtakarlıq və riyakarlıq üzərində qurulmuş "Arsaxın mədəni irsi" nəşri üzərində birtərəfli, qərəzli müzakirələr təşkil etməkdə məqsədiniz nədir?
Berlində Azərbaycan və Ermənistanın xarici işlər nazirlərinin görüşündən dərhal sonra bu tədbirin təşkili qarşılıqlı etnik nifrəti artırmağa və sülh danışıqlarına zərbə vurmağa yönəlmiş addımların bir hissəsidir. Xarici Əlaqələr üzrə Alman Şurası öz rəsmi saytında Corc Sorosun Açıq Cəmiyyət İnstitutundan maliyyələşdiyini gizlətmir. Bu, islamofobiyanın təşviqinə, Azərbaycan-Ermənistan münasibətlərinin normallaşmasına mane olmağa və Azərbaycan xalqına qarşı törədilmiş cinayətlərin ört-basdır edilməsinə səbəb olmamalıdır.
Biz inanmaq istəyirik ki, sizlərin müdaxiləsi ilə məsələ həllini tapacaq və rəhbərlik etdiyiniz qurumlar "Arsaxın mədəni irsi" mövzusunda islamofob tədbiri ləğv edəcək.
Biz sizləri Qarabağda və Ermənistan ərazisində Azərbaycan xalqının maddi-mənəvi irsinin yox edilməsinə dair faktları araşdırmağa və bütün tərəflərin iştirakı ilə müzakirələr təşkil etməyə çağırırıq".
Ekspertlər hesab edir ki, Xarici Əlaqələr üzrə Alman Şurası və Konrad Adenauer Fondunun rəhbərləri mütləq mənada məktbu nəzərə almalı və sözügedən kampaniyanı dayandırmalıdır. Onların keçirmək istədiyi "Arsaxın mədəni irsi" mövzusunda islamofob tədbirin ləğv edilməsi vacibdir. Ekspertlər qeyd edir ki, ümumiyyətlə Qarabağda erməni mədəni irsi yoxdur.
Qarabagda ermənilərin nə irsi var ki, almanlar təşvişə düşüb? Bəyəm orda erməni irsi var ki? Başqa tərəfdən, Qarabağdakı mədəni abidələri, irsi nə təhlükə gözləyə bilər ki, bunlar yalandan hay-küy salırlar?
Orta Doğu Araşdırmalar Mərkəzinin rəhbəri Sədrəddin Soltan "Bakı-Xəbər"ə şərhində bildirdi ki, Qarabağda tarixi erməni abidəsi yoxdur: "Qarabağda erməni izinin olmamasını arxeoloqlar, tarix çoxdan təsdiqləyib. Bu bölgədə erməni dilində bir coğrafi ada belə rast gələ bilməzsiniz. SSRİ dövründə ermənilərlə bağlı Qarabağda bir sıra "abidələr" tikdilər, Qarabağda tarixlərini qədimləşdirməyə çalışdılar. Bölgədəki alban kilsələrini erməniləşdirməklə bu torpaqlarda "qədimdən yaşadıqlarını" göstərməyə çalışdılar. Azərbaycan torpaqları işğaldan azad olunduqdan sonra həmin ərazilərdəki tarixi-mədəni abidələr qorunur. Əvvəllər də qorunmuşdu. İşğal dövründə ermənilər həm xristian, həm də müsəlman abidələrini baxımsız vəziyyətə salıqlarından sonradan onların bərpasına ehtiyac yarandı" - deyə S.Soltan əlavə etdi.
Martın 6-da Berlində keçirilən "Arsaxın mədəni irsi" adlı qərəzli və ermənipərəst təbliğat tədbirinə gəlincə, S.Soltan bildirdi ki, bu, daha çox Almaniyanın Azərbaycan-Ermənistan danışıqlarına moderatorluq etmək cəhdlərinin qarşısını almağa yönəlir. "Çünki Fransa sıradan çıxır, Azərbaycan tərəfi ona etimad göstərmir. Hər iki tərəfin Almaniyaya etimadı var. Ola bilsin, ermənilərin oradakı havadarları Almaniyanın tərəfsiz mövqeyini şübhə altına almaq və onu gözdən salmaq üçün Almaniyada bu tip tədbiri keçirmək istəyirlər" - deyə S.Soltan qeyd etdi.
S.Soltan bu üzdəniraq tədbirin planlaşdırılması işində Fransanın təxribatını da istisna etmir. O əlavə etdi ki, görünür, təxribatçı qüvvələr perspektivdə tərəflər arasında görüşə Almaniyanın moderatorluq etməsinə mane olmağa çalışırlar.
İradə SARIYEVA
