Rusiya prezidenti Vladimir Putinin sağ əli Aleksandr Duqin nüvə müharibəsi risqi ilə bağlı açıqlama verib. Duqin artıq 3-cü Dünya Müharibəsinin müəyyən mənada başladığını bildirib. Bunun nüvə müharibəsinə çevrilə biləcəyini deyən Duqin bildirib ki, biz heç vaxt nüvə müharibəsinə bu qədər yaxın olmamışdıq.
"Bizim çoxlu iqtisadi layihələrimiz, nüvə layihələrimiz var. Təbii ki, bütün bu layihələr qarşılıqlı maraqlara əsaslanır. Hazırda qütblər arasında müharibə gedir. Bu müharibə Qərbin qorumağa çalışdığı birqütblü dünya nizamı ilə çoxqütblü nizam arasında gedir. Bu müharibənin xətləri Ukrayna, Fələstin və Tayvandır. Afrika və Cənubi Amerikada da yeni cəbhə açıla bilər.
Biz yeni dünya nizamının formalaşma mərhələsindəyik. Bu proses qaynar münaqişələrlə müşahidə edilir. Ən pisi odur ki, biz indi nüvə müharibəsi risqi ilə üz-üzəyik. Təəssüf ki, biz hər gün bu təhlükəyə bir addım da yaxınlaşırıq. ABŞ-ın Ukraynaya yardım paketi bu mənanı daşıyır. Ukraynaya uzaqmənzilli raketlərin və Ukraynadan deyil, Polşa və Rumıniyadan havaya qalxması gözlənilən F-16 təyyarələrinin tədarükü. Rusiya şəhərlərinə hücumlar hər an nüvə müharibəsinin başlanmasına səbəb ola bilər.
Bu müharibədə təkcə taktiki nüvə silahları deyil, həm də strateji nüvə silahları istifadə olunacaq. Sanki dünya, xüsusən də Qərb bunu anlamır. Sanki bilmirlər ki, Rusiya böyük nüvə dövlətidir. Əgər biz adi müharibədə Ukraynanı məğlub edə bilməsək, bu, birbaşa nüvə müharibəsinin başlanması demək olacaq və biz bütün Ukrayna üzərində nəzarəti ələ alana qədər dayanmağı düşünmürük. Bundan sonra heç bir diplomatik həll, vasitəçilik və ya danışıqlar bizə bu hədəfdən yayındıra bilməz. Ona görə də bu gün Ukraynanı kim silahla təmin edirsə, bilməlidir ki, onlar nüvə müharibəsi risqini artırırlar.
Üçüncü dünya müharibəsi müəyyən mənada başlayıb. Biz bunun ilkin mərhələsindəyik. Bu, nüvə müharibəsinə çevrilə bilər. Biz heç vaxt nüvə müharibəsinə bu qədər yaxın olmamışıq. Bu, məncə, Qərbin tam məsuliyyətsizliyidir. Nəinki Qərbin, hətta neytral ölkələrin də məsuliyyəti göz qabağındadır. Ukraynaya silah göndərməsələr, nüvə müharibəsi risqi də azalacaq. Çünki Rusiyanın NATO ölkələrinə qarşı nüvə silahından istifadə etmək istəyi və ya arzusu yoxdur. Amma NATO bizimlə vuruşan ölkəyə hər gün strateji silahlar göndərməkdə davam edir.
Rusiya bunları çox gözəl görür. Proses belə gedir. Amma yaxşı bilməliyik ki, dünyanın taleyi bir neçə məsuliyyətsiz liderin əlindədir. Vaşinqton nə etdiyini bilmir. NATO liderləri atdıqları addımların nüvə faciəsi ilə nəticələnə biləcəyinə görə, məsuliyyət hiss etmirlər. Rusiyaya hücum dünyanın nüvə silahı ilə məhv edilməsidir. NATO indiki siyasətini davam etdirsə, bu dəhşətli gün qaçılmaz olacaq.
Qərbi Ukraynaya silah göndərməyə nə məcbur edir? İstədiyimizi bütün hallarda alacağıq. Bu müharibənin geri dönülməz yolla getməsini istəyirlər? Bizim Belqorod kimi şəhərlərimizə atılan hər bir HIMARS raketi, hətta Donetskə atılan raketlər də nüvə faciəsinin reallaşmasına doğru bir addımdır. Qərbin məsuliyyət hissini tamamilə itirdiyini görürük. O zaman Türkiyə Qərbi dayandırsın, ya da başqa ölkələr buna mane olsun. Biz Ukrayna müharibəsində qalib gələcəyik. "Ukraynaya kömək edən hər kəs bunu bilsin, biz bu müharibədən qalib və güclü çıxdıqdan sonra onlarla söhbətimiz tam fərqli olacaq" - deyə Duqin bildirib.
Tahir TAĞIYEV
