Tofiq Abbasov: "Bu məqamlar üst-üstə düşdükdə görürük ki, Azərbaycanın üstünlüyü artır"
Prezident İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini Bakıda qəbul edərkən Avropa Şurası Parlament Assambleyasında (AŞPA) Azərbaycan nümayəndə heyətinin səs hüququndan məhrum edilməsi məsələsinə toxunub.
Dövlət başçısı təəssüflə qeyd edib ki, bu qərar Almaniya Kansleri Olaf Şoltsun rəhbərlik etdiyi partiyanın üzvünün təşəbbüsü ilə qəbul olunub. Həmin avropalı deputat AŞPA-da 2 qeyri-xristian ölkəsindən biri olan Azərbaycanı AŞPA-dan uzaqlaşdırmaq istəyir və bunu nümayişkarcasına, məqsədyönlü şəkildə edir. Prezident İlham Əliyev bəyan edib ki, əgər bir il ərzində ölkəmizi AŞPA-da təmsil edən nümayəndə heyətinin hüquqları bərpa olunmazsa, Azərbaycan bu qurumdan tamamilə çıxmaq barədə məsələyə ciddi şəkildə baxacaq.
Prezidentin bu açıqlamasından sonra AŞPA hansı yolu seçəcək?
Siyasi şərhçi Tofiq Abbasov "Bakı -Xəbər"ə açıqlamasında bildirdi ki, Prezident İlham Əliyevin AŞPA - ya göndərdiyi bu mesaj sadəcə xəbərdarlıq yox, bildirişdi: "Demək istəyir ki, bu gərginliyin səbəbkarı siz özünüzsüz, Fransada bəzi qüvvələrin fitnə - fəsadı nəticəsində Azərbaycanın nümayəndə heyəti ilə bağlı ədalətsiz qərar qəbul etmisiz, onun səsini dondurmusuz. İstəyirsiz onu geri çağırın, istəmirsizsə özünüz bilərsiz. Bizə belə hədələrlə, təzyiqlə olan fəaliyyət lazım deyil. Əslində Azərbaycan bu istiqamətdə müəyyən qələbəni qazanıb artıq. Çünki ilk növbədə ilin əvvəlində Azərbaycan orada öz fəaliyyətini dondurmaq haqqında qərar verdisə, Səməd Seyidovun başçılıq etdiyi heyət də məhz bu qərarı qəbul etdi. Qarşı tərəfin qurğusu olduğunu, bədxah qüvvələrin Azərbaycana qarşı cəbhə yaratdıqlarını bildirdi. Ona görə də, Azərbaycan nümayəndə heyəti çox düzgün addım atdı. İndi biz orda yoxuq. Ancaq bizim əvəzimizə danışanlar var orda. Macarıstan bizim tərəfimizdədir, Serbiya fəaliyyətdə olmayıb. Seçkilərdən sonra isə onların nümayəndə heyəti formalaşdı. Onlar yığılan kimi, ilk addımları ondan ibarət oldu ki, ATƏT və AŞPA rəhbərliklərinə müraciət etdilər. Azərbaycana qarşı atılan bu addımların hamısının qanunsuz olduğunu, fəaliyyətlə bağlı fundamental prinsipləri pozduğunu bildirdilər. Çünki, AŞPA özlüyündə dialoq məkanıdır. Orda mübahisəli məsələlər də müzakirə oluna bilər. Qarşıdurmada olan tərəflər bir - biri ilə orda danışıqlar keçirməlidirlər. Bunu etmək əvəzinə, əlavə gərginlik yaradaraq işğalçı ölkə olan Ermənistanı müdafiə etdiz. Ona görə də, Azərbaycan belə qeyri-sağlam yanaşmanı qəbul etmir, belə tərzdə fəaliyyətin də mənasını görmür. Dünən Prezidentimizin Almaniya Şərq komitəsinin rəhbərləri ilə görüşündə dediyi bu fikir son dərəcə lazımlı fikirdir. Biz Avropa Şurasından belə çıxmağa hazırıq. Artıq Gürcüstan nümayəndəsinin heyəti də bildirib ki, Azərbaycana qarşı qaldırılmış bu qərar ədalətsizdir, Gürcüstan da bundan imtina etməlidir. Biz işimizi görmüşük, dövlət olaraq sözümüzü demişik. Biz öz qərarımızı vermişik. Digər nümayəndə heyətləri də Azərbaycanın mövqeyinə səs verirlər və bildirirlər ki, Azərbaycanla bağlı yanaşma qərəzli olub. Bu məqamlar üst-üstə düşdükdə, görürük ki, Azərbaycanın üstünlüyü artır. Biz diplomatik mövqeyimizlə qürur duymalıyıq. Bizim sərgilədiyimiz mövqe bütün səviyyələrdə dəstəklənir. Mübarizə üçün potensialımız var, sözümüzü hər zaman deyə bilirik".
Məhəmmədəli QƏRİBLİ
