Rizvan Hüseynov: "Bu gün üzünə gülərlər, amma o vasitələrlə ölkəyə qarşı ən iyrənc addımlar atarlar"
"Biz öz ərazi bütövlüyümüzü və suverenliyimizi bərpa etdikdən sonra Avropa Şurası Parlament Assambleyası Azərbaycan nümayəndə heyətinin səs hüququndan məhrum edilməsi barədə qərar qəbul edir. Əfsuslar olsun ki, bu qərar Almaniya parlamentinin üzvünün təşəbbüsü ilə qəbul olunub və o şəxs Kansler Şoltsun rəhbərlik etdiyi partiyanın üzvüdür. Bu, ikili standart deyilmi, yoxsa bizimlə aparılan bir oyundur?! Almaniya Kansleri qərəzsizlik nümayiş etdirir, onun bəyanatları və fəaliyyəti bunu əks etdirir. Onun rəhbərlik etdiyi partiyanın üzvü isə AŞPA-da 2 qeyri-xristian ölkəsindən biri olan Azərbaycanı uzaqlaşdırmaq istəyir və bunu nümayişkaranə və məqsədyönlü şəkildə edir. Bildiyiniz kimi, biz bu qurumun sessiyalarında iştirak etməmək qərarına gəlmişik. Çünki əgər bizim öz mövqeyimizi bildirmək hüququmuz yoxdursa, nəyə görə orada olmalıyıq?!" Bu sözləri fevralın 28-də Prezident İlham Əliyev Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən deyib.
Prezidentin də dediyi kimi, doğrudan da anlaşılmaz və ziddiyyətlidir ki, Almaniya lideri Şolts özü sülh məsələsində pozitiv rol oynamağa çalışdığı, Azərbaycan və Ermənistan liderlərini görüşünü təşkil etdiyi halda, partiyasının üzvləri AŞPA-da Azərbaycana qarşı belə qərəzli kampaniya aparırlar, qətnamə irəli sürüblər. Eyni zamanda Almaniya mətbuatında da Azərbaycana qarşı qaralama kampaniyası gedir.
Bu ziddiyyət necə başa düşülə bilər, bu ziddiyyətin kokündə nə dayanır?
"...Bu, Avropa siyasətinin reallığıdır"
Qafqaz Tarixi Mərkəzinin direktoru, tarixçi və politoloq Rizvan Hüseynov "Bakı-Xəbər"ə şərhində "Ümumiyyətlə, bəzi Avropa ölkələrinin siyasəti çox qarmaqarışıqdır. Birbaşa ənənəvi Avropa ölkələrində - Fransada, Almaniyada 25-30 il bundan əvvəl olan siyasi simalar, liderlər yoxdur deyəsən ki, dayanıqlı siyasəti var, xarizması var, proseslərə nəzarət etmək gücü, ətrafı toplayıb lider kimi davranmağa imkanları var. İndi belə şəxsləri Avropa siyasətində biz görmürük, cılızlaşma gedir. Bu insanlar bir şey deyər, başqa şey edər və nəticə isə üçüncü olar. Nə ətrafa nəzarət edə bilər, nə də bir dayanıqlı siyasətləri var. Fransada Makron, Almaniyada Şolts bunun bariz nümunələridir. Ona görə Avropa çox ciddi krizis yaşayır ki, orada qərar verib sözünün arxasında dura bilən liderlər, rəhbərlər yoxdur. Yaxud onların gücü çatmır. Nəticə etibarı ilə bu qarmaqarışda Azərbaycan öz qərarlarını qəbul edir. Sözsüz ki, Avropa ölkələrilə ticari, humanitar, mədəni, nəqliyyat, tranzit əlaqələr və sair davam edir. Amma dediyim kimi, bəzi ölkələrlə bu alınmır. Çox əfsuslar olsun ki, istər Fransa, istər Almaniya Avropa qurumlarında olan nüfuzlarından istifadə edib Azərbaycan kimi ölkələrə təzyiq göstərmək istəyirlər. Bu da açıq-aşkardır. Onlarda bir neçə standartlı yanaşmalar varsa ciddi nəticə gözləmək yersizdir"-deyə bildirdi.
R.Hüseynovun sözlərinə görə, bütün hallarda indiki Almaniya rəhbərliyinin cəhdləri, alman şirkətlərinin Azərbaycanda layihələr gerçəkləşdirmək istəyi nə qədər ciddidir, bunu yaxın zaman göstərər. "Nə olursa olsun, dediyim kimi, çox təəssüf, bəzi Avropa ölkələrinin dəyişməz siyasəti var ki, üzdə, görüşdə bir cürdürlər, amma mətbuat, Avropa təşkilatları, pulla ələ alınan hansısa siyasətçilər vasitəsilə tam sözlərinin tərsinə hərəkət edərlər. Bu gün üzünə gülərlər, amma o vasitələrlə ölkəyə qarşı ən iyrənc addımlar atarlar. Yəni biz buna öyrəşməliyik, bu, Avropa siyasətinin reallığıdır"-deyə R.Hüseynov əlavə etdi.
İradə SARIYEVA
