Abutalıb Səmədov: "Ancaq təəssüf ki, ABŞ və Fransa öz yanlış siyasətlərindən imtina etmək fikrində deyillər"
"30 illik bir müddətdə özlərini beynəlxalq birlik adlandıran Fransa, ABŞ və Rusiya – həmsədrlər ədalətin bərpa olunması üçün heç bir addım atmadılar. Və biz öz torpaqlarımızı azad etməyə başlayanda bu üç ölkə bizə təzyiqlər göstərməyə başladı". Bunu Azərbaycan Prezidenti İlham Əliyev fevralın 28-də Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən deyib.
Prezident Əliyev vurğulayıb ki, həmin ölkələrin hər biri Azərbaycanı öz yolundan döndərmək üçün müxtəlif alətlərdən istifadə edib. "Hər biri bizi öz yolumuzdan döndərmək üçün müxtəlif alətlərdən istifadə etdilər. Onlar istəmirdilər ki, biz öz torpaqlarımızı azad edək. Ötən ilin sentyabrında biz separatizmə son qoyduğumuz zaman onlar yenə də səhv etdilər. Onların bəziləri indi də səhv edirlər. Mən ABŞ və Fransanı nəzərdə tuturam. Düşünürəm ki, Rusiya indi nəyin baş verdiyini yaxşı anlayır və yeni reallıqları qəbul edir. ABŞ və Fransa da eyni cür hərəkət etməlidirlər. Əks təqdirdə, vəziyyət onların planlaşdırdığı kimi olmayacaq. Bu ölkələr Cənubi Qafqazda buranın aparıcı ölkəsi, iqtisadiyyatı, ordusu, geniş beynəlxalq əlaqələri olan Azərbaycan ilə işləməlidirlər", - deyə Prezident qeyd edib.
Prezident Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən açıq şəkildə bəyan etdi ki, vaxtilə Rusiya, Amerika, Fransa səhv etdi, sonra Rusiya səhvini başa düşdü, ABŞ və Fransa da səhvlərini başa düşməlidirlər, onlar da bu bölgənin ən güclü iqtisadiyyatı, ordusu olan, stabil, müstəqil siyasət yürüdən Azərbaycanla işləməlidirlər, Ermənistanla yox. Prezidentin bəyanatından nəticə çıxarsalar, min qazanda qaynayan Ermənistanla yox, stabilliyin hökm sürdüyü güclü Azərbaycanla əməkdaşlıq edərlər.
"...Rusiya nümunəsini nəzərə almalıdırlar"
"Alyans" Strateji Araşdırmalar Mərkəzinin sədri, siyasi ekspert Abutalıb Səmədov "Bakı-Xəbər"ə şərhində "Azərbaycan Prezidenti son illər dünyanın böyük dövlətlərinin bölgəyə münasibətdə yol verdikləri yanlışıarı bir daha xatırladı. 2020-ci ilin sentyabrında Azərbaycanın öz ərazilərini işğaldan azad etməsinin qarşısını almaq üçün ATƏT-in Minsk qrupunun həmsədrləri olan üç dövətin prezidentləri oktyabrın 1-də bəyanat verib tələb etdilər ki, hərbi əməliyyatlar dayandırılsın. Bundan başqa, Fransa prezidenti ayrıca bəyanat verdi və dedi ki, Azərbaycanın Qarabağ ərazisinə girməsini Fransa qəbul etməyəcək. Azərbaycan nə üç dövlət rəhbərinin o bəyanatına, nə də Fransa prezidentinin ayrıca verdiyi bəyanata heç bir əhəmiyyət vermədi və beynəlxalq hüququn ona verdiyi imkanlardan istifadə edərək öz ərazilərinin böyük hissəsini nəzarətinə götürdü"-deyə bildirdi.
A.Səmədovun sözlərinə görə, sonradan 2023-cü ilin sentyabrında ABŞ Dövlət Departamentinin rəsmisi bəyan etdi ki, Azərbaycanın "Qarabağ xalqına" qarşı kəskin addımlar atmasına ABŞ imkan verməyəcək. A.Səmədov qeyd etdi ki, məqsəd Azərbaycanın Qarabağda keçirmək istədiyi antiterror tədbirlərinin qarşısını almaq idi, ancaq ala bilmədilər. "Azərbaycan öz ərazisində tam suverenliyini bərpa etdi. Bu müddətdə Rusiya da müharibənin gedişində Ermənistana silah yardımı göstərməklə, sonrakı dövrdə sülh sazişinin Ermənistanı qane edən layihəsini təqdim etməklə müəyyən yanlış addımlar atdı. 2022-ci ilin oktyabrında Soçidə keçirilən sammitdə həmin sülh sazişini Azərbaycana qəbul etdirməyə cəhd göstərməklə yanlış addımlar atdı. Soçidə Azərbaycan Prezidenti sonuncu dəfə bu yolun yanlış olduğunu Rusiya rəhbərliyinin nəzərinə çatdırdı. Rusiya bu məsələdə çeviklik göstərdi, özlərinin yanlış addımlarından imtina etdi və sülh sazişinin həmin layihəsi bir də ortaya çıxarılmadı. Azərbaycanın Qarabağda keçirdiyi antiterror tədbirləri zamanı da Rusiya beynəlxalq hüquqa uyğun mövqe tutdu. Bu da, təbiidir ki, bizim tərəfimizdən qiymətləndirildi. Nəhayət, bu gün də həm ABŞ, həm Fransa Ermənistana dəstək verməklə yanlış addımlarını davam etdirdilər. Məqsəd Ermənistanı antirusiya cəbhəsinin lokomotivinə çevirməkdir. Təbiidir ki, söhbət bölgəmizdən gedir. Son nəticədə məqsəd Rusiyanın liderlik etdiyi beynəlxalq qurumları sıradan çıxarmağa cəhd göstərməkdir. Söhbət ilk növbədə KTMT-dən gedir ki, Paşinyan KTMT-də fəaliyyətlərini de-fakto dondurduqlarını deyir. Sonrakı mərhələdə isə söhbət, təbiidir ki, MDB-nin və Avrasiya İqtisadi Birliyinin dağıdılmasından gedir.
Aydındır ki, Ermənistan bu sahədə ciddi uğurlar əldə edə və Qərbin istəklərini tam yerinə yetirə bilməyəcək. Ancaq son nəticədə Ermənistanın özü üçün çox ciddi problemlər yaranacaq. Hətta müstəqilliyi sual altına alınacaq. Təbiidir ki, bu da Qərbi narahat etmir. Bölgənin lider dövləti Azərbaycandır. İlk növbədə Azərbaycanla işləmək lazımdır. Prioritet Azərbaycana verilməlidir. Bunu dünyanın bir çox dövlətləri anlayır, ancaq təəssüf ki, ABŞ və Fransa öz yanlış siyasətlərindən imtina etmək fikrində deyillər. Bu, Azərbaycan Prezidentinin sonuncu xəbərdarlığıdır. Bu xəbərdarlıqdan həm dünyanın aparıcı dövlətləri, həm də Ermənistan nəticə çıxarmalıdır, Rusiya nümunəsini nəzərə almalıdırlar. Əks halda Qərbin bölgəyə nüfuz etməsi, bölgədə möhkəmlənməsi ciddi problemlərlə üzləşəcək. Digər tərəfdən, Ermənistan son dövrlərdə "qazandığı" problemlərə yenilərini də əlavə edəcək" - deyə A.Səmədov əlavə etdi.
İradə SARIYEVA
