Səyyar Əliyev: "Onlar sülhə yox, qisas almağa doğru yön götürüblər və bunu dövlət siyasəti səviyyəsində edirlər"
Ermənistan Xarici İşlər Nazirliyi Sumqayıt hadisələri ilə bağlı növbəti bəyanatla çıxış edib. Bəyanatda həmin hadisələrin əsl mahiyyəti saxtalaşdırılıb. Həmin bəyanatda ölkəmizə qarşı irəli sürülən iddialar tamamilə əsassız olmaqla yanaşı, tarixi faktların təhrif edilməsi və saxtalaşdırılmasıdır.
Azərbaycan Xarici İşlər Nazirliyinin mətbuat katibi Ayxan Hacızadə mövzu ilə bağlı şərh verib. A.Hacızadə bildirib ki, bəyanat 1980-ci illərin sonlarından başlayaraq Ermənistanın Azərbaycana qarşı əsassız və qeyri-qanuni ərazi iddialarını həyata keçirmək məqsədilə zorakılıq əməllərini, Ermənistan ərazisində yaşayan azərbaycanlı əhalinin kütləvi qovulmasını, Azərbaycan xalqına qarşı terroru, etnik zəmində təxribatları və hərbi gücdən istifadəni ört-basdır etmək cəhdidir. Ermənistan XİN-ə xatırladırıq ki, Sumqayıtda etnik zəmində törədilən iğtişaş SSRİ və Ermənistan rəhbərliyinin, erməni şovinist ideoloqların, ekstremist təşkilatların əvvəlcədən düşünülmüş və planlaşdırılmış məqsədyönlü təxribatlarının tərkib hissəsi idi.
Həmçinin qeyd edək ki, SSRİ Baş Prokurorluğu tərəfindən baş vermiş hadisə ilə bağlı cinayət işi açıldığı, nəticədə iğtişaşların icraçıları və əlbir olan şəxslər, həmçinin ümumi sayı 32 nəfərdən ibarət qurbanların müəyyən edildiyi hər kəsə məlumdur. Hadisənin qurbanları arasında 6 nəfər azərbaycanlının olması bu iğtişaşların azərbaycanlı əhali tərəfindən həyata keçirilmədiyini sübut edir.
Ermənistan XİN-in diqqətinə çatdırırıq ki, hadisələrin səbəbkarı, yürüşə başçılıq edən, şəxsən 6 nəfəri öldürən və erməni millətindən olan 3 qadına təcavüz edən şəxs milliyyətcə erməni olan Eduard Qriqoryan olub və onun barəsində Sumqayıtda yaşayan ermənilərin çoxsaylı şahid ifadələri toplanıb. Məhkəmənin qərarı ilə 12 il azadlıqdan məhrum edilən E.Qriqoryan cəzasını çəkmək üçün Ermənistana köçürülüb və sonradan azadlığa buraxılıb.
Məsələnin başqa bir aspekti də olduqca maraqlıdır. Ermənistan bir tərəfdən sülhdən danışır, digər tərəfdən isə keçmişdəki hadisələrin əsl mahiyyətini təhrif etməklə revanşizmin dövlət siyasətinin tərkib komponenti olduğunu isbatlayır.
Tarix üzrə fəlsəfə doktoru Səyyar Əliyev "Bakı-Xəbər"ə açıqlamasında bildirdi ki,
Sumqayıt hadisələri erməni millətçilərinin məkrli planlarının nəticəsi idi və əsas səbəb də ermənilərdə azərbaycanlılara qarşı nifrət oyatmaqla "Dağlıq Qarabağ"da separatçılığa başlamaq və muxtar vilayəti Ermənistana birləşdirməyə çalışmaqdan ibarət idi. Ermənistanın birinci prezidenti olmuş Levon Ter-Petrosyan öz müsahibələrinin birində demişdi ki, "Sumqayıt hadisələrindən sonra Azərbaycan xalqı şok vəziyyətinə düşmüşdü. Əgər ölkə rəhbərliyi bu məqamdan istifadə edib DQMV-nin Ermənistana birləşdirilməsi haqqında qərar çıxarsaydı, Azərbaycan xalqı buna etiraz edə bilməyəcəkdi".
Artıq arxivə qovuşmuş SSRİ hakimiyyətinin və Ermənistan xüsusi xidmət orqanlarının Sumqayıt şəhərində törətdikləri hadisələrdən 36 il ötür. Məhz 1988-ci il fevralın 27-dən 28-nə keçən gecə Sumqayıt şəhərində baş vermiş iğtişaşlar nəticəsində 32 nəfər həlak olmuşdu. Onlardan 26 nəfərinin erməni, 6 nəfərinin isə azərbaycanlı olduğu məlumdur. Humanistliyi və tolerantlığı ilə həmişə seçilən Azərbaycan xalqını hədəfə almış və bərəkətli torpaqlarına göz dikmiş mənfur qüvvələr asanlıqla alətə çevrilən acgöz erməni millətçilərindən dəyənək kimi istifadə edərək, Sumqayıt təxribatını həyata keçirmişdilər. Məqsəd də aydın idi: Sumqayıtda qan axıtmaqla Dağlıq Qarabağın Ermənistana birləşdirilməsi prosesinə bəhanə tapmaq. Sonralar səsləndirilən etiraflar və faktlar da Sumqayıt hadisələrinin arxasında keçmiş SSRİ və Ermənistan xüsusi xidmət orqanlarının dayandıqlarını çılpaqlığı ilə ortaya çıxartdı. Hadisələrdən 36 il keçməsinə baxmayaraq, ermənilər dünya ictimaiyyətini aldatmaqdan əl çəkmirlər. Hadisələrin əsl mahiyyətini gizlədərək, onu soyqırım kimi təqdim etməyə çalışırlar. Halbuki, araşdırmalar göstərir ki, yüzlərlə erməninin hadisələrin baş verəcəyindən əvvəlcədən xəbəri olub.
İş üzrə təqsirləndirilmiş şəxs kimi 6 nəfərin qətlində iştirak etmiş milliyyətcə erməni Eduard Qriqoryanın isə məsuliyyətdən azad edilməsi üçün erməni millətçi təşkilatçıları çox çalışıblar. Bu qədər cinayət törətməsinə baxmayaraq, Qriqoryan Ermənistana göndərilib, sonra da azadlığa buraxılıb.
Göründüyü kimi, Ermənistan hakimiyyəti hələ də saxtalaşmış tarixə istinad edərək, bunu dövlət səviyyəsində qabardır. Bununla bir daha sübut olunur ki, ermənilər əsl mahiyyətlərindən əl çəkə bilmir. Onlar sülhə yox, qisas almağa doğru yön götürüblər və bunu dövlət siyasəti səviyyəsində edirlər".
Məhəmmədəli QƏRİBLİ
