Qulamhüseyn Əlibəyli: "Bu cür müraciətlərin olmasını müsbət hal kimi qiymətləndirirəm"
Gürcüstan parlamentinin AŞPA-dakı nümayəndə heyətinin rəhbəri Givi Mikanadze AŞPA sədrinə Azərbaycanla bağlı məktub ünvanlayıb.
Givi Mikanadzenin AŞPA sədri Teodoros Rusopulosa məktubunda AŞPA-nın sessiyası zamanı Azərbaycan Milli Məclisinin nümayəndə heyətinin səlahiyyətlərinin ratifikasiya edilməməsi barədə qəbul edilmiş qətnaməyə toxunulur. Bildirilir ki, bu cür sərt qərarlar AŞPA-nın Azərbaycanla və Cənubi Qafqazla gələcək münasibətləri, eləcə də AŞPA-nın özünün gələcəyi üçün mümkün olan mənfi nəticələr əsaslı şəkildə müzakirə edilmədən və təhlil olunmadan qəbul edilir. Bu isə narahatlıq doğurur. Gürcüstanın qurumdakı nümayəndə heyətinin rəhbəri hesab edir ki, bu qətnamə AŞPA çərçivəsində Azərbaycanla gələcək əməkdaşlığı və fikir mübadiləsini mümkünsüz edir. Bu, AŞPA-nın Cənubi Qafqaz regionu ilə qarşılıqlı fəaliyyətinə də mənfi təsir göstərəcək.
Bundan əvvəl ilkin olaraq Türkiyə XİN-i buna etiraz edərək bəyanat yayıb. Daha sonra Serbiya Azərbaycanla bağlı AŞPA-ya müraciət edib və bunun doğru olmadığını bildirib. Görünən odur ki, getdikcə Azərbaycanla bağlı müraciətlər artır. Nə gözlənilir?
"Dost ölkələrin layihə hazırlayıb irəli sürməsi lazımdır ki, Azərbaycanla bağlı olan o ədalətsiz qərar ləğv olunsun"
Sözügedən məsələ ilə bağlı "Bakı-Xəbər"ə açıqlama verən sabiq millət vəkili, hüquqşünas Qulamhüseyn Əlibəyli buna bir neçə konteksdən yanaşdı: "Bu cür müraciətlərin olmasını müsbət hal kimi qiymətləndirirəm. Bu o deməkdir ki, Azərbaycanla işgüzar əlaqələri, yaxşı münasibətləri olan dövlətlər bu və ya digər şəkildə artıq qəbul olunmuş qərarlara etirazlarını bildirirlər. Lakin bu cür müraciətlər sadəcə olaraq etirazdan o tərəfə keçmir. Hesab edirəm ki, bu müraciətlər əsasında AŞPA-nın öz qərarını ləğv etməsi və yaxud da dəyişdirməsi prinsipcə qeyri-mümkün olan bir məsələdir. Ona görə də hesab edirəm ki, başqa bir yola əl atmaq daha effektiv olar. Həmin o dost ölkələr, etiraz edən ölkələrin nümayəndə heyətləri növbəti sessiya üçün müəyyən qətnamə layihəsi hazırlaya bilərlər. Həmin qətnamə layihəsində Azərbaycanla bağlı ədalətsiz qərarın ləğv edilməsi məsələsini qaldıra bilərlər. Fikrimcə, bu istiqamətdə müəyyən işlərin görülməsi mümkündür və hətta zəruridir. Dost ölkələrin buna etiraz etməsi münkün olsa da, məsələnin köklü həllinə əsas vermir. Buna gətirib çıxarmır. O üzdən, müəyyən layihə hazırlayıb irəli sürmək lazımdır ki, Azərbaycanla bağlı olan o ədalətsiz qərar ləğv olunsun və yaxud da dəyişdirilsin. Yəni AŞPA-da Azərbaycan nümayəndə heyətinin səlahiyyətləri tam şəkildə bərpa olunsun".
Vidadi ORDAHALLI
