Ermənistanın Qərbin ikili oyunlarının yeni qurbanı olacağına dair elə bu ölkənin özündə xəbərdarlıqlar artır. Qeyd edilən xüsusda "Qraparak" qəzeti yazır: "Münhen səfərindən sonra Ermənistanda yeni impulsla anti-Rusiya əhval-ruhiyyəsi yaranacaq və tarazlıqda olan Ermənistan-Rusiya münasibətlərini birdəfəlik sıradan çıxarmağa cəhd ediləcək. Rusiyanın Ermənistandan qovulmasına cəhdlər olacaq.
Hökumətyönlü mənbələr Qərbin belə bir tələb irəli sürdüyünü, bunun müqabilində Azərbaycanın hərbi ambisiyalarını cilovlayacağını vəd etdiyini bildirir. Məhz buna görə də Paşinyan Münhendə erməni icmasının nümayəndələri ilə görüşündə bunu bir daha təkrar edib: "Mən çoxdan deyirəm ki, Ermənistan Ukrayna məsələsində Rusiyanın müttəfiqi deyil, bu, bizim səmimi mövqeyimizdir". Ruslar bunu yaxşı qarşılamır, o səbəbdən Ermənistanı yeni problemlər gözləyir. Rusiyada gizlənən Ukrayna Ali Radasının keçmiş deputatı Spiridon Kilinkarov da baş verənlər fonunda Qərbin ikili oyunlarına diqqət çəkib: "Bu vəziyyətdə Rusiya deyil, Ermənistan zəifdir. İrəvanın, əlbəttə ki, lazım bildiyi nöqteyi-nəzərini ifadə etmək hüququ var, amma bu, Paşinyanın böyük səhvidir. Ermənistanın Ukrayna mövzusunda Rusiyanın müttəfiqi olmadığı barədə bəyanat verən Paşinyan Qərbdən heç bir təminat almadı və üstəlik, Rusiyadan da bütün zəmanəti itirdi. Beləliklə o, problemləri ilə tək qaldı. Ermənistan çox çətin vəziyyətə düşəcək və eyni zamanda Rusiyanın dəstəyi olmayacaq, Qərb də onları sadəcə dəstəkləməyəcək. Ermənistan təhlükəsizlik istəyirsə, o zaman anlamalıdır ki, bu təhlükəsizliyi sözdə və ya kağıza imza atmaqla deyil, kim həqiqətən də təmin edə bilər. Bunun əsasında müvafiq qərarlar qəbul edilməlidir. Ancaq bunun üçün müstəqil olmalı və bu marağın nə olduğunu başa düşməlisiniz. Düşünürəm ki, Ukrayna da çoxlu siyasi səhvlərə yol verib. İstifadə olunmayan bir çox variant var idi. Ermənistanda da vəziyyət eynidir. İmkanlar var idi, variantlar var idi, lakin yanlış siyasi qərarlar verildi və göründü ki, onlar nələrə gətirib çıxartdı". Bunlar fonunda məsələyə "vestikavkaza" nəşri də diqqət edərək yazır: "Rusiya ilə Qərbin qarşıdurması kontekstində rusiyalı həmkarlarının artıq dəvət olunmadığı məkanlarda postsovet liderlərinin peyda olması həmişə Moskvada böyük maraq doğurur. Bura Rusiya prezidenti Vladimir Putinin uzun müddətdir iştirak etmədiyi Davos Forumu və Münhen Təhlükəsizlik Konfransı daxildir. Bu hadisələrin əsas mövzularından biri Ukrayna hadisələridir. Vladimir Zelenski Kiyevin təhlükəsizliyinə zəmanət, NATO-ya üzvlük, maliyyə və Ukrayna Silahlı Qüvvələrinin silahları ilə bağlı sövdələşmələr aparmaq üçün bu cür formatlardan istifadə etməyə çalışır. Əgər Avropa ölkələrinin və Zelenskinin davranışı hələ də hansısa məntiqə uyğun gəlirsə, o zaman əvvəllər bitərəf olan Finlandiya və İsveç kimi ölkələrin, eləcə də Moskvanın müttəfiqlərinin münaqişəyə cəlb olunması çaşqınlıq yaradır. Söhbət Ermənistanın baş naziri Nikol Paşinyandan gedir. Əvvəllər siyasətçi artıq bir sıra qəribə açıqlamaları ilə diqqət çəkib, lakin hər dəfə ekspertlər əmin olurlar ki, bunlar sadəcə istisnalar deyil, müəyyən tendensiyadır. Münhendəki konfrans yalnız bunun təsdiqi idi. Qərb dünyasının ürəyində dayanan Paşinyan açıq şəkildə bildirdi ki, KTMT və Aİİ-yə üzvlük sadəcə formallıqdır və Ermənistan artıq Rusiyanın müttəfiqi deyil.
Paşinyanın bəyanatında iki əsas mesaj var. Birincisi, o, Qərbə başa salmaq istəyir ki, Ermənistan Ukraynada xüsusi hərbi əməliyyatı dəstəkləmir və hətta onu pisləyir. Yəni rəsmi İrəvan Kiyevin rus qoşunlarının təkcə 2022-ci il sərhədlərinə deyil, həm də 2014-cü il sərhədlərinə çıxarılması tələblərini dəstəkləyir. Məlumdur ki, Ermənistan Krımın Rusiyaya birləşdirilməsini tanımır. İkinci mesaj ondan ibarətdir ki, Paşinyan Avropa Birliyinin Vahid Xarici və Təhlükəsizlik Siyasətinə sığmağa çalışır. Xatırladaq ki, ötən il Aİ-nin yüksək səviyyəli rəsmiləri Ursula fon der Leyen və Cozep Borrell Gürcüstana səfər zamanı açıq şəkildə bildirmişdilər ki, Tiflis namizəd üzvlük statusu almaq istəyirsə, o zaman Gürcüstan Rusiya ilə bağlı dəqiq mövqe tutmalı və ona qarşı sanksiyalar tətbiq etməlidir. Paşinyan daha əvvəl bəyan edib ki, Ermənistan Aİ-yə daxil olmağa çalışır və Brüsselin hazır olduğu dərəcədə onunla inteqrasiyaya hazırdır. Beləliklə, Münhendə Ermənistanın baş naziri yalnız Avropaya inteqrasiyaya sadiqliyini təsdiqlədi ki, bunun da əsas meyarlarından biri hazırda Rusiyanın xarici siyasətinin pislənməsidir. Sərhədlərin toxunulmazlığı mövzusuna gəlincə, Paşinyanın bu tezisi, bir müddət əvvəl Ermənistan Silahlı Qüvvələri tərəfindən işğal olunmuş Azərbaycanın Şuşa şəhərində rəqs etdiyini və Qarabağın ilhaqını dəstəklədiyini nəzərə alsaq, xüsusilə qəribə səslənir. İndi təbii ki, Paşinyanın ritorikası dəyişib. Qarabağ müharibəsindəki məğlubiyyətdən sonra Ermənistanın tərkibində qalan əraziləri necə itirməmək barədə düşünür. Lakin bu, fürsətçi mövqedir. Əgər Qarabağ hələ də Ermənistanın işğalı altında olsaydı, Paşinyan sərhədlərin bütövlüyü məsələsini gündəmə gətirməzdi. Paşinyan administrasiyasının bir çox digər anti-Rusiya bəyanatları və hərəkətləri barədə əvvəllər yazmışdıq. Bu, Paşinyanın həyat yoldaşının Kiyevə səfəri və ölkənin Roma Statutuna qoşulması, Ermənistanın baş nazirinin KTMT iclasında iştirakdan imtina etməsi və Rusiyanın "etibarsız" tərəfdaş kimi göstərilməsidir. Yəqin ki, Kreml Paşinyan və hazırkı rəsmi İrəvanın müttəfiq kimi etibarlılığı ilə bağlı daha bir nəticə çıxaracaq. Lakin Ermənistana münasibətdə "müttəfiq" ifadəsi uzun müddətdir ki, münasibətlərin səviyyəsinin rəsmi təyinatı kimi deyil, köhnəlmiş formallıq kimi səslənir".
Samirə SƏFƏROVA
