Tofiq Abbasov: "Bu, digər xalqların, toplumların problemi deyil, sırf erməni cəmiyyətinin əzəli xəstəliyidir"
Erməni mediası İlham Əliyevin Türkiyə səfərindən ermənilərin ciddi narahat olduqlarını hiss etdirir. Onların mediası belə təqdimat edir ki, sanki bütün bu görüş, əldə olunan razılaşmaların hamısı Ermənistanın məhvi üçündür. Ermənistanın bu təlaşı nə ilə bağlıdır?
Siyasi şərhçi Tofiq Abbasov "Bakı-Xəbər"ə açıqlamasında bildirdi ki, Ermənistanın əzəli adətidir, bölgədə, ətrafda nə baş versə, hər şeyin özünə aid olduğunu düşünsün: "Guya o elə bir qüdrət sahibidir ki, Azərbaycanla Türkiyə Ermənistanı məhv etmək üçün xüsusi hazırlıq işləri aparırlar. Qətiyyən bu belə deyil. Belə acınacaqlı fikirlər yalnız idbar xislətdə olanlara yaraşır. Onlar özləri dağıdıcı planlara, məhvedici işlərə hazırlıqlar görürlər ki, elə bilirlər qarşı tərəf də eyni fikirdədir. Təbii ki, Azərbaycanla Türkiyə təhlükəsizlik məsələlərinə çox önəm verirlər. Burada söhbət tək Ermənistandan getmir. Ondan kölə kimi istifadə edənlər var. Makron, Kanadanın, Belçikanın rəhbərlikləri Ermənistandan istifafə edib, Cənubi Qafqazda problem yaratmaq, öz mövqelərini gücləndirmək istəyirlər. Ancaq biz çalışırıq ki, burada sabitlik pozulmasın, digər tərəfdən də bizim münasibətlərimizi reqlamentləşdirən xeyli sayda razılaşma və sənədlər var. Söhbət ilk növbədə inteqrasiya layihələrindən gedir. Bu istiqamətdə Azərbaycan xüsusilə məhsuldardır, Türkiyə də bizim səviyyəmizdədir. Biz öz imkanlarımızı bir yerə toplayıb hərəkətə başladıqda, böyük effektlər yarada bilirik. Ermənilər bunu anlaya bilmirlər, çünki onlar qurucu işlərdən xalidirlər. Biz görürük ki, onlar nə dərəcədə sülh mövzusunu böyük dəhşətlə qəbul edir. Halbuki, sülh hər kəsə lazımdır. Ancaq Ermənistan cəmiyyəti hələ də yanlış fikirdədir. Bir qayda olaraq, onlar hər bir şeydə türklərin, türk toplumlarının guya özlərinə tuşlanmış təhdidlərini görürlər. Ancaq bu belə deyil. Biz bir daha şahid olduq ki, Azərbaycanla Türkiyənin münasibətləri etibar üzərində qurulmuş münasibətlərdir. Biz ən strateji sahələrdə, hərbi-sənaye inkişafı baxımından, iqtisadi və investisiya baxımında bir - birimizi çox uğurlu tərzdə tamamlayırıq. Dünən imzalanmış üç rəsmi sənəd göstərdi ki, bizim xalqımız, siyasi elitamız nə dərəcədə gələcəyin perspektivini cıza bilir, uzağı görürlər. Birgə universitetimizin də yaranması bu istəkdən irəli gəlir ki, xalqlarımız həm kadr hazırlığında, həm mütəxəssislərin püxtələşməsində elə bir durum yaradır ki, bizim texnoloji qazanclarımız daha da gözəçarpan olsun. Odur ki, ermənilər növbəti dəfə yanılırlar və həqiqətən də reallıqla rabitəni qura bilmirlər. Bu, digər xalqların, toplumların problemi deyil, sırf erməni cəmiyyətinin əzəli xəstəliyidir. Ancaq bundan sonra başqalarına mane olmağa onlara imkan verilməyəcək".
Məhəmmədəli QƏRİBLİ
