İbrahim Rüstəmli: "Türkiyə ilə hərbi sənaye sahəsindəki əlaqələrin dərinləşməsinin əhəmiyyəti çox böyükdür"
"Bu gün təbii ki, müdafiə sənayesi sahəsində yeni imkanlar açılıb. Bu barədə də geniş müzakirələr aparıldı, ortaq istehsalla bağlı konkret planlarımız var". Bu barədə Prezident İlham Əliyev Türkiyə Prezidenti Rəcəb Tayyib Ərdoğanla mətbuata bəyanatında bildirib.
Prezident Əliyev deyib ki, bu planlar gerçəkləşdikdə insanlar da, ictimaiyyət də bundan xəbərdar olacaq.
"Elə bilirəm ki, ən yaxın vaxtlarda Azərbaycan Türkiyə hərbi sənayesi sahəsindəki ənənələrin ölkəmizə etap olunmasına nail olacaq"
Hərbi ekspert İbrahim Rüstəmli "Bakı-Xəbər"ə şərhində bildirdi ki, Prezient İlham Əliyev olduqca vacib olan bir məsələ barədə mesaj verib. "Bu, Azərbaycan hərbi institutunda çox ciddi məsələlərdən biri kimi daim ön planda saxlanılır. Bilirsiz ki, Azərbaycan dünyanın 30-dan çox inkişaf etmiş ölkəsi ilə hərbi sahədə bir, iki və daha çoxtərəfli müqavilələr imzalayıb. Bu müqavilələrin bir qismi, təbii ki, hərbi sənayemizin inkişafı ilə bağlıdır. Çünki ordu cəbbəxanasının daim təkmilləşdirilməsi, ordu kadrlarının yeni prinsiplər, yeni tələblər üzərində hazırlanması günün ən vacib məsələlərindəndir. Təbii ki, müqavilə bağladığımız ölkələr arasında Türkiyənin xüsusi yeri və əhəmiyyəti var. Son yüz il ərzində Türkiyə hərbi sənaye sahəsində özünün ən böyük uğurlu addımlarını məhz indiki dövrdə atıb. Bu uğurlar göz önündədir. Sözsüz ki, bir sıra Qərb, Avropa ölkələri Türkiyənin hərbi sənaye sahəsində əldə etdiyi uğurları sinirə bilmirlər. Çünki bu uğurlar həqiqətən də, deyərdim ki, günün tələblərinin üst qatında əldə olunmuş uğurlardır. Bu mənada qardaş Türkiyə kimi dövlətlə Azərbaycan arasında hərbi sənaye sahəsindəki əlaqələrin inkişaf etdirilməsi çox önəmlidir. İlk növbədə ən önəmlisi Türkiyə Azərbaycan üçün qardaş dövlətdir, Türkiyə Azərbaycanı sevən dövlətdir, onun Prezidenti başda olmaqla, Türkiyə xalqının Azərbaycan xalqına bəllidir, həmçinin Azərbaycan Prezidenti İlham Əliyevin və Azərbaycan xalqının Türkiyə ilə bağlı eyni mövqeni ifadə edən münasibəti də həmişə aydın olub. Yəni bu münasibətlərin indiki dövrdə dinamik bir şəkildə inkişafı Azərbaycan üçün xüsusilə əhəmiyyətlidir. Məhz bu əlaqələrin genişlənməsi sahəsində biz 44 günlük Vətən müharibəsində çox böyük uğurlara imza atdıq"-deyə İ.Rüstəmli vurğuladı.
İ.Rüstəmlinin sözlərinə görə, bu uğurlarda Türkiyə hərbi sənayesinin istehsalı olan hərbi avadanlıqların, silah-sursatın, eyni zamanda bu hərbi avadanlıqları, silah-sursatı, texnikanı idarə edəcək kadrların hazırlanması və bu hazırlıq işində Türkiyənin oynadığı rol, əlbəttə ki, danılmazdır, müəyyənedicidir. "Bu strateji və taktiki baxımdan yüksək əhəmiyyət daşıyır. Bilirsiz, bəzi məsələlər haqqında əvvəlcədən danışmaq düzgün deyil. Xüsusilə söhbət hərbidən gedəndə biz bu msələlərdə müəyyən məxfilik prinsiplərini mütləq qorumalıyıq. Xatırlayırsınızsa, cənab Prezident 44 günlük Vətən müharibəsi zamanı da, ondan əvvəl də, "nəyin nə zaman edilməsini mən hamıdan yaxşı bilirəm" deməklə sadəcə insanları sakitləşdirmək, onların bu məsələyə münasibətini bir qədər soyutmaq, yaxud dondurmaq niyyəti güdmürdü. Əksinə, cənab Prezidentin bu məsələ ilə bağlı çox böyük planları vardı (söhbət Qarabağdan gedir)".
İ.Rüstəmli qeyd etdi ki, bu planların reallaşması istiqamətində məxfilik prinspilərinin qorunması, informasiya təhlükəsizliyi, kiber hücumların qarşısının alınması və sair məsələlər öz nəticəsini verdi. "Türkiyə ilə hərbi sənaye sahəsindəki əlaqələrin dərinləşməsinin əhəmiyyəti çox böyükdür. Bir daha təkrar edirəm ki, Türkiyə hərbi sənaye sahəsində son illər ən böyük uğurlara imza atıb. Biz bu uğurlara şahid olduqca qardaş bir dövlət kimi sevinirik. Yəni Azərbaycan Türkiyə hərbi sənayesindən, texnologiyalarından, xüsusən uçan pilotsuz aparatlarının inkişafından və onların döyüş qabiliyyətindən istifadə etməklə, o texnologiyanı öyrənməklə çox böyük uğurlara nail olacaq. Bu texnologiyanın Azərbaycana etap olunması, köçürülməsi işi də çox böyük uğurla həyata keçirilir. Bunu Azərbaycan hərbi sənayesinin də uğuru kimi dəyərləndirirəm. Əlbəttə, qarşılıqlı əlaqələr olmadan, dövlətlərlə dostluq, qardaşlıq, hərbi, siyasi, iqtisadi, sosial, mədəni sahədə əlaqə qurmadan inkişaf mümkün deyil. Bu dünyadır, bu dünyadan da Azərbaycan özünü təcrid edə bilməz. Azərbaycan özünün konstision hüquqlarından istifadə edərək ordusunu daim gücləndirməlidir. Prezident dəfələrlə bəyan edib ki, ordu bizim üçün həmişə olduğu kimi bu gün də prioritet olaraq qalır"-deyə qeyd edən hərbi ekspert hesab edir ki, hərbi sənayemizin inkişaf etməsi, hərbi sənayemizin də inkişafında bir növ Türkiyə ilə imzalanmış qarşılıqlı müqavilələr əsasında baş verən proseslər Azərbaycan üçün çox böyük bir şansdır. "Bu şansı yüksək dəyərləndirirəm. Elə bilirəm ki, ən yaxın vaxtlarda Azərbaycan Türkiyə hərbi sənayesi sahəsindəki ənənələrin ölkəmizə etap olunmasına nail olacaq. Bu, Azərbaycanın müstəqilliyini şərtləndirən əsas məsələlərdən birinə çevriləcək və gələcək uğurlarımızın əsas leytmotivinə çevriləcək"-deyə İ.Rüstəmli qeyd etdi.
İradə SARIYEVA
