Rövşən Məhərrəmov: "Yeni dəniz flotiliyasının təşkili və orda üzən gəmilərin üzərində də hava hücumundan müdafiə sistemlərinin qurulması nəzərdə tutulur"
Prezident İlham Əliyevin Türkiyəyə səfəri zamanı iki ölkə arasında birgə ordu quruculuğunun perspektivləri müzakirə edilib. Məlum olduğu kimi, əməkdaşlığımızın önəmli istiqamətlərindən biri də hərbi sahədə işbirliyidir.
Artıq bizim ordularımız bir yumruq anlamına gəlib, hər il ən azı 10 hərbi təlim həm Türkiyədə, həm Azərbaycanda keçirilir və beləliklə, bizim hərbi gücümüz daha da artır.
Ordu sahəsində birgə əməkdaşlığın reallaşması kontekstində birgə qoşunlar, birgə hava hücumundan müdafiə sistemləri yaradıla bilərmi?
Hərbi-siyasi şərhçi, ehtiyatda olan polkovnik Rövşən Məmmədov "Bakı-Xəbər"ə açıqlamasında bildirdi ki, Türkiyə ilə Azərbaycan arasında hərbi sahədəki əməkdaşlıq davam edir: "Prezident də qeyd etdi ki, artıq biz Türkiyə modelinə keçmişik. Bilirsiniz ki, hava məkanının qorunması üçün Türkiyə ilə Azərbaycan arasında Xəzər dənizində birgə hava hücumundan mühafizə sistemlərinin qurulması ilə bağlı razılaşma var. Hərbi sahədə birgə əməkdaşlıq kontekstində pilotsuz uçuş aparatlarının istehsalı da planlaşdırılır. Hava hücumundan müdafiə sistemində vəziyyət belədir ki, Türkiyə öz hava məkanını F-16 və Rusiyadan aldıqları S 400-lə qoruyur. "Akıncı" adlı pilotsuz uçuş aparatlarından da bu məqsədlə istifadə edirlər. Bu aparatlar çox müasirdi və onların Azərbaycanda da istehsalı ordumuzun arsenalını zəngin edəcək. Azərbaycanın özünün də təşkil etdiyi hava hücumundan müdafiə sistemləri mükəmməldir. Biz bu məqsədlə İsraildən güclü və bahalı silahlar almışıq. Bir də yeni dəniz flotiliyasının təşkili və orda üzən gəmilərin üzərində də hava hücumundan müdafiə sistemlərinin qurulması nəzərdə tutulur. Belə bir razılaşma Türkiyə ilə Qazaxıstan arasında da olub. Belə yaxınlaşma bizim doğrudan da qardaş ölkə olmağımızdan xəbər verir. Azərbaycanın belə müasir silahları əldə etməsi çox mükəmməldir. 44 günlük müharibədə biz həmin silahların çoxunu uğurla sınaqdan keçirdik. Bu istiqamətdə Azərbaycan xeyli yol gedib. Ümidvarıq ki, bundan sonra birgə səylərimiz nəticəsində bu istiqamətdə daha böyük uğurlara imza atacayğıq. Bizim Türkiyə ilə hərbi əməkdaşlığımız çoxşaxəlidir və yalnız bu sahəni əhatə etmir. Qeyd edək ki, Azərbaycan–Türkiyə qardaşlığa söykənmiş əlaqələri, müttəfiqliyi, xüsusən də hərbi müttəfiqliyi, bütövlükdə Avrasiya məkanında sülh və təhlükəsizlik üçün son dəcərə müstəsna təminatdır. Hesab edirik ki, bu mənada üzərində dayanılmalı olan başlıca məqam İkinci Qarabağ müharibəsidir. Qardaşlığın mühüm sınağı olan bu müharibə hər iki dövlətin mətanət, iradə və dözümünün birgə təzahürünə, nəsillərə miras qalacaq nümunəsinə çevrildi. Onu da nəzərə alaq ki, bir sıra sənədlərlə, xüsusilə də Şuşa Bəyannaməsi ilə möhkəmlənmiş iki ölkənin strateji müttəfiqliyi istər regional, istər beynəlxalq məsələlərdə dövlətlərin bir-birinə dəstəyi baxımından son dərəcə vacibdir".
Məhəmmədəli QƏRİBLİ
