Faiq İsmayılov: "Onların bu addımları da sübutsuz və əsassızdır, bu fəaliyyətləri də fiaskoya uğrayacaq"
Vaxtilə Çar Rusiyasının Şimal paytaxtı olan Sankt-Peterburqda uzun illərdir ki, Azərbaycana qarşı müxtəlif təxribatlar baş verir. Hayların Cənubi Qafqaza, xüsusən də Azərbaycan ərazilərinə köçürülməsini həyata keçirən Çar Rusiyası bununla xalqımıza böyük zərbə vurub, ərazilərimizin parçalanmasına səbəb olub. Çox təəssüflər olsun ki, 200 ildən çoxdur hayların saxta mədəniyyətinin təbliğində bu şəhər ayrıca rol oynayır.
Bilirik ki, saxta erməni "mədəni irsi"nin təbliğində Sankt-Peterbruqdakı Ermitaj muzeyi, onun rəhbərliyi daha çox aktivlik göstərir.
Erməni mediasının yaydığı yeni məlumata görə, fevralın 25-də Sankt-Peterburqda "Bakıda erməni tarixi və mədəni izi" adlı sərgi açılacaq.
Qəribədir, sərginin məqsədi neft sənayeçilərinin, memar və inşaatçıların, erməni əsilli idmançıların və mədəniyyət xadimlərinin guya Bakı şəhərinin "əsrlər boyu inkişafına verdiyi əvəzsiz töhfə"ni nümayiş etdirməkdir.
"Sərginin ziyarətçilərinə 1987-ci ildə Bakıdakı Müqəddəs Qriqori erməni kilsəsində sonuncu Pasxa mərasiminin unikal videomaterialları, həmçinin Müqəddəs Faddey və Varfolomey kilsəsinin yenidən yaradılmış 3D modeli təqdim olunacaq"-deyə dezinformasiyada bildirilir.
Əvvəlcədən qeyd edək ki, Müqəddəs Faddey və Varfolomeyin haylara heç bir aidiyyəti yoxdur, onların alban irsi ilə əlaqəsi var, eyni zamanda bunlar Albaniyada ilk xristinalığı yayan şəxslərdir. Moisey Kalankatlı yazır ki, xristianlığın Albaniyaya nüfuz etməsi, burada erkən xristian icmasının yaranması həm həvari Müqəddəs Varfolomeyin, həm də həvari Müqəddəs Faddeyin adları ilə bağlıdır. Göründüyü kimi, burada hayların adları belə çəkilmir.
"O ki qaldı "erməni mədəni irsinin izlərinin Bakıda" axtarılmasına, bu absurddur"
AMEA-nın A.Bakıxanov adına Tarix və Etnologiya İnstitutunun əməkdaşı, mədəni irs üzrə ekspert Faiq İsmayılov "Bakı-Xəbər"ə şərhində bildirdi ki, Bakıda heç bir erməni irsi yoxdur və ermənilər Azərbaycanın paytaxtında heç bir irsə sahib deyillər. F.İsmayılov qeyd etdi ki, Bakının mərkəzindəki erməni Qriqoryan kilsəsinin isə inşa tarixi məlumdur və indiki Ermənistan ərazində müsəlman dini abidələri yerlə-yeksan edilsə də, Azərbaycan dövləti bu kilsəni qoruyub.
"Ermənilərin bu motivli təbliğatı siyasi xarakter daşıyır. Burada heç bir erməni mədəni irsindən söhbət gedə bilməz. Xüsusən də Bakıda. Bakıda bir erməni kilsəsi var, o da XIX əsrdə tikilib. Bu ümumikdə dini abidədir. Bunun Azərbaycan mədəniyyət tarixi üçün o qədər böyük əhəmiyyəti yoxdur. Yəni onun qiymətli bir tarix-mədəniyyət abidəsi kimi qeydə alınması da mümkün deyil ki, sabah bunun məsələsini ermənilər UNESCO-da qaldırsın və sair. Sıradan bir dini abidədəir. Bu da xristianlığın yayılması üçün əsas yaradan tikililərdən biridir. Qaldı ki, "erməni mədəni irsinin izlərinin Bakıda" axtarılmasına, bu absurddur. Erməni "mədəni irsinin izləri"nin nəinki Bakıda, Azərbaycanın heç bir yerində, o cümlədən də işğaldan azad edilən ərazilərdə axtarılması gülüncdür. Həmçinin indi Ermənistan adlandırılan Qərbi Azərbaycanda "erməni mədəni irsinin" axtarılması heç bir fayda verməyəcək. Ona görə ki, bu ərazidə olan bütün tarix və mədəniyyət abidələrinin, istər xristianlıq dövrünə qədər, istər xristianlq dövürə aid, istərsə də ondan sonrakı dövrə aid olan abidələrin ermənilərə heç bir aidiyyəti yoxdur. Ermənilər və onların dəm tutanları bu gün rəsmi Bakını hardasa, nədəsə suçlamaq üçün tutacaq axtarırlar. Amma bu axtarışlar da mənasızdır"-deyən F.İsmayılov əminliklə bildirdi ki, ermənilərin və onların havadarlarının Sankt-Peterburqda açacaqları sərginin heç bir mahiyyəti, əhəmiyyəti yoxdur. "Bu sərgi də növbəti şou olacaq. Erməni diasporunun xətti ilə onlar Azərbaycana, Bakıya qarşı növbəti dəfə ərazi iddialarında bulunurlar. Bu saxta məlumatlarla Azərbaycanı ittiham etməyə çalışırlar. Onların bu addımları da sübutsuz və əsassızdır, bu fəaliyyətləri də fiaskoya uğrayacaq"-deyə F.İsmayılov qeyd etdi.
O bildirdi ki, ermənilər açacaqları növbəti saxta sərgi ilə dünya mədəniyyət xadimlərinin diqqətini cəlb edə bilməyəcəklər.
İradə SARIYEVA
