Təbriz Musayev: "İlk növbədə ümumtəhsil məktəblərində təhsilin keyfiyyəti qaldırılmalıdır"
Prezident İlham Əliyev andiçmə mərasimindəki çıxışında ailə və məktəbin rolu barədə bir sıra məqamlara toxundu. Ölkə başçısının fikrincə, biz elə bir gənc nəsil yetişdirməliyik ki, onlar da daim bizim kimi milli ənənələrə, milli-mənəvi dəyərlərə sadiq olsunlar, beyinləri saf olsun:
"Heç kim onların beyinlərini zəhərləmək istəyəndə uğura nail olmasın və burada, əlbəttə ki, ilk növbədə, ailə tərbiyəsi ön plana çıxır. Xoşbəxtlikdən, Azərbaycan ailəsi sağlam ailədir, ənənələr, milli dəyərlər üzərində qurulan ailədir. Ailə tərbiyəsi hər bir gənc üçün, hər bir uşaq üçün əsas tərbiyədir. İkinci yerdə məktəb tərbiyəsidir və belə müzəffər gənclərimizin yetişdirilməsində də Azərbaycan məktəbinin çox böyük rolu vardır. Gənclərimizin milli ruhda tərbiyə edilməsi, ənənəvi dəyərlər əsasında tərbiyə edilməsi, dırnaqarası mütərəqqi və yad dəyərlərin tamamilə cəmiyyətimizdən silinməsi - bu vəzifə bizim hamımızın qarşısında durur, hər bir ailə qarşısında durur və dövlət qarşısında durur".
Bu iki məsələnin vəhdəti çox vacibdir. Çünki ailə və məktəb gənclərin formalaşmasında, vətənpərvər ruhda böyüməsində birbaşa iştirak edir. Ailə və məktəb tərbiyəsi arasında dinamik əlaqənin təmin olunması, bu məsələdə fasilənin yaranmasına imkan verilməməsi və bir-birini tamamlaması çox vacibdir. Hər iki sahə ilə bağlı olan müvafiq icra, hökumət orqanlarının fəaliyyəti və s. amillər vacibdir. Bu prosesə mane olan hansı neqativlər var? Təhsil müəssisələri, Ailə, Qadın və Uşaq Problemləri üzrə Dövlət Komitəsi və digər müvafiq icra orqanları Prezidentin sözlərindən hansı nəticələri çıxarmalıdır?
"Təhsil, Gənclər və İdman nazirlikləri, AQUPDK və QHT-lər gənclərlə bağlı müasir tələblərə uyğun vahid konsepsiya hazırlamalıdır"
Məsələ ilə bağlı "Bakı-Xəbər"ə açıqlama verən İrəvan Azadlıq Təşkilatının sədri Təbriz Musayev hesab edir ki, sadalanan məsələlərlə bağlı müvafiq qurumların üzərinə böyük məsuliyyət düşür: "Prezidentin bu məsələyə toxunması çox ciddi məqamlardan xəbər verir. Məsələ ondadır ki, sürət və internet əsrində yaşadığımız üçün gənclərin formalaşmasına qlobal xarici təsirlər artıb. Müxtəlif səbəblərdən gənclər xarici təsirlərin altına düşür. Xüsusən də xarici dini təsirlər daha çox özünü göstərir. Təbii ki, ailə tərbiyəsi güclü olarsa, məktəbdə təhsilin səviyyəsi üstün olarsa, bunlar bir-birini tamamlayarsa bütün bunlar baş verməyəcək. Yaxud da çox minimum səviyyədə olacaq. Ona görə də ilk növbətə ümumtəhsil məktəblərində təhsilin keyfiyyəti qaldırılmalıdır. Bu sahədə ciddi problemlər var. Bunun bariz göstəricilərindən biri abituryentlərin əksəriyyətinin repetitor hesabına ali məktəblərə daxil olmasıdır. Çox vaxt cahillik və savadsızlıq üzündən gənclər xarici təsirlərin altına düşür. Təhsildən kənarda qalmaları buna münbit zəmin yaradır. Ailə, Qadın və Uşaq Problemləri üzrə Dövlət Komitəsi belə ailələrlə işləməlidir. Potensial təhlükə yarada biləcək belə hallar önlənməlidir. Təhsil Nazirliyi, Gənclər və İdman Nazirliyi, AQUPDK və QHT-lər gənclərlə bağlı müasir tələblərə uyğun vahid konsepsiya hazırlamalıdır. Bu konsepsiyada inkişaf istiqamətləri aydın şəkildə göstərilməlidir. Bunların işləkliyi təmin olunmalıdır. Əlbəttə ki, bunun hazırlanması işinə təcrübəli mütəxəssislər cəlb olunmalıdır. Bəyənmədiyimiz SSRİ-də pioner düşərgələri var idi. Ancaq bu gün əksər rayonlarda gənclər evlərinin qapısı bağlıdır. Zamanında müvafiq qurumlar işləsəydilər, bəzi gənclərimiz Suriyada İŞİD terrorçularına qoşulmazdı, narkomaniyaya aludə olmazdılar. Məktəblərdə şagirdlər siqaret çəkir, bir sıra ailələr uşağın təlim-tərbiyəsi ilə maraqlanmır və s. Deməyim odur ki, cavabdeh qurumlar kompleks praktiki gücə malik fəaliyyət proqramı ortaya qoymalıdılar. Müharibədə qalib gəlmişik deyə arxayınlaşmaq olmaz".
Vidadi ORDAHALLI
