Ceyhun Məmmədov: "Burada, əlbəttə, Ermənistan qədər Qərb dövlətləri, beynəlxalq təşkilatlar da məsuliyyət daşıyır"
"İkinci Qarabağ müharibəsi şanlı tariximizdir. Ancaq müharibə olmaya bilərdi, əgər Ermənistan və onun rəhbərliyi, onun arxasında dayanan qüvvələr beynəlxalq hüquqa əməl etsəydilər, BMT Təhlükəsizlik Şurasının dörd qətnaməsinə əməl etsəydilər. Əgər böyük dövlətlər Ermənistana onun işğalçılıq siyasətinə görə sanksiyalar tətbiq etsəydilər, heç olmasa, onların işğalçılıq siyasətini pisləsəydilər, bəlkə də müharibəyə ehtiyac qalmazdı. Azərbaycan dövləti uzun illər ərzində təmkinlilik göstərirdi, eyni zamanda, aparılan danışıqlara sadiqlik göstərirdi. Baxmayaraq ki, illər keçdikcə bizim ümidlərimiz də tükənirdi, işğalçı dövlət daha da azğınlaşırdı, hesab edirdi ki, bizim torpaqlarımızı əbədi işğal altında saxlaya bilər". Bu sözləri Prezident İlham Əliyev fevralın 14-də keçirilən andiçmə mərasimindəki nitqində deyib.
"Ermənistana təzyiq göstərilmədi, eyni zamanda sanksiya tətbiq edilmədi"
Millət vəkili Ceyhun Məmmədov "Bakı-Xəbər"ə şərhində "Cənab Prezidentin parlamentdəki çıxışında ən çox üzərində durduğu məsələlərdən biri də qeyd olunan məsələdir. Azərbaycan uzun müddət böyük səbr və təmkinlə Ermənistanın torpaqlarımızı azad etməsini gözlədi. Ancaq təəssüflə qeyd etmək lazımdır ki, Ermənistan isə yalnız torpaqları işağalda saxlamaq barədə düşündü, danışıqlar prosesini yalnız və yalnız uzaqtmağa, imitasiya etməyə çalışdı. Yekun olaraq artıq Azərbaycanın başqa yolu yox idi. Azərbaycan öz torpaqlarını müharibə yolu ilə azad etməli idi. Bunu da etdi. Bu həm də onu göstərir ki, bu gün də olduğu kimi, hər zaman Qərb dövlətləri yenə imitasiya ilə, tarixi saxtalaşdırmaqla məşğuldurlar, daha çox təxribat törətməyi düşünürlər. Burada, əlbəttə, Ermənistan qədər də Qərb dövlətləri, beynəlxalq təşkilatlar məsuliyyət daşıyırlar. BMT qətnamələrinin icrası üçün heç bir real addım atılmadı, bu istiqamətdə heç bir real tədbir görülmədi, Ermənistana təzyiq göstərilmədi, eyni zamanda sanksiya tətbiq edilmədi"-deyə bildirdi.
C.Məmmədov qeyd etdi ki, Ermənistan da bundan istifadə edərək yenə də yeni təxribatlar, yeni işğallar barədə düşünməyə çalışdı. "Onlar düşünürdülər ki, zamanında Xankəndini bizdən aldılar, Zəngəzuru aldılar, indi də Qarabağı alacaqlar, Azərbaycan xalqı bu günü, bu tarixi unudacaq. Ancaq proses onu göstərdi ki, Azərbaycan unutmayıb, unutmayacaq və unutmaq niyyəti də yoxdur. Əlbəttə ki, Ermənistan sülh barədə düşünsəydi, torpaqları geri qaytarsaydı, Azərbaycana qarşı təxribatları davam etdirməsəydi proses bu qədər uzanmazdı və Ermənistanın bu qədər itkiləri olmazdı. Amma bunu etmədi, etmədiyinə görə də nəticələrə qatlanmalı oldu, bu gün də o əziyyəti çəkir, bölgəmizə də sülhün gəllməsi yubanır. Bütün hallarda Azərbaycan üzərinə düşəni edib, edir, edəcək də. Bu prosesdə yenə də ən çox itirən Ermənistan özü olacaq"-deyə millət vəkili qeyd etdi.
İradə SARIYEVA
