Turab Rzayev: "Hansısa dövlətin buna müdaxilə etməsi, öz maraqlarını ortaya qoyması Azərbaycan dövlətinin qəbul edə bilməyəcəyi bir mövqedir"
Fevralın 14-də keçirilən andiçmə mərasimində söylədiyi nitqində Prezident İlham Əliyev Azərbaycan-Ermənistan münasibətlərini müzakirə etmək, həmçinin iki ölkə arasında vasitəçilik etmək istəyənlərə də mesaj göndərib, bizə bu məsələdə vasitəçinin lazım olmadığını bəyan edib.
Azərbaycan-Ermənistan normallaşması prosesinin beynəlxalq gündəlikdən düşməli olduğunu diqqətə çatdıran dövlət başçısı bildirib: "İndi Ermənistan beynəlxalq hüququn normalarına riayət etmək istəyirsə, bu müqavilə imzalanacaq. İstəmirsə, yenə də bizə qarşı əsassız iddialar irəli sürüləcəksə, bu müqavilə imzalanmayacaq, ancaq Azərbaycan üçün heç nə dəyişməyəcək. Mən artıq dedim, bizim qarşımızda duran çağırışlara, bizə qarşı aparılan çirkin siyasətə biz onsuz da hazır olmalıyıq. Ona görə hesab edirəm ki, Azərbaycan-Ermənistan münasibətlərinin normallaşması prosesi beynəlxalq gündəlikdən düşməlidir. Çünki yerindən duran bu məsələ ilə məşğul olmaq istəyir, gedin, öz işinizlə məşğul olun. Ona görə mən bu mövzuya, ümumiyyətlə, çox vaxt ayırmaq istəmirəm, çünki buna dəyməz. Biz öz məsələmizi həll etmişik. Biz bu gün Ağdamdayıq, Füzulidəyik, Laçındayıq, Cəbrayıldayıq, Zəngilandayıq, Qubadlıdayıq, Kəlbəcərdəyik, Şuşadayıq, Hadrutdayıq, Xocalıdayıq, Ağdərədəyik, Əsgərandayıq, Xankəndidəyik!"
Prezidentin bu qəti mövqeyi Ermənistanın və onu dəstəkləyənlərin mövqeyinə necə təsir edəcək?
Siyasi şərhçi Turab Rzayev "Bakı-Xəbər"ə açıqlamasında bildirdi ki, cənab Prezident açıq şəkildə mesaj verdi: "Dedi ki, Ermənistan qərar verməlidir. Sülh istəyirsə, sülhə gəlsin. Delimitasiya və demarkasiya məsələsini yekunlaşdırmaq istəyirsə, bununla bağlı masaya otursun. Dövlətlər arasında yaradılmış komissiyanın şərtlərini həyata keçirsin. Eyni zamanda Naxçıvana gedən Zəngəzur dəhlizi ilə bağlı, Azərbaycana maneəsiz keçid verəcəksə, bununla bağlı da masaya otursun. Əgər Paşinyan Azərbaycanın guya sülh istəməməsini önə sürəcəksə, o zaman biz öz tədbirlərimizi görməyə məcbur olacağıq. Mən düşünürəm ki, bu məsələ ilə bağlı "Prezidentin vasitəçiyə ehtiyac yoxdur" fikri Azərbaycanın görüşlərdən imtina etməsi demək deyil. Bu, Ermənistanın hər hansı ölkəni özü üçün qaranti etməsinə qarşı bir tədbirdi. Biz fərqli platformada görüşlərdə iştirak etmişik. Soçidə, Moskvada, Brüsseldə keçirilən görüşləri buna misal göstərmək olar. Burda vasitəçi kimi Azərbaycan dövlətinin gözlədiyi ondan ibarətdir ki, bir masa qurulsun, Azərbaycanla Ermənistan onun arxasında söhbətini etsin. Hansısa dövlətin buna müdaxilə etməsi, öz maraqlarını ortaya qoyması Azərbaycan dövlətinin qəbul edə bilməyəcəyi bir mövqedir. Azərbaycan dəfələrlə bunu vurğulayıb ki, həmin dövlətlərin iştirakı sülh prosesini uzatmaq deməkdir. Azərbaycana Brüssel formatında görüşə Fransanın da daxil olmasını təklif etsələr də, Azərbaycan görüşə razı oldu, ancaq Brüssel formatını əvəz etməsini qəbul etmədi. Növbəti dəfə isə Almaniya və Fransanın iştirakı ilə etmək istədilər. Azərbaycan ümumiyətlə bu görüşdən imtina etdi. Açıq şəkildə öz xəttimizi ortaya qoyduq. Biz heç bir halda Brüssel formatını Almaniya və Fransa ilə əvəz etmək istəmirik. Burda söhbət tək Ermənistana yaxın olan Fransa kimi dövlətin orda olmasından getmir. Əsl məsələ odur ki, bu cür formatlar daha çox münaqişənin uzanmasına, real nəticənin gecikməsinə hesablanır və əlavə olaraq Paşinyan hakimiyyətinin dediyi kimi, müqaviləyə hansısa qarantor dövlətin salınması ümumiyyətlə Azərbaycan maraqlarına uyğun deyil. Faktiki olaraq, biz müharibə etmişik və qalib gəlmişik. İndi də müqavilə bağlamaq istəyirik. Bölgədə hansısa dövlətə qarantiya statusu verməyə ehtiyac yoxdur. Bu kifayət qədər ciddi bir mövzudur. Biz Ermənistanın istəyi ilə Fransaya, Almaniya və digər dövlətlərə o şəraiti verməməliyik. Çünki sabah həmin dövlət açıq şəkildə iddia edə bilər ki, Azərbaycan sülhün şərtlərini pozur və bunun nəticəsində də bölgəyə müdaxilə edərlər. Ona görə də, daha çox Azərbaycanla Ermənistan arasında görüş təşkil olunmalıdır".
Məhəmmədəli QƏRİBLİ
