Əli Orucov: "Paşinyanın həmin müsahibədə əvvəlki fikirləri təkrarlaması sülh prosesini baltalamaq idi"
Xəbər verildiyi kimi, fevralın 12-də Ermənistan növbəti dəfə Azərbaycanla sərhəddə təxribatlar törədib. Nəticədə sərhədçimiz yaralanıb. Cavab tədbirlərindən sonra isə Ermənistan ordusu dörd hərbçisini itirib.
O da məlumdur ki, Qarabağda ötən ilin sentyabrında keçirilən antiterror əməliyyatlarından sonra Ermənistanla sərhəddə sabitlik idi. Baş nazir Nikol Paşinyanın bu günlərdə Britaniyanın The Telegraph qəzetinə müsahibəsində bir sıra məsələləri təhrif etməsi hardasa təxribatın baş verməsində qızışdırıcı rol oynadı. Məsələn, həmin müsahibədə Paşinyan iddia edir ki, guya Azərbaycan 2021-ci ilin mayında və 2022-ci ilin sentyabrında baş verən hadisələr zamanı Ermənistan ərazilərini tutub. Digər tərəfdən, müsahibədə Nikol sərhədlərin delimitasiyası məsələsinə yenə də 70-ci illər xəritəsindən yanaşır. Deyir ki, 1991-ci ilin dekabrında Almatı Bəyannaməsi imzalananda sərhədlər haradan keçirdisə, ona istinad olunmalıdır. Halbuki, o vaxt Azərbaycanla Ermənistan arasında sərhəd yox idi. Deməli, əslində bu özü Azərbaycana qarşı ərazi iddiasındadır. Müsahibədə Azərbaycan qoşunlarının hazırda dayandığı mövqelərdən geri çəkilməsini istəyir.
Bir sözlə, Paşinyanın bir sıra mülahizələri hazırkı sülh danışıqları mühitini pozur və açıq-aşkar danışıqlardan yayınmaq jestləri nümayiş etdirir.
"İrəvan xarici havadarların dəstəyindən ruhlanaraq destruktiv mövqe tutmaqda, danışıqlar prosesini pozmaqda qərarlıdır"
Sözügedən məsələni "Bakı-Xəbər"ə şərh edən AMİP funksioneri Əli Orucov da hesab edir ki, Paşinyanın müsahibəsi son təxribatı körüklədi: "Zatən bunun elementləri görünürdü. Bir tərəfdən Fransa Ermənistanı silahlandırır, o biri tərəfdən bəzi Avropa İttifaqı rəsmiləri İrəvana dəstək xarakterli fikirlər səsləndirirlər. Nəticədə belə bir yanlış rəy formalaşdırırdılar ki, guya Ermənistan konstruktiv danışıqlarda maraqlıdır, Azərbaycan isə yox. Paşinyan və onun komandası bundan sui-istifadə edərək daha həyasız bəyanatlarla çıxış etməyə başladılar. Azərbaycanda prezident seçkiləri başa çatandan sonra sülh danışıqları prosesi sürətlənməli idi. O üzdən, sərhəddə yarana biləcək istənilən təxribatdan maksimum qaçmaq lazım idi. Ancaq Ermənistan bunun əksinə olaraq snayper atəşi ilə əsgərimizi yaraladı. Paşinyanın The Telegraph qəzetinə müsahibəsində əvvəlki fikirləri təkrarlaması sülh prosesini baltalamaq idi. Bu o demək idi ki, Ermənistanın sülh prosesi ilə bağlı mövqeyi dəyişməyib. İrəvan xarici havadarların ona verdiyi dəstəkdən ruhlanaraq destruktiv mövqe tutmaqda, danışıqlar prosesini pozmaqda qərarlıdır. Əsgərimizə açılan snayper atəşi bunun göstəricisi idi. Müsahibədə Paşinyanın səsləndirdiyi arqumentlər əsassız idi. Birincisi, Azərbaycan nə 2021-ci ildə, nə də 2022-ci ildə Ermənistan ərazisinə daxil olmayıb. Biz bizə məxsus olan ərazilərə ordumuzu yerləşdirmişik. İkincisi, Azərbaycan-Ermənistan sərhədi müstəqillikdən sonra delimitasiya olunmayıb. Ona görə ki, Ermənistan 30 il həm ərazilərimizi, həm də sərhədləri işğal altında saxlayıb. Daşkəsəndan başlayaraq Ağbəndə qədər Ermənistanla sərhədimiz işğal altında idi. Sərhədə belə önəm verirdilərsə, o zaman bununla bağlı tədbir görərdilər".
Vidadi ORDAHALLI
