Elxan Şıxəliyev: "Böyük marağı olan ölkələr bizi sülh sazişindən uzaqlaşdırırlar ki, müharibəyə daha uyğun vəziyyət yaransın"
Son təxribat nəticəsində əsgərimizə güllə atılan ərazi Avropa Birliyinin müşahidə missiyasının fəaliyyət dairəsinə aiddir və ərazidə baş verən atışmadan AB missiyası təbliğat, daha sonra isə Ermənistan Baş nazirinin "güzgü prinsipi" ilə orduların geri çəkilməsi təklifini aktuallaşdırmaq üçün istifadə etməsinin planlaşdırıldığı ehtimalı vardı.
AB diplomatiyasının rəhbəri Jozep Borrell Ermənistan xarici işlər naziri Ararat Mirzoyanla görüşdə bu mövzuya toxunmaqla planı faktiki olaraq deşifrə etdi. Borrell bildirib ki, Ermənistan tərəfinin Azərbaycan əsgərlərinə atəş açması təəssüf doğursa da, Azərbaycan qeyri-proporsional reaksiya verdi.
Bütün bunlar onu deməyə əsas verirmi ki, son təxribat Ermənistanın Avropa ilə birlikdə həyata keçirdiyi layihədir?
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə açıqlamasında bildirdi ki, bugünlərdə Zəngilan istaqəmətində ermənilər tərəfindən atəşkəsin pozulması və sərhədçimizin yaralanması gözlənilən ehtimallardan biri idi: "Mən bütün zamanlarda da deyirdim ki, Ermənistan bu və ya digər formada təxribat törədəcək. Yerini və zamanını isə özləri qərarlaşdıracaq. Ehtimallarımız isə, təəssüf ki, özünü doğrultdu. Biz bunu səbəb və nəticə konteksində qiymətləndirəndə Ermənistanın sülh sazişi ab-havasında hərəkət etməsinin səbəbi olmalıdır. Səbəb odur ki, Ermənistan həm sülh sazişinə hazır olmamasını sahədə baş verənlərlə əlaqələndirəcək, həm də Ermənistanda Avropa missiyasının, Ermənistanı dəstəkləyən qüvvələrin öz strateji maraqlarlarını həyata keçirməsinin yolunun müharibədən keçdiyinə işarə edəcək. Yəni birbaşa atəşkəsin pozulmasında iştirak edən adamlara diqqət edəndə görürük ki, şərti sərhədimizdə Ermənistanın silahlı qüvvələrinin sərhədçiləri olmalı olduğu halda, orda Ermənistanın terror təşkilatları üçün planlar hazırlayan mülki təşkilatın üzvləri peyda olub. Xüsusən də kəskin snayperlər, nişancılar məqsədli şəkildə yerləşdirilir. Onlar xüsusi tapşırıqla qarşı tərəfə itki verib gedənlərdi. Bunun adı təxribatdır. Bütün müharibələr də elə belə başlayır. Vəziyyətin gərginləşməsində həm də Avropa İttifaqının mülki missiyası maraqlıdır. Çünki o zolaqda ki onlar patrul nəzarət aparırlar, orada təxribat planlamasının içərisindədirlər. Bu və ya digər formada zaman - zaman Azərbaycan silahlı qüvvələrinə, sərhədçilərimizə qarşı təxribatlar törədəcəklər. Məqsəd, Azərbaycanla Ermənistanı böyük müharibəyə gətirib çıxarmaqdır. Böyük müharibə olarsa, böyük güclər öz çıxarlarını bunun üzərindən edərlər. İndi iki fərqli güc Ermənistanın ərazisindədir. Bütün fəaliyyətləri, silahlanmanı, hərbi - təhsil sistemini nəzarətə götürüblər. Ermənistanın müdafiə nazirinin müşavirini Fransanın briqada generalı səviyyəsində təyin ediblər. Silahlanma gedir, mülki missiyanı iki min nəfərə çatdırmaq istəyirlər. Bu, Avropa İttifaqının gələcək strateji niyyətlərini həyata keçirmək üçün hərbi gücün formalaşdırılmasıdır. Digər tərəfdən Rusiyanın da ümumi altı minə yaxın şəxsi heyəti Ermənistan ərazisindədir. Bu iki fərqli güc özünün münasibətlərini Ermənistan ərazisində aydınlaşdıracaq. Adətən bu birbaşa onların özləri arasında münaqişədən, hərbi əməliyyatdan keçməz. Ancaq Azərbaycanla Ermənistanı müharibə vəziyyətinə gətirib, öz münasibətlərini aydınlaşdıra bilərlər. Orda ikinci ölkələrin qüvvələri varsa, Ermənistan atəşkəsi pozmasa da günün birində ya Rusiya hərbiçiləri, ya da Avropa İttifaqının mülki missiyası ermənilərin formasında təxribat törədə bilər, müharibə başlayar. İndi göründü ki, Ermənistan şərti sərhədə nəzarət edə bilmir. Bir çox strateji maraqlar var ki, bizimlə Ermənistanın münasibətində özünü göstərəcək. Düşünürəm, böyük marağı olan ölkələr bizi sülh sazişindən uzaqlaşdırırlar ki, müharibəyə daha uyğun vəziyyət yaransın. Müharibələr necə ölkələri zəiflədirsə, bizi də o hala gətirmək istəyirlər. Burada Avropa İttifaqının öz istəkləri də ortaya çıxır. Ermənistan rəhbərlərinin səsləndirdiyi qoşunların "güzgü prinsipi" ilə geri çəkilməsini istəyirik ifadəsi Ermənistanın Azərbaycana verdiyi təkliflərin hamısının başında Avropa İttifaqının durduğunu göstərir. Biz Ermənistandan daha çox Avropa İttifaqının rəsmilərinin yanaşmasını diqqətə almalıyıq. Çünki Ermənistanın bütün əsaslandırmalarının arxasında Avropa İttifaqının niyyətləri dayanır".
Məhəmmədəli QƏRİBLİ
