Emin Həsənli: "Ya Ermənistan ağlını başına yığıb normal münasibət sərgiləməlidir, ya da sonu daha pis olacaq"
Ermənilərin sərhəddə törətmək istədikləri təxribat yenə öz başlarında çatlayıb. Onlar bizim bir əsgərimizi yaralayandan sonra bizim hərbçilər növbəti "Qisas" əməliyyatı ilə onların atəş açdığı postu darmadağın və 4 hərbçisinin məhv etdi. Onların yadına bir daha "Fərrux", "Sarıbaba-Qırxqız", "Qisas" kimi əməliyyatları salmış olduq.
Bir müddət əvvəl Prezident İlham Əliyev yerli televiziya kanallarına müsahibəsində dedi ki, 23 aprel hadisələri çox önəmli bir tarixdir: "Bütün sərhədlərə biz nəzarət etməyə başlamışdıq və bir daha göstərdik ki, bu torpaqların sahibləri bizik".
Aprelin 23-nə qədər də bir neçə dəfə Ermənistana "Fərrux", "Sarıbaba-Qırxqız", "Qisas" əməliyyatlarının tərəfimizdən aparılmış önəmli hərbi əməliyyatlar olduğunu xatırladan dövlət başçısı deyib: "Bu əməliyyatlar nəticəsində o vaxt nəzarətimizdə olmayan Qarabağ bölgəsinin strateji təpələri, yüksəklikləri biz tərəfdən götürülmüşdür və 19-20 sentyabr əməliyyatı üçün bunun çox böyük əhəmiyyəti var idi. Yəni o əməliyyatlar, sadəcə olaraq, kortəbii seçilməmişdi, məqsədyönlü əməliyyatlar idi".
Son üç ildəki "Qisas" əməliyyatlarımızla Ermənistana hansı dərsləri verdik?
Hərbi-siyasi şərhçi Emin Həsənli "Bakı-Xəbər"ə açıqlamasında bildirdi ki, üç il ərzində bizim həyata keçirdiyimiz əməliyyatlar olduqca önəmli mahiyyət daşıyıb: "Məsələn, "Fərrux" çox önəmli bir əməliyyat idi. Həmin zaman erməni separatçıları düşünürdü ki, bölgədə rus sülhməramlıları var, atəşkəs imzalanıb, ortada üçtərəfli bəyanat varsa onlar istədiklərini edəcəklər. Azərbaycan dövləti onlara sübut etdi ki, zaman dəyişib, bu, 90-cı ilin əvvəlləri deyil. Bura Azərbaycan ərazisidir, bizim qanunlar keçərli olmalıdır və biz onların nazı ilə oynayan deyilik. Törətdikləri cinayətlərin artıqlaması ilə cavabını alacaqlar. Sonrakı "Qırxqız" və "Sarıbaba" əməliyyatları da çox önəmli idi. Bu həm də mənəvi baxımdan önəmliydi. Çünki həmin ərazilərdə minlərlə Azərbaycan övladı şəhid olmuşdu. Həmin zirvələr azad edildi. Bu əməliyyatlar nəticəsində biz çox strateji mövqelər əldə etdik. Ermənilərin bölgəyə nəzarəti minimuma endi. Bölgə tam olaraq Azərbaycan silahlı qüvvələrinin əlinə keçdi. Son əməliyyat ermənilərə növbəti dərs oldu. Bizim bir hərçimizin yaralanmasına onlar 4 meyit və bir neçə yaralı ilə cavab verdilər. Ermənilər zamanında bu əməliyyatlardan nəticə çıxarmadıqları üçün sonuç belə oldu. Belə olan təqdirdə biz, Qazaxdan başlayaraq, bütün sərhəd boyu bufer zona yaratmalı olacağıq. Bunu edəcəyik ki, problem kökündən həll edilsin. Ya Ermənistan ağlını başına yığıb normal münasibət sərgiləməlidir, ya da sonu daha pis olacaq. Onlar Zəngəzur dəhlizini açmalı və bizim anklav kəndlərimizi geri qaytarmalıdırlar. Belə münasibət sonsuza qədər davam edə bilməz. Ermənilər 200 ildir ki, bölgəni qan çanağına çeviriblər. Güclü Azərbaycan dövləti imkan verməyəcək ki, bölgədə özbaşınalıq hakim olsun. Bu əmiliyyatlardan ermənilər çox ciddi nəticə çıxarmalıdırlar ki, onların gücü bizimlə dirəşməyə çatan deyil".
Məhəmmədəli QƏRİBLİ
