Daşdəmir Əliyev: "Əslində, erməni deputat tərsinə danışmalıdır ki, ölkəsi belə təxribatları törədir ki, sülh prosesindən yayınsın"
Ermənilər sərhəddə törətdikləri təxribatlara siyasi don geyindirib, məsuliyyəti öz üzərlətindən atmaq istəyirlər. "Mülki müqavilə" partiyasından olan deputat, müdafiə nazirinin keçmiş müavini Qaqik Melkonyan Milli Assambleyada jurnalistlərlə söhbətində deyib ki, 4 hərbçiləri ölüb, onlardan biri insult keçirib, yaralılar var, qalan hər şey dəqiqləşdirilir:
"Bu təxribatın nədən qaynaqlandığını öyrənmək üçün rəsmi araşdırmaya göstəriş verilib? Mənə elə gəlir ki, hər şey aydınlaşacaq və tezliklə əsas səbəbi öyrənəcəyik, bu güllələr kim tərəfindən və hansı formada atılıb? Hər halda, biz hər gün gözləyirik ki, sərhədlərimizdə təxribatlar ola bilər, çünki onların prezident seçkiləri başa çatıb, Əliyev 92 faiz səslə seçilib, faktiki olaraq, bütün dünyaya onun legitim prezident olduğunu nümayiş etdirdilər".
Qaqik Melkonyan qeyd edib ki, onlarla yaxşı münasibətdə olan nə qədər dövlətlər, Avropa ölkələri, eləcə də Rusiya Əliyevi təbrik edib:
"Bundan sonra Əliyev nə iləsə öz qələbəsini nümayiş etdirməli oldu və mənə elə gəlir ki, şou məhz bu təxribat idi. Digər sahələrdə də təxribatların olması mümkündür. İndi bütün sahələrdə nisbi əminamanlıq var, necə idisə, elə də qalır, heç bir dəyişiklik yoxdur. Bu təxribat yalnız Nərkin Xəndə bölməsində baş verib. Biz hər zaman hazır olmalıyıq".
Erməni deputatın açıqlamasında məntiqsizlik var. Həm deyir ki, baş verən hadisə araşdırılacaq, həm də bunun seçkinin nəticələrini dünyaya qəbul etditmək üçün Azərbaycanın yaratdığı "şou" olduğunu bildirir. Bu prosesin 7 fevral seçkisi ilə hansısa əlaqəsi ola bilərmi?
Hərbi-siyasi şərhçi, ehtiyatda olan polkovnik-leytenant Daşdəmir Əliyev "Bakı-Xəbər"ə açıqlamasında bildirdi ki, ermənilər "ağ yalan" danışır: "Təxribatı onların özləri törədib. Bizim əsgərimizi yaralayıblar. Sonra biz cavab vermişik. Bunun seçki ilə nə əlaqəsi ola bilər?Azərbaycanda tam legetim seçki keçirilib və nəticəsi də ortadadır. Bunu kimsə şübhə altına ala bilməz. Deyir ki, İlham Əliyev bununla gücünü nümayiş etdirmək istəyir. Çox gülməlidir. Çünki İlham Əliyev öz gücünü 44 günlük müharibədə və qısa müddətli antiterror əməliyyatları zamanı göstərdi. Azərbaycanın suverenliyini tam bərpa etdi. Əzələ nümayişi üçün bundan böyük meydan, mövzu ola bilərmi? Əslində, erməni deputat tərsinə danışmalıdır ki, ölkəsi belə təxribatları törədir ki, sülh prosesindən yayınsın. Artıq müəyyənləşib ki, təxribatı törədən erməni əsgər "Yerkrapa" terror təşkilatının üzvü olub.
Əgər Ermənistan sərhəddə gərginlik və Azərbaycanla yeni müharibə istəmirsə, ilk işi "Yerkrapa" terror təşkilatının üzvlərini sərhəddən uzaqlaşdırmaq və tərksilah etmək olmalıdır. Çünki bu təşkilat ordu komandanlığına və hökumətə tabe deyil. Ən maraqlısı budur ki, bu hadisə Avropadan gələn müşahidə missiyasının məsuliyyət zonasında baş verib. Əgər erməni snayperi Azərbaycan mövqelərinə atəş açırsa, onların Ermənistandakı fəaliyyətinin mənası nədir, nəyi monitorinq edirlər? Ermənistan hərbi polisi dərhal açıqlama verdi ki, hadisə araşdırılacaq, günahkar məsuliyyətə cəlb olunacaq. Deməli, biliblər ki, təxribat onlardan olub. Bu siyasi bəyanatlar, məsuliyyətdən yayınma cəhdləri sonra oldu. Arqumentsiz cəfəngiyatdır. Ermənistan bilməlidir ki, hər bir təxribatlarına layiqli cavab veriləcək. Onların ən doğru yolu sülh sazişini imzalamaqdır. Əks təqdirdə belə vəziyyətdən xilas ola bilməyəcəklər".
Məhəmmədəli QƏRİBLİ
