Mübariz Göyüşlü: "Azərbaycanın səsinə beynəlxalq səviyyədə səs verilməsi çox müsbət haldır"
Azərbaycan uzun müddətdir ki, Fransa hökumətinin siyasətini təşkil edən neokolonizmə qarşı mübarizə aparır.
Azərbaycan Prezidenti İlham Əliyev keçən ilin 5 iyul tarixində Qoşulmama Hərəkatının Əlaqələndirmə Bürosunun Bakıda keçirilən "Qoşulmama Hərəkatı: meydana çıxan çağırışlarla mübarizədə birgə və qətiyyətli" mövzusunda Nazirlər görüşündə "Azərbaycan neokolonializm meyllərinin artmasından olduqca narahatdır" fikrini bəyan edib. Bundan başqa, Azərbaycan Prezidenti bir sıra çıxış və bəyanatlarında da bu məsələni xüsusi vurğulayıb.
Çox təəssüflər olsun ki, Fransanın timsalında dünyada neomüstəmləkəçilik siyasəti bugünə qədər davam edir. Müstəmləkəçi Fransanın hələ də neokolonalizm siyasətini davam etdirdiyi məlumdur. Bir sıra dövlətlərə qarşı bu mənfur siyasətini həyata keçirən Fransaya beynəlxalq aləmdə "dayan, dur" çağırışları Azərbaycandan start götürdü.
Beləliklə, Fransa neokolonizmilə mübarizəni, fransız müstəmləkəsindən əziyyət çəkən xalqların problemlərini, azadlıq istəklərini beynəlxalq gündəmə Azərbaycan gətirdi. Bu, təkzibolunmaz faktdır. Fransa müstəmləkəçiliyindən əziyyət çəkən toplumlar da səslərini dünyaya Azərbaycandan ucaldıblar. Müsbət haldır ki, Azərbaycanın başlatdığı bu işə başqa ölkələr də dəstək verir.
Məlumatlara görə, Rusiya Federasiyasında neokolonializm mövzusunda beynəlxalq forum keçiriləcək. Milli Məclisin Mətbuat və ictimaiyyətlə əlaqələr şöbəsindən mətbuata bildirilib ki, Azərbaycanı bu tədbirdə Milli Məclis sədrinin birinci müavini, parlamentin Hüquq siyasəti və dövlət quruculuğu komitəsinin sədri Əli Hüseynli və Rusiya ilə parlamentlərarası əlaqələr üzrə işçi qrupun rəhbəri, deputat Nizami Səfərov təmsil edəcək. Səfər zamanı Milli Məclisin deputatları Rusiyanın "Yedinaya Rossiya" Partiyasının təşkilatçılığı ilə keçiriləcək "Müasir neokolonializm təcrübələrinə qarşı mübarizə" mövzusunda beynəlxalq foruma qatılacaq, mövzu ətrafında aparılacaq müzakirələrdə Azərbaycan tərəfinin mövqeyini bildirəcəklər.
"Azərbaycan, Rusiya və başqa ölkələr Fransanın bu antiinsani siyasətini daim beynəlxalq gündəmə daşımalıdırlar"
Məsələyə şərh verən Müasir İnkişaf Birliyinin sədri Mübariz Göyüşlü "Bakı-Xəbər"ə şərhində bildirdi ki, Fransada neokolonializm meylləri ilə paralel olaraq irqçilik və islamofobiyanın da geniş vüsət aldığı müşahidə edilir. "Fransa hazırda öz beynəlxalq imkanlarından istifadə edərək azsaylı xalqlara qarşı yeni müstəmləkəçilik siyasəti həyata keçirir və onlara faciələr, ağrı-acılar yaşadır. Bütün dünya bunun şahididir. XXI əsrdir, müstəmləkəçiliyin hər bir növü aradan qalxmalıdır. Bu, insan hüquq və haqlarına zidd olan məsələdir. Fransanın o xalqları əzməsi, sərvətlərini istismar etməsi, hüquqlarını tapdaması insan hüquq və azadlıqlarına zidd məsələdir. Azərbaycanın səsinə beynəlxalq səviyyədə səs verilməsi çox müsbət haldır. Bu gün bütün dünyanın, mütərəqqi insanların və dövlətlərin əsas işlərindən biri neokolonialzm və onu dövlət siyasətinə çevirənlərlə mübarizə olmalıdır. Azərbaycanın bu sahədə mübarizəsi Rusiyada davam etdiriləcək. Hesab edirəm ki, Azərbaycan, Rusiya və başqa ölkələr Fransanın bu antiinsani siyasətini daim beynəlxalq gündəmə daşımalıdırlar. Fransanın yeni kolonializm siyasətinə qarşı beynəlxalq səviyyədə bir müqavimət formalaşdırılmalıdır" - deyə M.Göyüşlü qeyd etdi.
M.Göyüşlünün sözlərinə görə, Fransaya ciddi təpkilər göstərilməlidir. Bu qədər xalqı, əraziləri əsarətdə saxlamağa, istismar etməyə heç kəsin Fransaya icazə vermədiyini deyən müsahibimiz vurğuladı ki, Fransa insan haqqlarını tapdayaraq insanlara qarşı bu cür qeyri-humanist, qeyri-insani davranış sərgiləyir: "Prosesi dəstəkləyirəm. Azərbaycanın başlatdığı antineokolonializm mübarizəsinin beynəlxalq səviyyədə çox ciddi nəticələri ola bilər. Zatən, Azərbaycan bir sıra başqa platformalarda həm bu məsələni aktuallaşdırır, həm fikir formalaşdırır, həm də mübarizə aparır. Bu da yeni paltforma ola bilər. Eyni zamanda bu məsələ bütün regional, eləcə də beynəlxalq platformalarda gündəmə gətirilməlidir və Fransanın müstəmləkəçilik siyasətinə qarşı mübarizə dərinləşməlidir".
Leyla QARAXANLI
