Rus sülhməramlılarının taleyi barədə Bakı-Moskva müzakirəsi başlanır...
Məhəmməd Əsədullazadə: "Rusiya sülhməramlıların Qarabağdan 2025-ci ildə çıxarılmasını əngəlləməyə çalışır"
Rusiyanın Azərbaycandakı səfiri Mixail Yevdokimov "İzvestiya" nəşrinə müsahibəsində bildirib ki, Rusiya Moskva platformasını təqdim etməyə hazırdır.
"Biz, lazım gələrsə, ekspertizamızı, mətnlə bağlı məsləhətlərimizi verməyə hazırıq. Azərbaycanlı həmkarlarımızla çox yaxşı qarşılıqlı əlaqələrimiz var. Mən görürəm ki, Azərbaycan sülh müqaviləsinin imzalanması ilə bağlı danışıqları çox tez başa çatdırmaq əzmindədir. Lakin danışıqları başa çatdırmaq üçün hər iki tərəfdə belə bir istək olmalıdır".
Bölgədəki vəziyyətə toxunan səfir əlavə edib ki, Rusiya tərəfi hazırda sülhməramlı kontingentlə bağlı Moskva və Bakı arasında danışıqların növbəti raundunun tarixlərini Azərbaycan Xarici İşlər Nazirliyi ilə razılaşdırır. O, sülhməramlıların Qarabağda qalma müddətinin 2025-ci ildə başa çatacağını xatırladıb.
Burada diqqəti çəkən məqam odur ki, səfir sülhməramlıların gələcəyi ilə bağlı danışıqların yeni raundundan bəhs edir. Deməli, indiyə qədər bu yöndə danışıqların müəyyən raundları olub. Artıq növbəti raunda hazırlıq gedir. Yəni sülhməramlılarla bağlı növbəti danışıq başlayıb. Bütün bunları ekspertlər necə şərh edir?
"Böyük ehtimalla, danışıqların növbəti raundunda Azərbaycan öz mövqeyini qəti şəkildə ortaya qoyacaq"
Politoloq Məhəmməd Əsədullazadənin fikrincə, iki ölkə arasında münasibətlər bu gün yüksək səviyyədədir: "O üzdən, Azərbaycan çalışır ki, Rusiya ilə ikitərəfli əlaqələrdə problem yaranmasın. Ancaq buna baxmayaraq, arada bəzi Rusiya rəsmilərinin anti-Azərbaycan ritorikasının şahidi oluruq. Bəzən Qarabağla bağlı konstruktivlikdən uzaq fikirlər səsləndirirlər. Ancaq bütün bunlara baxmayaraq, Azərbaycan Qarabağ məsələsini həll edib. Regionda öz geosiyasi mövqeyini gücləndirib. İndi əsas məsələ 2025-ci ilin noyabrında rus sülhməramlılarını Qarabağdan çıxarmaqdır. Bu, Azərbaycanın qarşısında duran əsas prioritetdir. Ancaq görünən odur ki, Rusiya sülhməramlıların Qarabağdan 2025-ci ildə çıxarılmasını əngəlləməyə çalışır. Hər vasitə ilə çalışır ki, onlar orada qalsınlar. Hətta Qarabağı tərk edən ermənilərin geri qayıtması məsələsi Rusiyanın planları daxilindədir. Çünki bütün bunlar Rusiya üçün bir təsir vasitəsidir. Yəni bu o demək deyil ki, Rusiya Qarabağ ermənilərinin qeydinə qalır. Əlbəttə ki, yox. Sadəcə, bu minvalla Azərbaycanda hərbi varlığını qurmaq istəyir. Əsl pərdəarxası siyasət budur. Azərbaycan isə bunda maraqlı deyil. Maraqlı deyil ki, ərazisində hansısa xarici dövlətin silahlı qüvvələri olsun. Başqa bir tərəfdən, bu məsələdə Rusiya vasitəçi ola bilməz. Ona görə ki, bir zamanlar Qarabağ separatçılarının himayə olunmasında, ərazilərimizin işğal edilməsində Rusiya başlıca rol oynayıb. Bu səbəbdən Azərbaycan daha neytral və tərəfsiz vasitəçinin olmasında maraqlıdır. Yaxud da vasitəçi olmadan ikitərəfli danışıqların keçirilməsini məqbul hesab edir. İstənilən halda, sülhməramlılar 2025-ci ildə buradan getməlidir. Çünki buna zərurət qalmayıb. Böyük ehtimalla, danışıqların növbəti raundunda Azərbaycan öz mövqeyini qəti şəkildə ortaya qoyacaq".
Vidadi ORDAHALLI
