Vüqar Rəhimzadə: "Naxçıvanın sayəsində Rusiya yükləri Türkiyəyə daşınacaq"
Rusiyanın Azərbaycandakı səfiri Mixail Yevdokimov "İzvestiya" nəşrinə müsahibəsində bildirib ki, Ermənistan Naxçıvana nəqliyyat dəhlizi yaradılmasını ləngidir:
"Azərbaycanın əsas hissəsindən Naxçıvana nəqliyyat dəhlizi məsələsi də Azərbaycan üçün çox vacibdir. Bu, Naxçıvanla sabit nəqliyyat əlaqəsinin mövcudluğu deməkdir. Azərbaycan üçün marşrutun (təxminən 46 km) təhlükəsizliyi mücərrəd mövzu deyil. Rusiya Federasiyası öz vəsaiti ilə bu marşrutu kifayət qədər tez bərpa etməyə hazır idi. Ermənistan mənə çox da aydın olmayan müxtəlif səbəblərdən bu danışıqları uzadır. Buna görə Bakı və Tehran İran ərazisindən dəmir yolunun tikintisi haqqında saziş imzalayıb. Bu, həmçinin, Türkiyəyə gedən marşrutdur. Türkiyədən Naxçıvana dəmir yolu tikilməsi də vacibdir. Biz Rusiyadan yükləri Azərbaycan, İran və Naxçıvandan keçməklə Türkiyəyə daşımaq imkanı əldə edəcəyik".
Görünən odur ki, Ermənistan öz öhdəliklərinə əməl etməsə də, Rusiya Naxçıvana gedən dəmir yolunu dəstəkləyir. Çünki bu yol həm də Rusiyadan Türkiyəyə yüklərin daşınmasına şərait yaradacaq.
"İllər əvvəl Ermənistan neft-qaz kəmərlərinin Gürcüstandan keçməsindən itirdi, Zəngəzur dəhlizini əngəlləməsindən də itirəcək"
Məsələ ilə bağlı "Bakı-Xəbər"ə açıqlama verən "İki sahil" qəzetinin baş redaktoru Vüqar Rəhimzadə hesab edir ki, Naxçıvana dəmir yolunun çəkilməsi geosiyasi reallıqdır: "Ermənistan istəsə də, istəməsə də, bu həyata keçəcək. Əvvəla, Ermənistan 10 noyabr 2020-ci ildə üçtərəfli razılaşmaya əsasən üzərinə öhdəlik götürüb. Həmin öhdəliyə görə, Zəngəzur dəhlizi açılmalı və onun təhlükəsizliyini Rusiya FTX-si təmin etməlidir. Məlum olduğu kimi, Paşinyan imza atdığı sənədi reallaşdırmaq istəmir. Ancaq Azərbaycan boş dayanmır və İran ərazisindən yolun keçməsi ilə bağlı qarşı tərəflə razılaşma imzalayıb. Bu o deməkdir ki, Ermənistan Zəngəzur dəhlizini açmasa belə, İran vasitəsilə yol çəkiləcək. Özü də bu yolla təkcə Naxçıvana gediş-gəliş təmin edilməyəcək. Eyni zamanda Türkiyə ilə əlaqə qurulacaq. Düzdür, Azərbaycan Bakı-Tbilisi-Qars dəmir yolu vasitəsilə qardaş ölkə ilə əlaqə qurub. Ancaq Rusiyanın Türkiyə ilə dəmir yol əlaqəsi yoxdur. Naxçıvanın sayəsində Rusiya yükləri Türkiyəyə daşınacaq. O cümlədən, Rusiya Yaxın Şərq ölkələri ilə iqtisadi əlaqə qurmaq imkanı əldə edəcək. Məlum olur ki, Ermənistanın Zəngəzur maneəsi Azərbaycanı alternativ layihələrdən məhrum edə bilmir. Ancaq Ermənistan özünü bundan təcrid edəcək. Zəngəzur dəhlizi olmadan nə Azərbaycan, nə də Türkiyə Ermənistanla kommunikasiya əlaqələrini bərpa etməyəcək. Necə ki, illər əvvəl Ermənistan neft-qaz kəmərlərinin Gürcüstandan keçməsindən iqtisadi baxımdan itirdi, Zəngəzur dəhlizini əngəlləməsindən də itirəcək".
Vidadi ORDAHALLI
