Sahil Kərimli: "Bu addımı atanların Azərbaycana qarşı açıq qərəzi və düşmənçiliyi hiss edilir"
Azərbaycanda 7 fevralda keçirilən növbədənkənar prezident seçkilərində səsvermə başa çatandan sonra bir çox dövlət başçıları Prezident İlham Əliyevi təbrik etməyə başladılar.
Diplomatik etiket qaydalarına görə, dövlət başçıları, monarxlar, hökumət liderləri yeni seçilən prezidenti təbrik etməlidir. İlham Əliyevə gələn təbriklər kifayət qədərdir və hələ də gəlməkdə davam edir.
Maraqlıdır ki, bəzi Avropa liderləri İlham Əliyevi təbrik etməyib. Hakimiyyətə qarşı radikal mövqedə olan bəzi dairələr az qalırlar bu amili seçki uğursuzluğu kimi qələmə versinlər.
Bəzi dövlət və hökumət başçılarının İlham Əliyevi təbrik etməməsi seçkinin nəticələrinə ziyan vura, onun əhəmiyyətini azalda bilirmi?
Siyasi şərhçi Sahil Kərimli "Bakı-Xəbər"ə açəqlamasında bildirdi ki, Prezident İlham Əliyevin yüksək səs çoxluğu ilə yenidən xalqın etimadını qazanması Azərbaycan xalqının siyasi iradəsinin göstəricisidir: "Azərbaycan xalqının bu seçkilərə kütləvi şəkildə gəlməsi, növbələrə dayanaraq səs vermələri Prezidentə olan inamın və rəğbətin göstəricisi idi. Təbiidir ki, etiketə uyğun olaraq, bir çox ölkələrin başçıları İlham Əliyevi təbrik edirlər. Belə təbriklər hələ də gəlməkdə davam edir. Azərbaycana daim dost və qardaş münasibəti bəsləyən ölkələrin rəhbərlərinin səmimi addımlarının şahidi oluruq. Təbrik etməyənlər də var. Bu addımı atanların Azərbaycana qarşı açıq qərəzi və düşmənçiliyi hiss edilir. Bunun ümumi nəticələrə heç bir aidiyyəti yoxdur. Belə addımlarla seçkinin nəticələrini də şübhə altına sala bilməyəcəklər. Çünki seçkilər bizim ölkədə keçirilib və bizim xalqın iradəsini əks etdirir. Azərbaycan xalqının seçimi elə bizə qarşı qərəzli münasibət göstərən ölkələrə ən layiqli cavabdır. Düşünürəm ki, bu qərəzi göstərənlər addımlarına görə peşman olacaqlar. Gələcək 7 ildə İlham Əliyev ölkəmizi layiqli şəkildə idarə edib, Azərbaycanı daha böyük hədəflərə çatdıracaq".
Qeyd edək ki, bəzi Qərb ölkələrinin başçılarının bu addımı təsadüfi deyil. Çünki hazırda bu addımı atanlar bundan əvvəlki seçkilərdə İlham Əliyevi normal şəkildə, hətta hamıdan önə keçərək təbrik ediblər. Bəs indi nə oldu? Səbəb aydındır. Çünki İlham Əliyev Azərbaycanın ərazi bütövlüyünü təmin edəndən sonra ona Qərbdən başlayan təzyiqlərə boyun əymədi. Bu o dairələrdi ki, hazırda Ermənistanı açıq himayə edir. Belə addımlar olduqca cılızdır. Ölkəmizə belə üsullarla təzyiq etmək istəyirlərsə, yanılırlar. Çünki Azərbaycan belə təzyiqlər qarşısında baş əyən deyil. Uzun illər ərzində bizə Qərbdən müxtəlif təzyiqlər olub, ancaq biz onların qarşısında mətanətlə duruş gətirmişik.
Məhəmmədəli QƏRİBLİ
