Şakir Ağayev: "Bu Ermənistanın və onun arxasında dayanan qüvvələrin bölgədəki sabitliyi pozmaq cəhdidir."
Azərbaycanla sülh sazişi imzalamaqda maraqlı olduğunu dəqiqəbaşı dilə gətirən Ermənistanın əslində məqsədi sülh deyil, bölgədə gərginlik yaratmaq, Avropa Birliyi missiyasının arxasında gizlənib öz işğalçılıq, təxribatçılıq əməllərini davam etdirməkdir.
Gerçəklik budur ki, Ermənistanın niyyəti məkrli və çirkindir. Ermənistan törətdiyi son sərhəd təxribatı ilə də özünün əsl məqsədini bir daha büruzə verdi. Məlumdur ki, fevralın 12-də Ermənistan Silahlı Qüvvələrinin hərbi təxribatı nəticəsində Azərbaycanın Dövlət Sərhəd Xidmətinin hərbi qulluqçusu yaralanıb. Bu təxribatı bu ölkənin qəsdən törətdiyi video və foto görüntülərdə öz əksini tapıb. Fakt qarşısında qalan Ermənistan bəyan edib ki, təxribatla bağlı araşdırma aparılır və təxribatı törədən cəzasını alacaq. Əlbəttə, Ermənistanın bu bəyanatı səmimiyyətdən uzaqdır. Ermənistan Silahlı Qüvvələrinin snayperi tərəfindən 12.02.2024-cü il tarixində törədilmiş təxribatın video görüntüsündə və fotolarda erməni snayperin posta necə yerləşdirildiyi, Azərbaycanın mövqelərini necə hədəfə aldığı və əsgərimizi necə vurduğu, ondan sonra atəş mövqeyindən öz postuna geri qayıtdığı an aydın əksini tapıb. Bu o qədər dəqiq çəkilib ki, qatil snayperi postda gözləyən hərbiçilər də görsənir. Təbii ki, snayper məqsədli, şüurlu və hazırlıqlı şəkildə gətirilib o postda yerləşdirilib. Özü də bu təxribata əvvəlcədən hazırlanıblar. Məlumdur ki, Ermənistanın son sərhəd təxribatı məqsədyönlü şəkildə hazırlanıb. Snayperin məqsədli şəkildə gətirilib yerləşdirilməsinin özü göstərir ki, Ermənistan sabitliyin yaranmasında maraqlı deyil.
Bildiyimiz kimi, xeyli müddət idi ki, Ermənistan atəşkəsi pozmurdu. Hətta Prezident İlham Əliyev də yerli mediaya müsahibəsində son 4-5 ayın ən sabit dövr olduğunu bildirmişdi. Lakin Ermənistan bu sabitliyi növbəti dəfə də pozdu. Bu ölkənin bu sakitiliyin möhkəmlənməsinin qarşısını alması faktdır. Gizlin deyil ki, Ermənistan bu təxribatları Avropa Birliyi missiyasının arxasında gizlənərək və ondan dəstək alaraq həyata keçirib. Bu ölkənin Avropa Birliyi missiyasının ətəyinin altında gizlənməsi əslində Avropa Birliyi missiyasının fəaliyyətini genişləndirmək adı altında özünün revanşist siyasətini gizlətmək məqsədi daşıyır. Onun sərhəddə belə bir təxribatı törətməsi onu bir daha təsdiqləyir ki, Ermənistan bu təxribatı məqsədyönlü şəkildə hazırlayıb törədib. Avropa Birliyinin missiyasını genişləndirmək pərdəsi altında gizlənərək bunu edib.
Necə olur, snayper rahat şəkildə gəlib bizim hədəfi vurur, sonra da sakit şəkildə onu gözləyən hərbiçilərin yanına posta qayıdır, bundan da Ermənistan ordusuna rəhbərlik edənlərin xəbəri olmur? Bu absurddur. Bu təxribatın ssenari müəllifi elə Ermənistan hökumətidir. Əlbəttə, burada Aİ misiyasının məsuliyyəti də yox deyil. Əlbəttə, məqsəd də bölgədə sabitliyin yaranması yönümündə Azərbaycanın apardığı siyasəti pozmaqdır.
"Aİ missiyasının indiyə qədər təxrtibatla bağlı reaksiya verməməsi ortaya çox ciddi şübhələr çıxarır"
"Novoye vremya" qəzetinin baş redaktoru Şakir Ağayev də bizimlə söhbətində baş verənlərin məsuliyyətinin birbaşa Ermənistanın üzərinə düşdüyünü dedi: "5-6 aydan çox çəkən sərhəd sakitliyi, çox təəssüflər olsun ki, Ermənistan tərəfindən pozulub. Ermənistan fevralın 12-də iki dəfə sakitliyi pozub. Bir dəfə Zəngilan, ikinci dəfə Tovuz istiqamətində atəş açıblar. Baxmayaraq ki, Ermənistan təxrubatı boynuna aldı və bir zabiti, əsgəri cəzalandırmaqla bunun təsadüfi hal olduğunu dedi. Amma gecə Tovuzun atəşə tutulması bir daha təsdiqlədi ki, bu təsadüfi olmayıb. Bu qətiyyən təsadüfi deyil. Təxribatdan bir gün əvvəl Ermənistanın baş naziri Paşinyan The Telegraph" qəzetinə verdiyi müsahibə zamanı Azərbaycana qarşı növbəti dəfə böhtan söylədi və haqsız olaraq Azərbaycanı ittiham etdi ki, guya Azərbaycan sülh sazişinin imzalanmasında maraqlı deyil. Halbuki, əksinə, sülh sazişinin imzalanmasında Azərbaycan maraqlıdır, qalib ölkə olmasına baxmayaraq sülh müqaviləsi bağlamağı Azərbaycan Ermənistana təklif edib. Paşinyan bütün variantlardan istifadə edib sülh müqaviləsini pozmağa çalışır. Həmişə demişəm, yenə də deyirəm, Paşinyan sülh müqaviləsini imzalamaqda maraqlı deyil, inanmıram ki, o sülh sazişini imzalayacaq. Paşinyanın hakimiyyət müddəti bitənə qədər sadəcə olaraq sülh müqaviləsi alveri ilə başları aldadacaq. Paşinyanın gətirdiyi bəhanələrin hamısı sülh müqaviləsinin bağlanmasının qarşısını almağa hesablanıb. Fevralın 12-də baş verən təxribat da sülh müqaviləsinin bağlanmasının qarşısının alınmasına yönəlib. Bu bir daha göstərir ki, Ermənistan revanşist fikirlərindən əl çəkməyib. Təbii ki, Ermənistanı buna həvəsləndirən qüvvələr var. İlk növbədə Ermənistanı bu təxribatı törətməyə həvəsləndirən Aİ-nin oradakı missiyadır ki, Ermənistan onun arxasında gizlənib bu əməlləri törədib. Fevralın 12-də fransız generalı Ermənistana gəlmişdi və oradan da Azərbaycanla sərhəd bölgəsinə gəlib binoklla sərhədləri izləyib. Məhz həmin nöqtədən sərhəd təxribatı baş verib. Bundan əlavə, təxribatdan bir müddət əvvəl Aİ missiyasının tərkibi artırılıb. Ermənistan bu təxribatı öz havadarlarına arxalanıb edib. Yeri gəlmişkən, hələ Aİ missiyası da sərhəd pozuntusuna, təxribata görə münasibət bildirməyib, Ermənistanı ittiham etməyib. Aİ missiyasının indiyə qədər təxrtibatla bağlı reaksiya verməməsi ortaya çox ciddi şübhələr çıxarır. Bundan başqa, Fransa, Almaniya kimi Avropa dövlətləri Ermənistana həvəsləndirici vədlər verirlər. Fransanın və Hindistanın Ermənistanı silahlandırması erməniləri bir az da həvəsləndirir. Hər kəs bilir ki, silah olan yerdə mütləq atəş açılacaq. Ermənilər də bu atəşi açdılar. Bəli, bizim DSX "Qisas" əməliyyatı keçirdi, onların layiqli cəzalarını verdi.
Paşinyanın tutduğu mövqe, Avropa İttifaqının missiyasına arxalanması, bu qurumdan dəstək alması növbəti sərhəd təxribatı ilə nəticələndi. Bu işdə ona ABŞ-ın da dəstək verməsini istisna etmirəm. Ermənistanın məqsədi sülh sazişinin bağlanmasının qarşısını almaqdır. Bir sözlə, bu, Ermənistanın və onun arxasında dayanan qüvvələrin bölgədəki sabitliyi pozmaq cəhdidir. Sərhəd təxribatında məsuliyyət birbaşa Ermənistanın üzərinə düşür və bu onun sülhü pozmaq cəhdidir.
Əlbəttə, bu təxribat əvvəlcədən planlaşdırılıb və biz bunu snayperin davranışlarında da yaxından izlədik".
Ş.Ağayevin sözlərinə görə, bu təxribatın törədilməsinə dəstək verən qüvvələrin də məqsədi Ermənistan vasitəsilə bölgəyə daxil olmaq, burada mövqelərini möhkəmləndirmək, Rusiya-Ermənistan münasibətlərindən istifadə edib Rusiyanı bölgədən sıxışdırmaq və Cənubi Qafqazın siyasətini dəyişməkdir. Bunun üçün də onlara yeni müşahibə, münaqişə ocağının lazım olduğunu deyən Ş.Ağayevin sözlərinə görə, bu bəhanəni də başda Fransa və Aİ olmaqla onlara Ermənistan verir.
Ş.Ağayev qeyd etdi ki, bu qüvvələr Ermənistan vasitəsilə Cənubi Qafqazda söz sahibi olmaq istəyirlər. "Münaqişə olmalıdır ki, bundan istifadə edib regionda öz mövqelərini bərkitsinlər. Çox təəssüflər olsun ki, Ermənistan bu gün Cənubi Qafqazda növbəti Ukraynaya çevirilir. Bu ölkə Ukraynanın taleyini görür, amma əməlindən əl çəkmir. Bu baxımdan, Ermənistanın taleyi daha acı olacaq..."
Ş.Ağayev əlavə etdi ki, burada əsas məqsəd həm də Azərbaycanın bölgədə formalaşdırdığı sabitliyi, təhlükəsizlik mühitini, sülh çağırışlarını pozmaq istəyidir.
İradə SARIYEVA
