Arzuxan Əlizadə: "Baş verənlər arasında bu və ya digər formada əlaqə var"
Xəbər verildiyi kimi, fevralın 12-də Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində Dövlət Sərhəd Xidmətinin Sərhəd Qoşunlarının Zəngilan rayonunun Kolluqışlaq kəndi ərazisində yerləşən mövqeyinə Ermənistan Silahlı Qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqeyindən açılan atəş nəticəsində azərbaycanlı hərbi qulluqçu yaralanıb.
Prosesləri geniş rakursdan təhlil edəndə məlum olur ki, baş verən təxribat heç də təsadüfən olmayıb. Çünki maraqlıdır ki, hadisədən bir gün əvvəl bu ölkənin baş naziri Nikol Paşinyan "The Telegraph" qəzetinə müsahibəsində sülh təşəbbüsündən çox Azərbaycana qarşı təxribat və böhtan xarakterli əsassız iddialar səsləndirib. Müsahibənin aqressiv tonu bunun təsadüf olmadığını göstərir. Eyni zamanda Ermənistan parlamentinin müdafiə və təhlükəsizlik məsələləri üzrə daimi komissiyasının sədr müavini Armen Xaçatryanın Ermənistanın Fransa, Hindisdan və hansısa fövqəlgüc ölkədən silah alması, silahlanma sahəsində böyük həcmdə iş aparılması, bunun nəticələrinin yaxın zamanlarda özünü göstərəcəyini deməsi də diqqəti cəlb edir.
Məhz bu iki açıqlama ilə erməni snayperin sərhədçimizi yaralaması arasında nə kimi bağlılıq var?
"Nikol məğlub Ermənistanı təmsil etməsinə rəğmən elə danışır ki, sanki bütün bunların heç biri baş verməyib"
Sözügedən məsələni "Bakı-Xəbər"ə şərh edən AMİP sədri Arzuxan Əlizadə hesab edir ki, baş verənlər arasında bu və ya digər formada əlaqə var və bu danılmazdır: "Bəli, həqiqətən də Paşinyanın məlum müsahibəsində ciddi təxribat elementləri var idi. Həm müsahibə aqressiv tonda idi, həm də Nikol Ermənistanın imkanları ilə uzlaşmayan mövqedən çıxış edirdi. Halbuki, 3 il əvvəl, yəni 44 günlük müharibədən sonra Paşinyan bu cür özündən razı formada danışmırdı. Güzəştlərin vacibliyinə eyham vururdu. Ancaq Paşinyanın "The Telegraph" qəzetinə müsahibəsinə baxanda görürük ki, ortada böyük fərq var. Nikol məğlub Ermənistanı təmsil etməsinə rəğmən elə danışır ki, sanki bütün bunların heç biri baş verməyib. Ən əsası isə, utanmadan müsahibədə Azərbaycanın ünvanına sərt fikirlər səsləndirib. Azərbaycan rəhbərliyini sülh prosesini pozmaqda ittiham edib. Təbii ki, bütün bunlar təsadüf ola bilməzdi. Həmçinin Ermənistan parlamentinin müdafiə və təhlükəsizlik məsələləri üzrə daimi komissiyasının sədr müavini Armen Xaçatryanın ölkəsinin bir sıra ölkələrdən silah almasını bəyan etməsi təxribatlara işarə idi. Məsələn, Xaçatryan müsahibəsində deyib ki, Ermənistanın silahlanması yaxın zamanlarda özünü göstərəcək. Bu nə deməkdir? Bu o deməkdir ki, Ermənistan ordusu güç göstərəcək, təxribat törədəcək. Yəni siqnal verirlər ki, hansısa hadisə baş verəcək. O baxımdan hesab edirəm ki, sərhəd təxribatı əsla təsadüf nəticəsində ortaya çıxmayıb. Bu, Ermənistanın bilərəkdən törətdiyi təxribatdır".
Vidadi ORDAHALLI
