İbrahim Rüstəmli: "Paris və Vaşinqtonun məqsədi regionda yeni gərginlik yaratmaqdır"
Məlum olduğu kimi, Ermənistan növbəti dəfə təxribatçı addım atıb. Fevralın 12-də bu ölkənin Silahlı Qüvvələrinin hərbi təxribatı nəticəsində Azərbaycanın Dövlət Sərhəd Xidmətinin hərbi qulluqçusu yaralanıb. Görünən də odur ki, qarşı tərəfi 2023-cü ilin sentyabr ayından bəri yaşanan sabitlik qane etmir.
Bu, iki ölkə arasında gedən sülh danışıqları prosesinə zərbədir. Məsələ ondadır ki, Qarabağda sentyabrda keçirilən antiterror əməliyyatlarından sonra sərhəddə hər hansı insident baş vermirdi. Hətta bu ilin yanvarında Prezident İlham Əliyev də yerli mediaya müsahibəsində son 4-5 ayın ən sabit dövr olduğunu dedi. Ancaq göründüyü kimi, Ermənistan bundan sui-istifadə etməyə başladı. Ölkədə revanşizmi alovlandırmaq üçün müxtəlif vasitələri körükləməyə başladılar. Şübhəsiz, burada xarici amillərin də rolu var. Çünki məğlub və üstəlik resursları məhdud olan Ermənistanın belə bir imkanı yoxdur. Bu kimi təxribatın məhz Ermənistandakı Avropa İttifaqı (Aİ) missiyasının müşahidə həyata keçirdiyi ərazidə baş verməsi bu missiyanın məqsəd və məramlarına dair ciddi suallar yaradır. Bu missiyanın da əsasını Fransa təşkil edir. Aİ missiyasının genişləndirilməsi, Ermənistanın Hindistandan Fransa lisenziyası ilə istehsal olunmuş silahlar alması, bütün bunlar təsadüfi deyil. Fransa generalının Ermənistana səfəri və Azərbaycanla sərhəddə peyda olması, mütəmadi olaraq müşahidəçilərin binoklla müşahidələr aparması bunun göstəricisidir. Həmçinin ABŞ instruktorlarının Ermənistanda çalışması bunu deməyə əsas verir. Bütün bunların nəticəsində məlum insident baş verdi. Erməni snayperi sərhədə gətirib təxribat törətdilər.
Bütün bunlar onu göstərir ki, Fransa və ABŞ Ermənistanı yeni müharibəyə hazırlayır.
"Xüsusən də Paris Azərbaycanın Qarabağda öz suverenliyini tam bərqərar etməsini qəbul edə bilmir"
Sözügedən məsələ ilə bağlı "Bakı-Xəbər"ə açıqlama verən hərbi ekspert İbrahim Rüstəmli də hesab edir ki, Fransa və ABŞ Ermənistanı müxtəlif formalarda revanşa hazırlayır: "Bununla bağlı çoxsaylı faktlar var. Məsələ ondadır ki, həm Fransa, həm də ABŞ sentyabrdakı antiterror əməliyyatlarından sonra yaranan yeni reallıqları həzm edə bilmir. Xüsusən də Paris Azərbaycanın Qarabağda öz suverenliyini tam bərqərar etməsini qəbul edə bilmir. Baxmayaraq ki, üstündən bir neçə ay keçib. Məlum əməliyyatlardan sonra Aİ missiyası Ermənistanda həm intensivliyini artırdı, həm də onların sayı artırıldı. O cümlədən, Fransa rəsmi səviyyədə Ermənistanı silahlandırdığını bəyan etdi. Fransa və Ermənistan müdafiə nazirləri silahlanmaya dair bir sıra sənədlərə imza atdılar. Ondan sonra "Basttion" zirehli maşınların, hava hücumundan müdafiə və zenit-raket komplekslərinin Ermənistana göndərilməsi həyata keçirildi. Digər tərəfdən, antiterror əməliyyatlarından sonra ABŞ Senatının Xarici Əlaqələr Komitəsində Azərbaycan əleyhinə qərəzli və birtərəfli dinləmələr keçirildi. Daha sonra məlum oldu ki, ABŞ instruktorları Ermənistanda çalışır. Bəlli məsələdir ki, bütün bunlar bir-biri ilə əlaqəlidir. ABŞ və Fransanın Ermənistana verdiyi birtərəfli dəstək İrəvanı təxribatlar törətməyə həvəsləndirir. Bunun nəticəsidir ki, bir neçə aylıq sakitlikdən sonra erməni snayperi təxribat törətdi. Görünən odur ki, Ermənistan cəsarəti bu ölkələrdən alır. Paris və Vaşinqtonun məqsədi regionda yeni gərginlik yaratmaqdır".
Vidadi ORDAHALLI
