Faiq Ələkbərli: "Biz bu muzeyləri yaratmaqla yalançı "erməni soyqırımı" kimi saxta, ikiüzlü oyunlara qarşı əsl həqiqətləri ortaya qoya bilərik"
Ermənilər uzun illərdir ki, tarixdə heç zaman baş verməyən uydurma "erməni soyqırımı"nı nəinki Ermənistanda, hətta bütün dünyada təbliğ edir.
Hətta Ermənistanda "Erməni Soyqırımı Muzeyi" də yaradıblar və həm turistlərin, həm də xarici ölkələrdən gələn rəsmi şəxslərin, ictimai simalarım, media təmsilçilərinin ziyarətini təşkil edirlər. Başdan-başa erməni saxtakarlığının ifadəsi olan bu muzeyə gəlib-gedənlər də çox olur. Məqsədləri yalançı "genosid"i dünyada yaymaq, Türkiyədən təzminat qoparmaq, qardaş ölkəyə qarşı hansısa sanksiyaların tətbiq olunmasına nail olmaqdır.
Tarixdə ən çox soyqırıma məruz qalan xalq olduğumuza baxmayaraq, bizdə hələ də azərbaycanlıların soyqırımı muzeyi yoxdur. Bizdə yalnız Azərbaycan Hərbi Prokurorluğunda yaradılan Memorial Soyqırım Muzeyi və Quba Soyqırımı Memorial Kompleksi fəaliyyət göstərir. Amma gerçək soyqırımızı tanıtmaq üçün bunlar kifayət deyil.
Azərbaycanın həm Şimalında, həm Cənubunda, həm Qərbi Azərbaycanda, eləcə də Borçalıda erməni daşnakları Azərbaycan xalqına qarşı soyqırım törədib. Bakı qırğınları tarixə qanlı hərflərlə yazılıb. Azərbaycanın bütün bölgələrində ermənilər bizə qarşı soyqırım həyata keçirib. Bunlar hamısı sənədlər əsasında yazılıb.
Olmazmı biz də Bakının mərkəzində Azərbaycan xalqının soyqırımı muzeyini yaradaq? Soyqırıma, genosidə biz məruz qalmışıq, ermənilər yox. Onlar saxta genosidə muzey düzəldir, bizim mərkəzdə belə bir muzeyimiz yoxdur.
"Bu, ermənilərə və onların himayədarlarına çox tutarlı bir cavab olar"
AMEA-nın Fəlsəfə və Sosiologiya İnstitutunun aparıcı elçi işçisi, fəlsəfə doktoru, BAO sədrinin müavini Faiq Ələkbərli "Bakı-Xəbər"ə şərhində "Əlbəttə, qondarma erməni "soyqırımı" məsələsi yüz ildən çoxdur ki, türk dünyasının əsas problemlərindən biridir. Bu "soyqırım" məsələsini Qərb dövlətləri bizim əleyhimizə çevirməklə əllərindən gələni ediblər və etməyə də davam edirlər, edəcəklər də. Ona görə də biz həqiqətləri, faktları ortaya qoymaqla, Azərbaycan və Türkiyə olaraq bu sahədə ciddi işlər görməliyik. Düşünürəm ki, həm Azərbaycanda, həm də Türkiyədə iki qardaş xalqın övladlarına qarşı törədilən soyqırımlarla bağlı abidələr ucaldılmalıdır. Ümumiyyətlə, Azərbaycanda həm soyqırım abidələri, həm də soyqırım muzeyləri olmalıdır. Azərbaycan xalqına, bütövlükdə türklərə qarşı tarixdə analoqu olmayan soyqırımlar törədilib"-deyə bildirdi.
F.Ələkbərlinin fikrincə, biz təkcə müdafiə mövqeyində dayanmalı deyilik, bu abidələri və muzeyləri də özümüzü yazıq kimi qələmə vermək üçün yox, həqiqətləri üzə çıxarmaq üçün yaratmalıyıq. "Əsl həqiqəti ortaya qoymaq üçün belə muzeylərə, abidələrə ciddi ehtiyac var. Çünki muzey və abidə bir çox gerçəyi ortaya qoyacaq. Türk, islam dünyasına qarşı həmişə oyunlar oynayan Qərb dövlətlərinə bəlkə də nəyisə göstərmək o qədər də önəmli deyil, amma dünya ictimaiyyətinin diqqətinə faktları, həqiqətləri təqdim etmək lazımdır. Həm də dünya təkcə Qərbdən ibarət deyil. Qərb dünyasını da hakimiyyətdə olanlarla eyniləşdirmək olmaz, çünki orada da həqiqətləri görməyi bacaran insanlar var"-deyən F.Ələkbərli qeyd etdi ki, Bakıda, İstanbulda, yaxud Ankarada məhz soyqırım muzeyləri yaradılmalıdır. "Biz bu muzeyləri yaratmaqla yalançı "erməni soyqırımı" kimi saxta, ikiüzlü oyunlara qarşı əsl həqiqətləri ortaya qoya bilərik"-deyə F.Ələkbərli qeyd etdi.
F.Ələkbərli bildirdi ki, həm Osmanlı Türkiyəsində, həm Azərbaycanın Güneyində və Quzeyində, həm də Türküstanda ermənilər tərəfindən soyqırım edilən türklərin sayı həddən artıq çox olub. O hesab edir ki, Türküstanda da belə muzeylər olmalıdır. "Çünki vaxtilə Qırğızıstanda, Özbəkistanda, Mərkəzi Asiyada insanlar erməni və rus bolşevik hərbi birləşmələrinin təcavüzünə məruz qalıblar. Bununla bağlı kifayət qədər faktlar var. Məsələn, Qırğızıstanın Oş şəhərində, Özbəkistanın müxtəlif şəhərlərində soyqırımlar baş verib. Əlbəttə, ilk addımı Bakı atsa, bu addımları Ankara davam etdirsə, daha sonra Qazaxıstan, Özbəkistan, Qırğızıstan, Türkmənistan da bu prosesə qoşulsa bu çox ciddi bir işə çevrilər. Bu, ermənilərə və onların himayədarlarına çox tutarlı bir cavab olar"-deyə F.Ələkbərli vurğuladı.
İradə SARIYEVA
