Əli Mustafa: "Verdiyi cavablar onu deməyə əsas verir ki, məsuliyyəti tam öz üzərinə götürmür, ikibaşlı, məkrli danışır"
Ermənistanın Baş naziri Nikol Paşinyan müsahibəsində deyib ki, Beynəlxalq Cinayət Məhkəməsinin orderi əsasında bəzi şəxslərin, o cümlədən Vladimir Putinin həbsi ilə bağlı qərarları Ermənistanda o qəbul etmir:
"2018-ci ildən sonra Ermənistanda məhkəmə-hüquq sistemində ciddi islahatlara başlanılıb və bu sahədə böyük irəliləyişlər qeydə alınıb. Bizdə kimin həbs edilib-edilməyəcəyinə baş nazir qərar vermir".
"Siz Vladimir Putinə zəng vurub, ona "Gəlməyin, çünki həbs olunmayacağına zəmanət verə bilmirəm" deyə bilərsinizmi" sualına Paşinyan belə cavab verib:
"Düşünmürəm ki, Vladimir Putinin mənim məsləhətlərimə ehtiyacı olsun".
Bu, Moskvaya və Putinə açıq meydan oxumaq deyilmi?
Müstəqil siyasətçi Əli Mustafa "Bakı-Xəbər"ə açıqlamasında bildirdi ki, Paşinyan əslində meydan oxumur: "O, erməni bicliyi, erməni fitnəkarlığı ilə məşğuldur. Paşinyan demək istəyir ki, bizim Putini həbs etmək fikrimiz yoxdur. Ancaq eyni zamanda, qərarların özü tərəfindən deyil, məhkəmə tərəfindən verildiyini də bildirir. Belə demək olar ki, ikibaşlı cavab verir. Birmənalı olaraq Putinə də təminat vermir, amma onun əksini də demir. Hər şeyin məhkəmədən asılı olduğunu bildirir. Dolayı yolla Rusiya necə Ermənistanı ələ salırsa, o da öz formatında Rusiyaya bir növ cavab verir. Hər halda, bu məsələ onu deməyə əsas verir ki, Paşinyan da öz münasibətində Putinin ona qarşı olduğu kimidi. İndiki Ermənistan hakimiyyəti ilə Rusiya hakimiyyətinin ulduzu barışmır. Onlar bir mövqedə deyillər. Eyni zamanda, vəziyyətdən asılı olaraq bir-birilə uzlaşmağa çalışırlar. Ancaq fürsət düşəndə də zərbələrini vururlar. Paşinyan dolayısı ilə Putinin hərbi cinayətkar olmadığını da demir. Verdiyi cavablar onu deməyə əsas verir ki, məsuliyyəti tam öz üzərinə götürmür, ikibaşlı, məkrli danışır. Bu cavab Paşinyanla Putinin dost olmadıqlarını ortaya qoyur. Eyni zamanda Putinə qərşı Paşinyanın bir həmləsidir".
Qeyd edək ki, 2023-cü il martın 17-də Beynəlxalq Cinayət Məhkəməsi Putin və Rusiyanın Uşaq Hüquqları üzrə Müvəkkili Mariya Lvova-Belova barəsində həbs qərarı çıxarıb.
Ermənistan bu bu statutu 1998-ci ildə imzalasa da, indiyədək ratifikasiya etməmişdi.
2004-cü ildə Ermənistanın Konstitusiya Məhkəməsi bu sənədə dair fikir söyləmiş və onu ölkə Konstitusiyasına zidd adlandırmışdı.
2004-cü ildən bəri Ermənistan Konstitusiyasına iki dəfə düzəlişlər edilib və bununla bağlı Nikol Paşinyanın hökuməti bu məsələni yenidən qaldırıb.
Ermənistanın bu sənədi ratifikasiya etməsi onun üzərinə bir sıra öhdəlikllər, o cümlədən Rusiya prezidenti Vladimir Putinin, habelə Rusiyanın uşaq ombudsmanı Mariya Lvova-Belovanı həbs etmək öhdəliyi qoyub.
Məhəmmədəli QƏRİBLİ
