Azər Həsrət: "ABŞ "dərin dövləti" Putinə bir nəfəslik açdı, güc verdi ki, ayaqda durub, Rusiyanı dağıtmaqda davam etsin"
"Təbliğat müharibəsində ABŞ-ı məğlub etmək çox çətindir, çünki Birləşmiş Ştatlar bütün dünya və çoxlu Avropa mediasına nəzarət edir", - Rusiya prezidenti Vladimir Putin müstəqil amerikalı jurnalist Taker Karlsonla müsahibəsində deyib.
Dost olmayan Qərb ölkələrinin mətbuatı hələ müsahibə dərc edilməzdən əvvəl Karlsonu təbliğatda ittiham edirdi. Media onu kənar adam adlandırdı və video yayımlanandan sonra, görünür, hay-küyü dağıtmamağa çalışıblar. Ən azından, Qərb nəşrlərinin internet saytlarının əsas səhifələrində Karlsonla söhbətə dair mesajlar tapmaq asan deyildi. Putin və ABŞ-ın keçmiş prezidenti Donald Trampın etibarlı adamı adlandırılan Karlsonun Amerikada prezidentlik kampaniyasının nəticələrinə təsir etmək cəhdində ittiham olunması gözlənilirdi.
Kreml hesab edir ki, Rusiya prezidenti Vladimir Putinin amerikalı jurnalist Taker Karlsonla müsahibəsinin dünyada eşidilmək məqsədinə nail olunub: "Putin bir amerikalı jurnalistlə təkcə Amerika Birləşmiş Ştatlarında deyil, Avropada və bütün digər istiqamətlərdə beynəlxalq auditoriyaya belə bir mesaj göndərir. ABŞ rəsmiləri Putinin həqiqi dünyagörüşünün sadə amerikalılar üçün əlçatan olmasını istəmirlər".
Rusiya Federasiyası prezidentinin müsahibəsinin əks-sədası dünyanın qüdrətli ölkələrindən gəlməkdə davam edir. ABŞ, Almaniya, Britaniya, Fransa və digər ölkələrin rəhbərləri olmaqla, bir çox siyasi xadimlər Putinin mülahizələrinə reaksiya verir, əsasən tənqidi fikirlər səsləndirirlər. Həmin ölkələrdə işləyən jurnalistlərin əsas qınaq obyekti Taker Karlsondur. Onu dünyanın ən odioz lideri ilə müsahibə aparmaqda, ona tribuna verməkdə, təhlükəli fikirlərini dünyaya tirajlamağa yardımçı olmağa görə qınayırlar.
Proseslərin bu vaxtında Trampa yaxın olduğu deyilən bir teleaparıcı Putindən müsahibə götürür və ona Amerikanın, bütün Qərbin siyasətini ifşa etmək şansı verir. Bu nə məsələdi?
Media məsələləri üzrə ekspert, əməkdar jurnalust Azər Həsrət "Bakı-Xəbər"ə açıqlamasında bildirdi ki, bu məsələdə çoxlarının diqqət yetirmədiyi bir məqam var: "Xatırlatmaq istərdim ki, 2009-cu ildən sonra başlayan "ərəb baharı"ndan sonra Misir, Tunis, Liviya kimi ölkələrdə hakimiyyətlər dəyişdi, qanlı qarşıdurmalar oldu. Hətta Liviya hələ də özünə gələ bilmir. Həmin dalğada Suriyada da inqlab ssenarisi işə salındı və Bəşər Əsədə qarşı əməlli-başlı hərəkətlənmə oldu. Bütün dünya ona fokuslanmışdı ki, Bəşər Əsəd də digərləri kimi hakimiyyətdən devriləcək. Ancaq görürük ki, Bəşər Əsəd hələ də hakimiyyət başındadır, Suriya isə darmadağın olub. Bütün ölkə ərazisində Suriya hakimiyyətinin sözü keçmir. Dövlət suverenliyi təhlükə altındadır, ancaq buna baxmayaraq, Bəşər Əsəd hələ də hakimiyyətdədir və güya ABŞ onunla bacarmır. Rusiya ilə bağlı baş verənlər də bir növ buna bənzəyir. Biz düşünürdük ki, ABŞ və bütün Qərb Putini qısa müddətdə bitirəcək. Amma belə anlaşılır ki, onlar Putini hələ də bitirmək fikrində deyillər. Onlar Rusiyanı getdikcə zəifləyən, haldan düşmüş bir dövlətə çevirməyə çalışırlar. Bu müsahibə də məhz bu motivdən qaynaqlanır. Düzdür, deyirlər ki, Karlson Trampa yaxın jurnalistdir. Trampın da Rusiyaya münasibəti Bayden administrasiyasından ciddi şəkildə fərqlənirdi. Müsahibə çox həssas məqamda alınıb. Belə qənaətə gəlinir ki, məqsəd ABŞ-da ikitirəlik yaratmaq, Trampa xal qazandırmaqdır. Burada ABŞ "dərin dövləti"nin də bir gedişi hiss olunur. Putinə özünü ifadə etmək üçün bir pəncərə açdılar. Ona özünü ifadə etməsi üçün şərait yaratdılar və bunu ən yüksək səviyyədə etdilər. Mümkün deyil ki, sadəcə Trampa yaxın olan jurnalist durub öz başına bu qədər böyük işə girişsin. Nə qədər desək də ki, ABŞ-da demokratiya var, oranın dərin qatlardan idarə olunan avtoritarizmi dı mövcuddur. Həmin sistemdən heç kim kənara çıxa bilmir. Karlson da istisna deyil. Mən düşünürəm ki, burada Suriya ssenarisi ilə bənzərlik var. Putin ayaqda qalır, prezidentliyə davam edir və Rusiya daha da haldan salınır. Bu da böyük planın icrası üçündür. Rusiya ərazisində 41 dövlətin qurulması üçün işlər görülür. Bunun üçün Rusiyanı çox zəiflətmək lazımdır. Buna görə də, nə qədər ki Ukrayna müharibəsi davam edir, Rusiyaya qarşı iqtisadi sanksiyalar davam edəcək. Putinin bir addım belə geriyə çəkilmək fikrinin olmadığı gün kimi aydındır. Belə bir şəraitdə Rusiya get-gedə zəifləyəcək".
Məhəmmədəli QƏRİBLİ
