Elşən Həsənov: "Bir daha sübut olunur ki, proses eyni məkandan idarə olunur"
Erməni mediası məlumat verir ki, yanvarın 27-si və 28-də Avropanın 50-dən çox şəhərində "Artsax" ermənilərinin hüquqlarının müdafiəsi tələbi ilə etiraz aksiyaları keçiriləcək. Bu barədə Gürcüstanın erməni icmasının sosial şəbəkələrdəki səhifəsində məlumat verilib.
Qeyd olunur ki, nümayişlər 2023-cü il oktyabrın 1-də müxtəlif ölkələrdə keçirilən mitinqlərə mövzu baxımından oxşar olacaq.
Tiflisdə yanvarın 28-də saat 14:30-da Avropa İttifaqı Nümayəndəliyinin ofisi qarşısında (ünvan İ.Çavçavadze prospekti №64) aşağıdakı tələblərlə nümayiş keçiriləcək:
"Artsax" ermənilərinin hüquqlarını qoruyun.
Erməni əsir və girovları azad edin.
Ermənistan Respublikasının təhlükəsizliyini təmin edin.
Azərbaycana qarşı sanksiyalar tətbiq edin.
Gürcüstandakı erməni diasporunun belə fəallaşması nə ilə bağlı ola bilər?
Təhlükəsizlik məsələləri üzrə ekspert Elşən Həsənov "Bakı-Xəbər"ə açıqlamasında bildirdi ki, Gürcüstanda erməni diasporunun fəallaşmasının ciddi səbəbləri var: "Gürcüstanda yaşayan soydaşlarımız həmin ölkənin əhalisinin 6,3%-ni təşkil etməklə, say baxımından ən böyük milli azlıqdır. Ölkədə sayca ikinci böyük milli azlıq ermənilərdir. Onlar ümumi əhalinin 4,5%-ni təşkil edir.
Bu baxımdan Gürcüstanın Azərbaycan və erməni icmalarının hazırkı durumu, fəaliyyəti, birliyi və digər aspektlər baxımından müqayisəli təhlilini aparmaq məntiqli olar. Qeyd edək ki, ermənilərin "özününkü" saydığı Samtsxe-Cavaxeti torpaqlarında qədimdən gürcü xalqının tərkib hissələrindən olan cavaxlar və mesxeti türkləri məskunlaşmışlar. Ermənilər bu diyarlara 1829-cu ildə rusların dəstəyi ilə köçüblər. Onlar gürcülərə qarşı da açıq ərazi iddiaları ortaya qoyurlar. Azərbaycan isə ən böyük meqa layihələrini məhz Gürcüstan üzərindən reallaşdırır. Gürcüstan buradan böyük iqtisadi dividendlər götürür. Gürcüstandakı ermənilərin məhz Avropadakılarla eyni zamanda fəallaşmasının ciddi səbəbləri var. Bu, Avropanın Azərbaycana qarşı etdiyi təzyiqlərlə eyni zamana təsadüf edir. Gürcüstanda Avropa İnstitutlarının regional bölmələri var. Hətta bir çox faktlardan görürük ki, Azərbaycanda da bəzi Qərbə bağlı təsisatların maliyyələşməsində Gürcüstan üzərindən istifadə olunub. Bəzi müxalif fəallarla bağlı aparılan cinayət işlərində biz bu məqamları aydın görürük. Bir daha sübut olunur ki, proses eyni məkandan idarə olunur. Görüntü xarakteri daşıyan addımlardı. İrəli sürülən təkliflərin heç bir hüquqi əsası və perspektivi yoxdur. Çünki Azərbaycanda erməni girovu yoxdur. Azərbaycanın ərazi bütövlüyünə qarşı qəsdlər etmiş bir qrup vəzifəli şəxslər var ki, onlar barəsində də qanuni istintaq hərəkətləri aparılır. Qarabağdan gedən ermənilərin hüquqlarını isə Ermənistanın özü qorumalıdır. Çünki həmin əhali Azərbaycanın reinteqrasiya tədbirlərinə cavab vermədi və bu yolu seçdilər. Ermənistan Respublikasının təhlükəsizliyini də İrəvanın özü təmin etməlidir. Azərbaycana qarşı sanksiyaların qəbulunu tələb etmək də çox mətləbdən xəbər verir. AŞPA-da qəbul edilən son qərar bir daha sübut etdi ki, bu məsələdə birbaşa erməni diasporunun əli var".
Məhəmmədəli QƏRİBLİ
