Ramil Məmmədli: “İki səbəbdən bu baş verməyəcək”
Donald Tramp birinci prezidentliyi dövründə Azərbaycanla əməkdaşlığa zərər verəcək addım atmayıb. İnsafən qeyd etmək lazımdır ki, 44 günlük müharibə dövründə prezident olsa da, Azərbaycana mane olmadı. Halbuki, həmin dövrdə Birləşmiş Ştatlarda seçki kampaniyası idi və ermənilərin rəğbəsini qazanmaq üçün bunu edə bilərdi.
Ancaq bu arada, ABŞ-dakı erməni lobbisi Tramp və onun ətrafındakılara, Dövlət Departamentinə davamlı məktublar göndərir, Azərbaycanı cəzalandırmağı tələb edirlər. Əlbəttə, bu məktublara fikir verməmək də olar, ancaq Trampın ətrafındakı bir sıra fiqurun yaxın keçmişdə erməni lobbisi, Ermənistan və Qarabağ separatçıları ilə bağlılığı narahatlıq yaradır. Dövlət katibi Marko Rubio, kəşfiyyat rəhbəri Tulsi Qabbard, Səhiyyə və Sosial Xidmətləri katibi Robert Kennedi erməni lobbisi ilə çox yaxındılar. Trampın Ukrayna ilə bağlı bu dərəcədə gözlənilməz sərt mövqeyindəndən sonra bu baxımdan Azərbaycanla bağlı hansısa müəyyən narahatlığa, risqlərə əsas varmı?
“Tramp yaxşı bilir ki, erməni lobbisi Demokratlar Partiyası ilə xüsusi yaxınlığa malikdir”
Sözügedən məsələyə aydınlıq gətirən hərbi ekspert Ramil Məmmədli “Bakı-Xəbər”ə açıqlamasında iki səbəbdən bununla bağlı narahatlığın olmadığı qənaətindədir: “Birincisi, Tramp xaraktercə mühafizəkardır və heç nəyi unutmur. Məsələ ondadır ki, o yaxşı bilir, Birləşmiş Ştatlarda erməni lobbisi hər iki seçki kampaniyasında Cozef Baydenə səs verib. Ondan əvvəl də, yəni 2016-cı ildə keçirilən seçkilərdə Hillari Klintona ermənilər səs verib. Tramp yaxşı bilir ki, erməni lobbisi Demokratlar Partiyası ilə xüsusi yaxınlığa malikdir. Məhz Demokratlar Partiyasından olan bir qrup konqresmen erməni lobbisi ilə korrupsiya əlaqələrinə malikdir. Hətta 2020-ci ilin seçki kampaniyasında Tramp Kaliforniyada seçicilərlə görüşdə ermənilərə irad da tutub. Deyib ki, səsi Demokratların namizədinə verdiyiniz üçün gedin onlardan tələb edin. Bir bu səbəbə görə Trampın ermənilərin lehinə dönüş edəcəyini düşünmürəm. İkincisi, Tramp İsrail faktoruna və yəhudi lobbisinə görə buna getməz. İsrailin Trampa necə isti münasibət bəslədiyini, o cümlədən onun da qarşı tərəfə necə böyük dəstək verdiyini nəzərdən qaçırmaq olmaz. Tramp birinci prezidentliyi dövründə Qüdsü İsrailin paytaxtı kimi tanıdı və ABŞ səfirliyini ora köçürdü. Tramp yaxşı bilir ki, İsraillə Azərbaycan arasında münasibətlər necə yüksək səviyyədədir. İsrailin neftə olan tələbatının 40 faizini Azərbaycan ödəyir. Bütün bunlardan çıxış edərək hesab edirəm ki, Tramp administrasiyasında ermənilərə yaxın bir sıra yüksək ranqlı məmurlar olsa da, bu, son nəticədə nəyisə dəyişə bilməyəcək”.
Vidadi ORDAHALLI
