Əli Mustafa: “Nəyisə gözləməməliyik, Almaniyanın yeni hökuməti ilə hərtərəfli işləməliyik”
Məlum olduğu kimi, Almaniyada növbədənkənar parlament seçkilərində ənənə pozulmayıb. Sosial Demokratları yenə Xristian Demokrat İttifaqı/Sosial Demokrat İttifaqı əvəzləyib, Almaniya kansleri Xristian Demokrat İttifaqından Fridrix Mertz seçilib.
Bu dəfə mühafizəkar XDİ/XSİ bloku Bundestaqa növbədənkənar seçkilərdə qalib gəlib. Səsverməyə seçicilərin 84 faizi qatılıb. Bu da özünəməxsus fəallıq sayılır. Bu blok 28,6 faiz səs toplayıb. Müxalifətdə olan Almaniya üçün Alternativ Partiyası 2021-ci il seçkiləri ilə müqayisədə 20,8 faiz səs toplamaqla səsını iki dəfə artırıb. Bununla da, ölkə tarixində ilk dəfə ikinci olub. Üçüncü yerdə kansler Olaf Şoltsun Almaniya Sosial Demokrat Partiyası qərarlaşıb. Bu siyasi təşkilata seçicilərin 16,4 faizi səs verib.
O da məlumdur ki, Almaniyanın Şolts hökuməti Azərbaycana münasibətdə, Qarabağ məsələsində ədalətli olmadı. Almaniyada mövcud hakimiyyət sözügedən məsələlərdə sanki Fransa Xarici İşlər Nazirliyinin təlimatları ilə hərəkət edirdi. Bir sıra məsələlərdə eynən Fransa kimi qərəzli mövqedən çıxış edirdi. Bu baxımdan yeni Almaniya hökumətinin Azərbaycana münasibəti necə olacaq? Belə məlumat var ki, Xristian Demokrat Partiyası Şoltsun Almaniya Sosial Demokrat Partiyası ilə koalisiya quracaq. Belə olsa bu, Azərbaycanın xeyrinə olmaya bilər.
“Qurulacaq alman hökumətinin maraqları tələb edəcəksə, o zaman Azərbaycanla münasibətlər fərqli olacaq”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa hesab edir ki, oturuşmuş Avropa ölkələrin xarici siyasətində parametrlər birvektorlu deyil: “Yəni bir çox məsələlər nəzərə alınmaqla xarici siyasət müəyyənləşir. Əlbəttə, ortaq dövlətin maraqları, müttəfiqlərin maraqları nəzərə alınır. Eyni zamanda dövlətin xarici siyasət konyunkturları müəyyənləşir. O dövlətin təsir imkanları nəzərə alınır. Məsələn, yəhudilərin, ermənilərin, yunanların Qərb ölkələrində güclü lobbiləri var. Bu lobbi təşkilatların apardıqları fəaliyyət, əməkdaşlıq, irəli sürdükləri narrativlər, təbii ki, bu və ya digər formada böyük dövlətlərin siyasətinə təsirsiz ötüşmür. Düzdür, ümumən Qərb üçün dostlar yox, maraqlar var. Bu baxımdan, əlbəttə, Almaniyanın qurulacaq hökumətinin maraqları tələb edəcəksə, o zaman Azərbaycanla münasibətlər fərqli olacaq. Əlbəttə, bu cür məsələlər hakimiyyətə gələn koalision hökumətin birgə razılaşdırdığı proqrama uyğun həyata keçiriləcək. Ancaq burada əhəmiyyətli məqamlardan biri də Azərbaycanın Almaniya hökuməti ilə işləməsidir. Xarici siyasət idarəmizin, səfirliyimizin, diplomatların apardığı fəaliyyətdən də bir çox şeylər asılı olacaq. Heç kəsə sirr deyil ki, erməni diasporunun, kilsəsinin xaricdəki fəaliyyəti bir çox ölkələrin Azərbaycan siyasətində çox ciddi rol oynayır. Biz də bunu nəzərə alıb adekvat tədbirlər görməliyik. İşlərimizi elə qurmalıyıq ki, həmin ölkələrlə Azərbaycan arasında yaxın münasibətlər olsun. Yəni bu da əhəmiyyətli məsələdir. Hər halda düşünürəm ki, bütün yeniliklər müəyyən risqlər yaratsa da, şanslar da açır. O üzdən, gözləməməliyik ki, görək yeni alman hökuməti hansı siyasət yeridəcək. Almaniyanın yeni hökuməti ilə hərtərəfli işləməliyik. Yeni hökumətin maraqlarına uyğun addımlar atsaq, bizə münasibət fərqli ola bilər. Bütün hallarda Azərbaycanın Almaniya ilə dost olması vacibdir. Çünki Almaniya Avropanın aparıcı dövlətidir. Ola bilsin, Mertzin kanslerliyi dönəmində Almaniyanın mövqeyi daha da güclənsin. Çünki o, xarizmatik lider olaraq Almaniya üçün yeni şeylər vəd edir. Bu baxımdan biz indidən ciddi əməkdaşlıq etməliyik”.
Vidadi ORDAHALLI
