İlyas Hüseynov: “Ermənistanın xarici işlər nazirinin müavininin britaniyalı qonaqla görüşündə onu Azərbaycan-Ermənistan münasibətlərinin normallaşması üzrə nümayəndə kimi təqdim edirlər, bu yanlış təqdimatdır”
Ermənistan günü-gündən təxribatlarını və antisülh davranışlarını daha da genişləndirir. Yalan təqdimatlar etməklə öz mahiyyətini bir daha ortaya qoyur.
Böyük Britaniya Xarici İşlər Nazirliyinin Ermənistan və Azərbaycan arasında sülh prosesi üzrə xüsusi nümayəndəsi barədə danışırlar, guya belə bir nümayəndə təyin olunub və Ermənistan xarici işlər nazirinin müavini Paruyr Hovhannisyan Böyük Britaniya Xarici İşlər, Birlik və İnkişaf Nazirliyinin Şərqi Avropa və Mərkəzi Asiya Departamentinin rəhbəri, Ermənistan və Azərbaycan arasında sülh prosesi üzrə xüsusi nümayəndə Kris Allanı qəbul edib.
Təbii, Ermənistan XİN Kris Allanı yanlış təqdim edib.
Britaniya hökuməti bu xüsusi nümayəndəni nə vaxt təyin edib? Bizim bundan xəbərimiz yoxdur. İndiyə qədər belə şey görsənməyib ki, Britaniya hökumətinin Azərbaycan və Ermənistan arasında sülh prosesi üzrə nümayəndəsi olsun. Yəni Böyük Britaniya hökuməti belə bir nümayəndə təyin etməyib. Ermənistan isə ənənəvi yalanlarını davam etdirib Britaniyanın xüsusi nümayəndəsilə görüşdən danışır.
Azərbaycan və Ermənistan arasında sülh prosesi üzrə Britaniya nə vaxtdan nümayəndə təyin edib? Bu nədir ermənilər təqdim edirlər? Britaniyanın nə vaxt bu sahədə nümayəndəsi olub? Bu, ATƏT-in Minks qrupudur, yenidən yaradırlar?
“Bu cür yanlış təqdimatlar iki dövlət arasında münasibətləri daha da gərginləşdirir, sülh prosesində Ermənistanın qeyri-səmimiyyəti üzə çıxır”
Politoloq İlyas Hüseynov “Bakı-Xəbər”ə şərhində “Ermənistan uzun illərdir ki, Cənubi Qafqazda sülh prosesi ilə bağlı yanlış məlumatlar paylaşır, media seqmentində həqiqətdən uzaq fikirlər qeyd olunur. Böyük Britaniya rəsmisi ilə keçirilən görüşü də tamamilə səhv təqdim edərək geniş ictimai rəyi çaşdırmağa çalışırlar. Eyni zamanda ATƏT-in Minsk qrupu öz fünksionallığını itirdikdən sonra ayrı-ayrı formatlar axtarışındadırlar” - deyə bildirdi.
İ.Hüseynovun vurğuladığına görə, Ermənistan Qarabağdan könüllü olaraq gedən ermənilərin məsələsini gündəmə gətirir və çalışır ki, onun ətrafında da müxtəlif spekulyasiyalar etsinlər. “Bu xüsusda həm də Ermənistanın xarici işlər nazirinin müavininin britaniyalı qonaqla görüşündə onu Azərbaycan-Ermənistan münasibətlərinin normallaşması üzrə nümayəndə kimi təqdim edirlər, bu yanlış təqdimatdır. Hesab edirəm ki, bu cür yanlış təqdimatlar iki dövlət arasında münasibətləri daha da gərginləşdirir, sülh prosesində Ermənistanın qeyri-səmimiyyəti üzə çıxır. Bir sıra məsələlərdə görürük ki, Ermənistan özünü sanki sülhpərvər tərəf kimi göstərməyə çalışır, sonrakı addımlar bu təsəvvürləri də alt-üst edir. Revanşizmin gücləndirilməsi, Ermənistanın Cənubi Qafqazda önə çəkilməsi prosesi vurğulanır. Bu həm də sürətli silahlanma kontekstində xüsusi diqqət çəkir. Eyni zamanda hesab edirəm ki, Ermənistan bu cür yanaşmalardan çəkinməli, səhv təqdimatlar nəticəsində siyasi prosesləri pozmağa çalışmamalıdır” - deyə İ.Hüseynov qeyd etdi.
İradə SARIYEVA
