Oktyabrın 6-da Kataloniya parlamentində keçirilən ictimai dinləmələrdə İspaniyada fəaliyyət göstərən Enterprise Armenia Fondunun nümayəndəsi, erməni ümumi xeyirxahlar ittifaqının üzvü Levon Qriqoryan çıxış edərək Qarabağdakı vəziyyəti təqdim edib. Dinləmələr Kataloniya Parlamentinin Xarici Əlaqələr, Avropa İttifaqı və Əməkdaşlıq Komissiyasında baş tutub.
O, güya Azərbaycanın on aya yaxındır ki, Qarabağı blokadaya almasından, yerli ermənilər üçün yaradılmış ağır vəziyyətdən və bunun ardınca baş verən “etnik təmizləmədən” danışıb və beynəlxalq ictimaiyyətin “Dağlıq Qarabağ ermənilərinə xəyanət etdiyini” vurğulayıb.
Çox maraqlı bir vəziyyət yaranıb, artıq ermənilər öz əsassız şikayətlərini hansısa nüfuzlu ölkələrin parlamentlərində deyil, özlərinə tam uyğun olan separatizmə meylli platformalarda dilə gətirirlər. “Dostunu göstər, deyim sən kimsən” məsəli burada lap yerinə düşür. Bununla Kataloniya parlamenti də İspaniyadan ayrılmaq məqsədlərinin qondarma, əsassız olduğunu göstərmiş oldu.
Politoloq Yeganə Hacıyeva “Bakı-Xəbər” ə bildirdi ki, Avropanın ortasında, Avropa İttifaqının nüfuzlu bir ölkəsində muxtar hakimiyyətlər mərkəzi hökumətə, ölkənin Konstitusiyasına, qanuna, ölkənin ali məhkəmə qurumuna tabe olmursa, bu onlara hörmət gətirmir.
Bizdə Kataloniyada olduğu kimi yalnız separatizm problemi yox idi. Azərbaycanın əraziləri birbaşa Ermənistan tərəfindən işğal olunmuşdu. Ermənistan hərbi işğaldan sonra Azərbaycan ərazilərini anneksiya etmək siyasəti yürüdürdü. Ermənistan məhz bu cəhdlərin üstünü örtmək üçün yalnız separatizmi əlində bayraq edib, güya müstəqil dövlət qurmaq istədiyini deyirdi. Kataloniyanı kənar hansısa dövlət işğal etməyib. O ki qaldı Qarabağ problemi ilə Kataloniya məsələsinə beynəlxalq qurumların və dövlətlərin fərqli yanaşmasına, burada müxtəlif səbəblər olub. Qarabağ münaqişəsi bəlkə də dünyada yeganə münaqişə olub ki, bütün beynəlxalq təşkilatların və dünya güclərinin ona yanaşması tamamilə fərqlənirdi. Yəni bu münaqişəyə beynəlxalq hüquq müstəvisində yanaşma tərzi olmayıb. Qarabağ məsələsinə münasibətdə faktiki olaraq beynəlxalq hüquq və konvensiyalar çeynənir. Beynəlxalq hüquqda selektiv yanaşma mümkün deyil. Beynəlxalq hüquq hər bir dövlətin özünün qəbul etdiyi hüquq çərçivələrindən də üstədir. Ona görə Qarabağ məsələsinə münasibət də digər münaqişələrə olduğu kimi, beynəlxalq hüquq normalarına uyğun olmalı idi və olmalıdır. Ancaq çox təəssüf ki, ikili standart bu məsələdə tətbiq edilir. Buna baxmayaraq, Azərbaycan öz gücünə problemi həll edib. Erməni diasporu indi də “etnik təmizləmə” yalanlarını uydurmaqla məşğuldur. Ancaq fərqli münasibətin şahidi olurlar. Saxta “erməni soyqırımı”nda olduğu kimi, dünya ölkələrinin parlamentləri öz qapılarını onların üzünə açmır. Artıq dünyadakı reallıqlar dəyişib. Bu səbəbdən də, belə uydurmalara qulaq asmaq istəyənlər az olur. Kataloniya parlamenti bu addımı ilə əsl mahiyyətini bir daha ortaya qoydu. Yaxşı olardı ki, İspaniya hakimiyyəti bir az Azərbaycanın təcrübəsindən istifadə etsin. Əminəm ki, bu seçimi etsə, Kataloniya yarasını birdəfəlik kəsib ata bilər. Təbiidir ki, belə dinləmələr heç nəyi dəyişmir. Çünki Azərbaycan bütün addımlarını qanun çərçivəsində atır. Heç bir “etnik təmizləmə” aparmır. Əksinə, erməni əsilli vətəndaşlara reinteqrasiya üçün şərait yaradır. Bunu da dünya birliyi gözəl bilir”.
Məhəmmədəli QƏRİBLİ
